State danga tangkhang, tunhnaia Mizorama lokir, khunghran mek zinga 12 chu Covid-19 hri an kai tih hmuhchhuah a ni.


Health Minister Dr R. Lalthangliana’n a sawi danin Covid-19 hri kaite hi natna hranpa langchhuak lo leh pangngai taka awm an ni a, 11-te hi Kolasib district a khung hran lai mek leh pakhat hi Zoram Medical College (ZMC) a rinhlelh thila awm mek a ni a, an vai hian ZMC-a Isolation Ward-ah dahluh vek an ni tawh a ti a. Hri kai 11 hi hmeichhia an ni a, mipa pakhat a awm a, 10 hi Delhi atanga rel hmanga lokir an nih laiin 2 hi Kolkata atanga lirthei a lo haw an ni. An vai hian kum 18 leh kum 40 inkar an nih avangin ngaihtuah awm lo tura ngaih an ni a ti a. 
He’ngmite nena rel chhungah emaw bus-ah emaw inhnimhnaite chu chhui chhuakin vawiin tlai lam hian an swab sample la a endik a nih dawn thu Minister chuan a sawi a. Nizana Covid-19 hri kai hmuhchhuahte hi nimin lama sample 116 endik zing amite an nih thu a sawi a ni.


Vawiina chanchinbumite a kawmnaah Health Minister chuan Mizorama lak sample 1,112 endik a nih tawh thu a sawi a, chu’ng zinga 13 chuan Covid-19 hri an vei tih hmuhchhuah a ni a, pakhat chu enkawl dam a ni tawh a ni a ti a. ZMC-a Covid-19 vei leh vei lo endikna khawl RT-PCR chu April ni 7 atanga hman tan niin tunah chuan sample 100 te pawh a hlawmin a endik theih tawh a ni a ti.

Dr R. Lalthangliana chuan Covid-19 hri vei hmuhchhuah tharte hi khunghran mek an nih avangin mipuite chu ralkhel lo leh mangang lo turin a ngen a. Dawr khar te, inhrek vakte a tul loh thu leh fimkhur reng erawh a pawimawh thu a sawi. Mizoram pawn atanga lokir thenkhatte hi Covid-19 vei tamna hmun amite an nih miau avangin vei ve an awm ngei hi mithiamte pawhin an ring sa reng niin a sawi.



engemaw zat an la awm
Minister chuan Covid-19 endikna chu lei belh thuai tum a nih thu a sawi a. Hun rei lote chhungin engemawzat neih belh a beiseiawm niin a sawi. Minister tawiawmtu Health Secretary Pu H. Lalengmawia chuan Health department chu he hripui leng hmachhawn tur hian a inring tawk niin a sawi a, Covid-19 vei mi 711 enkawlna tur a awm thu leh he hri vei za zela 15 atanga 20 bawr vel chauh hi nasa taka enkawl ngai an nih thu a sawi bawk a. Tun dinhmunah chuan Test Kit pawh an ngah tawk niin a sawi a, ZMC-ah hian ICU khum 36 a awm thu a sawi bawk a ni.

Home Minister Pu Lalchamliana chuan hmuituamna vuah leh inhlat taka mipui an awm theihna atana thupek khauh lehzuala kengkawh turin Police station tin a awmte chu squad hranpa din tura hriattir an nih thu a sawi a. Mipuite chu chiai lo tur leh thil lei khawl nghek nghek lo turin a ngen bawk a ni.

Mizoram Chief Secretary Pu Lalnunmawia Chuaungo chuan Covid-19 hri vei 12 hmuh belh avangin inkharkhip kaihhruaina tihkhauh leh zual a nih a rin loh thu a sawi.

Vawiina Health Minister-in chanchinbumite a kawmnaah he thu hi sawiin Pu Lalnunmawia chuan Home Minister hovin hemi chungchang hi la sawiho leh tur a nih thu a sawi a. Chuti chung chuan tuna inkaihhruaina an siam chu a tha tawka an hriat thu leh tangkhang lokirte zingah Covid-19 hri kai an awm pawha invenna atana khauh tawk tur ngaihtuah lawka an siam a nih thu a sawi a. Ennawn leh a nih pawhin thil danglam vak tur a awm a rin loh thu a sawi a ni.

Chief Secretary chuan state pawna tangkhang mi 6,373 chu relin an lo haw tawh niin a sawi a, tunah hian Maharashtra atanga rel a lokal mi 1,360 vel an awm thu a sawi bawk a. Mi 1,716 chuan Mizorama lokir an duh thu sorkar an hriattir tawh a, an zinga 1,000 vel chu Delhi ami an ni a ti a. Maharashtra atanga lokalte hi vawiin chawhma a Bairabi rel chawlhhmuna lo thleng tura beisei an nih laiin, Badarpur leh Lumding inkara leiminin rel kawng a tihchhiat avangin Guwahati atangin bus-in an rawn haw dawn niin a sawi a ni.

Maharashtra atanga lokirte rel chhunga tawt lutuka an inhnawh ni a sawi leh state dang mite nena dahho an nih chungchang chu Railways thuneitute an hriattir tawh thu Chief Secretary chuan a sawi a. An duh ang diak diak a thil a thlen bik loh avangin hriatthiamna a ngen a ni. ~AIR Aizawl

Post a Comment

Powered by Blogger.