Hmanah khan Vanneihtluanga'n "Fak Hlawh lo Val Rual" tih thupui a hmangin ngaihnawm leh zirtir tha zet mai neiin Mizo lirthei khalhtute chanchin, an dinhmun leh Mizoram tana an tangkaizia a ziak a. A ngaihnawm bakah driver-te lo tangkai leh pawimawhzia kan hriat phah hlawm a nih kha. Sap hovin 'unsung heroes' an tih ang deuhvin mipui mimir hriat lem loh driver-te'n ram leh hnam tana an lo thawh hlawkzia kan hriat phah uar uar a ni.
Chutiang a nih lai a fak phu lo val rual chanchin han ziah hi a chakawm lem loh hle a, mahse, kan dinhmun thlirin a tul miau bawk si. Covid-19 hripui len vanga mi state a tangkhang Mizoram mi a sang tel tak meuh meuh sorkar laipuiin phalna a pek hnu-ah an lo haw ta a. Bairabi rel chawlhhmun an lo thlen hnu-ah an chenna Mizoram district hrang hranga phurh thlen an ngai a. Hemi hna thawk tur hian Mizoram State Transport (MST) bus driver leh conductor bakah Aizawl City Bus driver conductor rual chu sorkarin ruaiin Aizawl City Bus te hi man chawiin sorkarin a hmang hawh a. Aizawl district bawrhsap sawi dan chuan Aizawl city bus hi 120 vel an hmang a ni.
Mizote hi mi sawisel kan peih viau rualin mi fak hi kan awlsam viau mai a. Chuvangin kan Aizawl city bus driver leh khalhtute pawh hi ral hmatawnga an nunna thapa tlawmngai a inpe angin kan sawi a, bus an khalh hian hlawh an nei tihte kan theihnghilhsak a, hlawh nei hauh lova VLTF mi duty te nen hiala tehkhin pawh an awm awm e. A enga pawh chu ni se, chuti taka fak phu em em chu an lo nih lem loh hmel e.
Official-te'n an sawi danin MST driver leh conductor-te hi chu sorkar hnathawk an nih avangin inkhunghrantir an ni a, mahse an driver leh conductor pui dangte an tih ve si loh avangin in lama inkhunghran an duh thu an sawiin sorkar hotute pawh an tang na vak ngam lo a ni awm e, in lamah an inkhunghrang hlawm niin a lang. MST bus conductor pakhatin Covid-19 hri a kai tih hriat a nih takah hian Aizawl City Bus 120 rual driver leh conductor-te hi an lo khunghrang (quarantine) hauh lo mai tih hriat a lo ni ta a. An hna an thawh zawh hnu a khunghran an nih dawn chuan an thawh duh dawn loh thu a thuneitute an kar avangin tangkhang lo hawte an khua/district theuhva thlen a ngaih bawk si avangin khunghran loh turin an inrem ta niin an sawi.
Tangkhang lo hawte phurtu bus driver leh conductor te thutna leh an mi phurhte inkar hi daidan a nih avangin an him tura ngaih a nih thu hman deuh khan sorkar lam chuan an sawi a. Mahse, an mi phurhte nen an intlawhpawh miah lo tih hi chu a rinawm chiah loh. Bus driver rui lutukin a chetsualpui tihte kan hria a, an rui lai thlalak pawh social media-ah a darh bawk. Bairabi rel chawlhhmuna mit ngei a hmutu chanchinbumite sawi dan phei chu sawi chhuah kher pawh a tul hranpa love. Engpawhnise, mi 200 rual zet, tangkhang lo hawte phur a hla tak taka kalte hi sorkarin hri an vei leh vei loh a endik leh dawn chu niawm a ni a. Kan 'fak hlawh val rual' thinte hian he Mizoram leh a mipuite dinhmun hi engang takin e an lo tihderthawn theih chu kan hre thuai turah i ngai teh ang.
Author: HC Vanlalruata
[ToMZ is dedicated for archive and exposition of Mizo affairs to the rest of the world. Informations obtained are re-posted 'as-is' basis as a digitization initiative so as to make accessible to all through online surfing. Due credit is given to all author/owner except those which cannot be ascertained]
Post a Comment