SANGAU NULA H LALVENMAWII, FRONTLINE DUTY LAIA BORAL TA RUANG ZALHNA THLAN CHU

Ka hriat ve phak chinah chuan Mizo hian thlan hming 2 kan nei a, pakhat chu Tianhrang thlan an ti a, a dang chu thlan naran tunlaia kan hman ang hi a ni.

H LalvenmawiiTianhrang (VANTLANG thluk ang) thlan chu mual dung zui zawnga laih a ni, a hautak angreng. Mihring pil vela laih hnuah a chhak lam an ker ta a, an phum tur mihring pil turin an ker vak mai a ni. A tung zawnga ker chhoh a nih avangin thil awlsi lo tak a ni tih hriat sa a ni. Chung tianhrang thlan laih hun lai chuan tunah thing kuangte hi hman a ni ngai lo. Ruang kha puanin an tuam mai a (khatih lai hmeichhe puan kha sin thin a nih avangin dungchhir theih khawpa sei a ni. Sin tih pawh hi thangthar chuan in hre pha leh tawh lo ang a, kan nute ang rual kha chuan puan hi an bih mang lo, an inchei nikhua chuan an sin vek thin. An puan lai tak an hnung lam kawnga dahin ding lam zawk kha an dar vei lamah an rawn bat chhuak a, chu chu vei lama tang khan a lehlam kha an rawn bat chhuak a, an ding lam banah an rawn bang thin, chu chu an incheia an tih dan tlangpui chu a ni).

Tianhrang thlan sawi laiin puan hrilh fiah a han tul leh rih a. Tianhrang thlan ker kuaka ruang an han rawlh chhoh chu, leivungin a deh loh nan, an khaukhurh leh tlat a, khaukhurh pawh ka la sawi chiang ang a.

Khaukhurh tih hi, thing tuai malte tiat dawn dawn hi an pu khawm a, kuang leh lei vung a inkhawih loh nan khan chu thing malte tiat tiat chu kuang dal nan an tung phui tlat thin. Chumi zawhah thlan an vur chauh thin a ni. Heti ang thlan an laih hun lai hi Aizawlah chuan kum 1950 hmam lam kha a ni ber ang a, thlan lai tlangvalin an duhsak zawng thlan chu an lai thuk mai a ni. Kan naupan laia an sawi thin dan chuan, “Chumi thlan chu a thuk khawp a, a mawng atangin arsi a lang thei,” te an ti thin nia. Tunah zawng hun a dang ta, ek in laihin an lai kaw tawp a, thing kuang an thlak a, an vur tawp mai a nih tak awm hi! 

[ToMZ is dedicated for archive and exposition of Mizo affairs to the rest of the world. Informations obtained are re-posted 'as-is' basis as a digitization initiative so as to make accessible to all through online surfing. Due credit is given to all author/owner except those which cannot be ascertained]

Post a comment

Powered by Blogger.