Vawiin khan Goa atanga Mizoram mi leh sa tangkhang, Shramik Train hmanga lo haw, mi 734 te chuan Bairabi rel chawlhhmun an lo thleng.
Chawhma dar 10 leh minute 56 a Rel-in Bairabi rel chawlhhmun a lo thlen rual hian rel chhungah ei leh in tur pek an ni a, endikna hmun 10 kaltlang a endik vek an nih hnuah an district theuh panna tur bus ah luh tir nghal an ni a, Liason Officer te kaihhruaina hnuaiah an hawna tur district lamah theuh bus hmang hian thawn an ni. Vawiina Goa atanga lo haw te hi a tira haw tura in report zat chu 790 an ni a, Bairabi rel chawlhhmun rawn thleng zat inchhiarnaah erawh chuan mi 734 an ni a. Aizawl district mi 426, Lunglei district mi 37, Serchhip district mi 50, Kolasib district mi 61, Champhai district mi 66, Siaha district mi 11, Mamit district mi 21, Lawngtlai district mi 24, Saitual district mi 16, Khawzawl district mi 14 leh Hnahthial district mi 8 an tel a ni.
Goa atanga lo haw te hian Bairabi a tlawmngai pawlten an lo buaipuina avanga lawmthu sawi nan coach tina chuang te pawisa thawhkhawm Rs. 54,000 chu Bairabi rel chawlhhmuna tangkhang lo hawte buaipuitu tlawmngai pawl hrang hrang hnenah an hlan a. Kolasib district thuneitute ruahmanna-in District hrang hrang amite hi Liason Officer ruat bik theuh te'n an lo buaipui a, vengtu police-te nen Kolasib district ramri chin thleng an thlah vek bawk a. Rapid Antibody Test (RAT) hi an awmna tur inkhunghranna hmun theuh an thlen hunah tih tawh tura ruahman a ni a. Rel-a lo hawte sulhnu hi Sanitation team ten fimkhur tak leh tha takin an senghawi nghal zel a ni.
Heti lai hian, Mizorama hnathawka awm, inkharkhip avanga tangkhang mi 1,290 te chuan zanin tlai hian a bika ruahman rel hmangin Bairabi rel chawlhhmun atangin an chenna state theuh an pan dawn.
Vawiina Bairabi chhuahsan tur zinga tam ber chu Jharkhand state a mi te an ni a. Nimin tuk atang khan Bairabi an pan khawm a, Bairabi South Branch YMA te’n lo mikhual in, sorkar sikul leh private sikulah te thlen tir an ni a, chaw leh an mamawh dangte pe nghalin, nizan khan an riahna tur pawh Bairabi South Branch YMA hian an ngaihtuah sak a ni. Inkharkhip vanga State pawn mi Mizorama tangkhang mi 2,284 zinga mi 259 te chu an khaw lamah hruai haw an ni tawh a, tunah hian Mizorama tangkhang mi 2,025 an la awm mek ni a hriat a ni. Tuna Mizorama la tangkhang mek zingah hian Assam state chhung mi tamber a, mi 621 an ni a. Jharkhand state ami te chu a tam lamah a dawttu niin, mi 606 an la tangkhang mek.
Hnamdang Mizorama tangkang mek zinga a tam zawk hi chu Aizawl district chhunga awm mekte an ni a, district dangah pawh hnamdang tangkhang hi mi engemaw zat an awm ve bawk. Hetihlai hian Vairengte kaltlangin State pawna tangkhang Mizoram mi 2,943 an lo haw tawh.
Hmun hrang hrang atanga mahni khua theuh pan tura, sorkarin ruahmanna a siam atangin, state pawn atanga Mizoram mi leh sa lo haw engemawzat chu Vairengte kaltlang hian lirthei chihrang hrang hmangin Mizoram an lo lut a, heng mi te hi endik an nih hnuah sorkar ruahman angin ei leh in lo pek thin an ni a. Hriat theih chinah nimin May ni 31 thleng khan, state pawn atanga Vairengte kaltlanga lo haw te hi - Aizawl district mi 1,327, Lawngtlai district 334, Siaha 452, Lunglei 272, Kolasib 171, Serchhip 98, Champhai 102, Mamit 62, Saitual 44, Khawzawl 51 leh Hnahthial district 30 te an ni. (Andrew Vanlalauva, PTC, Kolasib)
[ToMZ is dedicated for archive and exposition of Mizo affairs to the rest of the world. Informations obtained are re-posted 'as-is' basis as a digitization initiative so as to make our affairs accessible to all through online surfing. Due credit is given to all author/owner except those which cannot be ascertained]
Post a Comment