Kolasib bawrhsap Dr. H Lalthlangliana chuan Kolasib District-a inkhunghranna hmuna mi 11 te’n Covid-19 natna an vei tih hmuhchhuah a nih thu sawiin, heng mite hi Falkawna ZMC-ah tukin (June 2) atang khan enkawl an ni tawh, a ti.

Bawrhsap chuan nizana Covid19 hri kai hmuh chhuah tak mi 12 zinga mi 11-te chu Kolasib bul Thingdawla Polytechnic building leh Nursing School building-a mi an nih thu a sawi a. He’ng mite hian hri an kai tih hriat a nih veleh District thuneitute inrawnkhawm nghalin tukin khawvar hma khan ZMC-ah Ambulance hmanga phurh an ni, a ti a. He’ng mite hi naupang tak tak an la nih avangin dam taka an lo chhuah leh ngei beiseina sang tak a neih thu a sawi.

Hri kai tih hriat chhuah tak ten Rel-a an rawn chuanpui District danga mite chu an dinhmun thlithlaia lo enfiah turin District dang thuneitute an hriattir tawh thu pawh a sawi a. Thingdawl Polytechnic School leh Nursing School building te chu mipuite tlawh pawh theih loh tura ven tlat a nih thu sawiin, Thingdawl khaw chhung atanga heng Building pahnih panna kawng te pawh uluk taka ven nghal a ni, a ti.
Mizoram Covid19 Dinhmun Kimchang

Kolasib bawrhsap chuan Mizorama hnamdang tangkhang, nizan dar 6-a Bairabi Rel chawlhhmun atanga Jharkhand pana haw mi 1,365 te chu rel kawng chhiat avangin Lumding atanga lo letin, vawiin chawhma dar 11 vel khan Bairabi Rel chawlhhmun an lo thleng leh tawh, a ti a. Heng mite hi Bairabi South Branch YMA ten an lo mikhual leh dawn a, an ei leh in bakah an riahna tur te an lo ngaihtuahsak vek dawn a ni, a ti.

Inkharkhip kalpui dan tur chu a tul anga ngaihtuah zel a nih tur thu pawh Kolasib DC hian sawiin, District chhunga cheng State dang atanga lo hawte tan Kolasib-ah mahni ina inkhunghran kalpui a ni lovang, a ti a. Covid-19 dona atana Mizoram sorkarin sum a pek te chu an hman zawh vek tawh thu leh tangkhang lo hawte buaipuina leh an ei leh in atana an senso pawh a ba veka kalpui a ni, a ti. Andrew Vanlalauva PTC Kolasib PTC Kolasib

Post a Comment

Powered by Blogger.