He lemziak hi a ziaktu ka hre lova, eng rilru pu a ziak nge anih ka hre hek lo. He lemziak hi han en vang vang la, i rilru ah enge lo awm? Task Force ten Ram ri ah duty in Covid - 19 in Mizoram a luh lohnan theihtawp an chhuah laiin Sorkarin Thlawhna leh Rel hmangin Covid - 19 ramchhungah a phur lut angin a hmuh tir che em? Chutiang ngaihdan chu a neih tir deuh che em? Dik i ti viau lo maw? A mak a ni e, tiraw!

Mahse, Khitiang rilru pu hi Border duty zingah an awm ka ring lo. An lo awm palh hlauh anih pawhin an tam lo khawp ang. Ngawrh taka duty zingah hian mahni hnampui unau te kan ram, an ram a rawn haw lo hmu mawh a, lo helh tu an awm hi ka ring thei lo. A mizo lo a ni. "Thih leh ruam khatah; dam leh tlang khatah" lo ti ṭhin min thlahtute thlarau a zahawm em mai.

Mizo lemziak
He natna ṭihbaiawm hi Mizoram a lo lut turin tuman kan duh lo ang chiah hian a pu luttu nih pawh Mizo tumah hian kan duh lovang. Duh thu a kai an awm lovanga, tuna he natna vei mek te pawh hian midang kai darh hi an hlau ve ngawih ngawih ngei ang le.

Ran mawl leh á zawk te mahin thli leh ruahpui a thlen a, manganna leh buaina an neih chuan an in panin an haw ṭhin laiin eng vangin nge Mihring te hian mahni in panin kan haw loh bik ang? Kan in, kan ram aia thlamuanpui tur hmun hi kan nei dawn em ni? Mikhualna hmun in nuam leh ropui a na tawrh ai chuan mahni rap in chhete a na tawrh chu a zia zawk an ti ngai e.

Unaute u, kan lo lawm a che u. Mizoram hi kan ta anih angin in ta a ni bawk e. I ram hian thinlung takin a lo pawm a che u. Kan ṭang tlang anga, tawrh a ṭul leh kan tuar tlang ang. Ṭhian chhan thih ngam lu pu Mizo kan ni ngai e,. zamin hlau mai lo la, i ramah i awm tawh a, eng natna leh harsatna pawh tawk la, i tan i Mizo pui, i hnampui te kan awm reng e.

Chutih rualin i rawn haw na hmun i hrechianga, helai a lo awm sa te aiin i dinhmun a derthawng zawkin natna lakah i him lo zawk tih hria la, fimkhur la, inkaihhruaina leh inkhuahkhirhna dan kan neih mek hi zawm hram ang che aw.

Post a comment

Powered by Blogger.