Kar hmasa lawkah Aizawl mihausa hlun Thansanga & Sons in Rt- PCR khawl an leiin Sorkar ngeiin lawm takin an lo dawng a, tunah ṭangkai taka hman a ni. Vawiin (June 26) ah erawh Lunglei pa hausa Zodintluanga'n Lunglei Civil Hospital tana June 26 (Zirtawpni) khan Rt-PCR Khawl a hlan chu kan hriat rual rualin lawmna vangin awmhmunah kut kan lo beng a, nimahsela tlai lamah Civil Hospital aṭangin DC Office lama phurh let leh a ni tih kan hriat leh thung erawh chuan mak kan tiin hriatthiam har kan ti takzet a ni. Opposition MLA a nih vang nge engvanga hetia lak kir leh a nih hi sawifiah thuai turin kan ngen nghal bawk. Lungleiah hian a hmunhma turah kan buai lo a, thawktu tur pawh tun hripui leng chhung atan te chuan tlawmngai tura ngen kan nei bawk ang a, pawisa pek ngei ngei ngai an awm a nih pawhin Lunglei mipui heti ve réng ruangah chuan sum awm turah kan ngai a, kan huphurh hran lo.
June 23, 2020 ni a Kan Health Minister zahawm tak Dr. R. Lalthangliana’n June 22-a press mi te a kawmna ah khan sawrkar hmalakna hrang hrang te sawi lan a ni a, lawmawm kan ti hle a ni. Chutih lai erawh chuan Covid-19 test-na khawl bun chungchangah erawh thudik tawk lo mipuite hnena hrilh a ni hi hriatthiam har kan ti hle a, he thil pawimawh tak chungchangah hian sawrkar in chak zawka hma a lak theih nan thil nih dan dik tak sawi lan hi a ṭula ka hriat avangin thu chhuah ka rawn siam a ni e.
India rama Covid-19 vei kan lo pûn zel tak a vanga Testing Laboratories kan mamawhna a san zel avangin Indian Council of Medical Research (ICMR) chuan Testing Facilities tam zawk kan neih belh theih nan 5th April a hman ṭan turin ruahmanna a siam a, chu a ruahmanna siam tlangpui chu a hnuai ah hian tarlan a ni a, chung test facilities din belh theihna a tana tling tura ruahmanna a siam te chu a hnuaiah hian dah a ni:
- Sample test tur (suspected cases) ni khat ah 100 an awm tling tur a ni.
- Testing facilities awmna atanga 150 kms (plain ah 250 kms) aia hla ah.
- Testing facilities hi 150 kms aia hnaiah an awm a nih chuan ni khatah sample 100 aia tam test ngai khawpa indaih lo an ni tur a ni.
- A chunga a hlat zawng sawi aia hnaia testing facilities, sample 100 test tling lo leh a huam chhung District a sample test belh thei lo an awm chuan laboratories khar saka an permit chu laboratory thar tana pek an ni ang.
- Testing facilities din belh-na tur District hian sawrkar laboratory BSL-2 level chin a nei tur a ni.
- Sawrkar laboratory nei lo District ah chuan private laboratory, NABL accreditation nei tan testing permission hi dil theih a ni.
(Point 5 leh 6 in a sawi document proof hi dilna ah thil tel tur a ni.)
He ICMR in testing facilities din theih a tihna criteria ah hian Lunglei hi a awm hliah hliah a, test na hnai ber Aizawl hi ICMR in a hlat zawng a sawi hilly area ah 150 Kms chuang a hla a ni a, bakah tunlai testing facilities kan mamawhna san dan leh ZMC-a an test hneh loh zia ngaihtuah pawh hian testing laboratory neih belh hi a ṭul tak meuh a ni.
Hetiang a nih mek laia kan MLA, Dr. K. Pachhunga leh Prof. F. Lalnunmawia te'n Rt-PCR khawl bun chungchanga sample 100 tal test theih loh hun ala thleng thei a chutiang huna ICMR in license tih tawp sak tur ang hiala an sawi hi a dik lo hul hual a, ICMR thuchhuah point pakhatna in a sawi hi, sample test tur 100 aia tam an awm tlin a, test na hnai ber km 150 aia hla ah a awmin testing facilities din theih a ni tih a sawina zawk a ni a, nakina sample 100 a awm tlin leh tlin loh tur chungchang a sawilo a ni. Aizawl ah pawh khawl bun tirh khan sample 100 an test theilova ICMR in cancel a tum phah lo a, Aizawla an test tam theihloh avanga Lunglei leh a chheh vel a sample 100 chuang fe test theih loh a pending a awm avang hian Lunglei hian testing facilities hi kan mamawh hle zawk a ni.
Hetiang zawnga mipui hnena thu an sawi duh hi Lungei leh a chheh vel mipui a hmuhsit thlakin thih leh dam inkara kan awm lai pawha sawrkarin Lunglei leh a chhevel min ngaihsaklohna a ti lang hle niin kan hria a ni.
ICMR hian hetiang test-na khawl bun a pawimawh zia hria in sample 100 an test tlin loh laia a chhehvel khua te sample an test sak duh loh chuan an permit cancel saka a test thei laboratory a permit pek hial turin thuchhuah a siam zawk a ni.
Hetianga mipui lama mamawhna a sân em em lai leh State dangte pawhin sawrkar Damdawiin mai ni loin private Damdawiin te pawh test an phalsak tawh laia kan sawrkar in Lunglei leh a khaw chhehvel mamawhna ngai pawimawha hma la tur a nih laia hma la duh lo mai pawh nilova Lunglei lam mi in phal te pawhin sum senga test-na khawl lei leh testing facilities neih theihna atana an in huam hial hnu pawha testing facilities hautak zia leh a theihlohna leh harsatna lam hlir a sawi hi Lunglei mipuite chuan hriatthiam a har kan ti hle.
Biosafety Level pali (1-4) zingah ICMR thuchhuah in a sawi BSL-2 hi level hniam ber dawttu a ni a, Lungleiin kan neih ve phaklohna tur a awm chuan sawrkar hian sawifiah turin kan phut bawk a, hetianga Biosafety Level hniam ber dawttu facilities pawh tun ang mamawhna san hunlai taka min ngaihtuah sak thei lo a nih chuan sawrkar tan a mualpho thlak hle ah kan ngai a, a rang lama kan mamawh hi min ngaihtuah sak turin kan phut tlat bawk a ni. .
India rama state hrang hrangah testing facilities hi mamawhna avangin bun belh zel a ni a, institution based kher ah testing facilities dah tur tih dan pawh a awnlo a ni. State tam berin pakhat aia tam mai nilovin private facilities tepawh an neih tawh laiin keini mizoram hi hmarchhak state zingah pawh a nei hnuhnung pawl niin 5-na kan ni a, Nagaland te pawh in pahnih an neih tawh laia kan sawrkar in testing facilities neih belh dan tur ngaihtuah aia a harsatna lam hlir ala ngaihtuah leh kan mamawh ber khawl mimal hnen aṭanga dawn duh leh dawn duh loh kan nei ta hi hriatthiam harsa kan ti hle.
By: Lalrinpuii
Post a Comment