POSITIVE AWMNA TARLAN NI ZEL RAWH SE

ToMZ
14 Jun 2020, Sunday, June 14, 2020 IST
March 25 ah Rev. Hruaia positive thu kan hria a, mipui kan ralkhel nasa a nih kha. ZMC ah dah nghal a niin Doctor leh thawktu dang ten theihtawp tak meuh an chhuah avangin May 9 ah dam ṭha takin a lo chhuak leh thei a nih kha. Chumi aṭanga rei ang reng tak chhung chu Covid-19 positive kan hre lo char char a, a ṭhente phei chuan Pu Zoramthanga Pathian ṭih vang te an lo ti hman bawk a. Nimahsela June 1 aṭanga vawiinni thlengin chawl loin positive kan nei chho ta char char a, kan la neih belh zel maithei bawk a ni.

Rev. Hruaia positive kan hriat tirha kan ralkhelh nasat dan kha kan la hre ṭheuh ngei ang a, amah ngei pawh a fimkhur bawk avangin tumah a kai darh lo a, a chenpui te ngei ngei pawh a kai lo kha thil lawmawm tak a ni. Tun (June 14) ah mi 112 positive kan nei tawh a, tinge kan ralkhelh dan hi kan la thlak loh le?

Coronavirus hi a nep tain mihringin an kai har ta pawh a ni hauh lo a, a tir aṭang khan mihringa a thawh dan ala nain ala pangngai reng a, nitinin thihpui an tam telh telh zawk lehnghal. Mizoram chhunga vei 112 kan awm tawh phei hi chuan ralkhelh dar vuak rik chuah chuah tawh ngei tur zawk a ni. Heng positive te ngei pawh hi an hming puanchhuah chu rem chiah lo pawh nisela an awmna hmun (Quarantine Center) tal hi chuan puanchhuah zel nisela. Thinhrikna tur pawh a awm lo a, suahsual leh khawloh vanga HIV positive te pawh an zah loh chuan hri leng lo kai palh chu zahthlak loh lutuk zawk a ni. 

Tunah hian Quarantine Center pakhat (a hmun chu sawi ta kher lo ila) a room khata mi 11 awm mekte chu pathum positive an ni tih hriat a ni a, an la chhuak nghal a, nimahsela a roommate te sample pawh lak a ni tawh nain vawiin thlenga an result an la hre lo hi an rilru a buai a, zan pawh mu thei loin an awm phah a ni. Hei hi engvangnge ni ang? Positive emaw negative pawh nisela an result hi hriat theih nise a duhawm hle mai.

Tin, MJA Siaha te thuchhuah dan in June 12 ah Siaha mi positive pakhat hmuh a nih thu DIPR tweeter update ah zing dar 7:00 ah hriat a ni a, mahse tlai lam dar 5:00 ah pawh positive chu medical Dept te pawh an awmna Quarantine center hming an hriattir lo chuan quarantine center a awm ve mek te leh Siaha mipui a ti ralkhel nasa hle bawk a, chu mai bakah positive awmna hmun hi tun darkar thleng hian disinfectant tih a la ni lo bawk tih center a awmte hnen atangin thu kan dawng bawk a. Thuneitute hian chanchin kimchang tak puang sela a duhawm hle a, khawi center-a awm nge tih te hi kan fimkhur theih zawkna atan mipui hriat ah puang chhuak sela a duhawm hle bawk.

Khawvelin a damdawi ber ala neih loh avangin heng kan positive te hian midang an kaidarh lohna atan leh an chhungte ngei pawh an kai lohna turin an hming leh awmna hmun hi mitin hriat tura puanchhuah a nih loh pawhin an awmna State leh Quarantine Center tal hi chu tarchhuah zel nisela kan fimkhurna kawng atan thil sawt tak a nih ngei a beisei awm. Kei lo positive ila ka inzep hauh lo ang a, ka chhungkhat leh ṭhiante hnenah pawh ka sawi ngei ang. Keimah vanga an positive ve ka duh dawn si lo a!

Author: - Rini Lalrinpuii
Visitor's Voice

Click to Comment

No comments:

Mizo Nula Khal

+