NULA DUTY NUNNA CHAN RAL NAN CM RELIEF FUND ATANGIN RS 100,000/- PE DAWN
Kiddy Vanchhawng
June 10, 2020, MSR: Nimin (9.6.2020) a Fungsihchhuah, Chhimtuipui ramri a duty laia damlo nunna chan ta, Nl. H. Lalvenmawii (18) d/o H. Kapliana, Sangau-I chu a ral nan Chief Minister's Relief Fund atangin Rs. 1,00,000 pek a ni dawn. Lawngtlai DC kaltlanga pe tura ruahmanna siam a ni.
H. Lalvenmawiin Lawngtlai district khawchhak lam, hi India leh Myanmar inkalpawhna lunber pawl, Fungsihchhuah (Saisihchhuah) a Covid-19 duty turin a in volunteer a. Heta a duty lai hian dam lovin Sangau lamah hruai haw a ni a, a thisen test anih hnu in Malaria PV hmuh niin Sangau damdawiinah enkawl a ni a. Tlema a zia deuh hnu-a damdawiin atang hian a chhuak zawk a, June 8 khan Sangau PHC-ah admit leh a ni a, a tuk June ni 9 chawhnu lam dar 1:00 khan Sangau damdawiinah hian a boral ta a ni.
H. Lalvenmawii boral thu hian Zoram khawvel a dengchhuah hneh hle a; mi te lainat leh chawimawi a hlawh hle a. Vawiin chawhnu lam dar 1 khan an chenna inah pasaltha chawimawina famkim nen ropui takin a ruang hi a huntawp hmanpui anih hnu-ah Sangau-I thlanmual a amah chawimawina atan Lal leh miropui bik te tana an siam thin Thlanpuiah vuiliam a nita a ni.
Hetihlai hian Central YLA chuan ram leh hnam tana an member duhawm tak boral chu pawi a tiin CYLA leh Lawngtlai district tan pawh channa nasa tak a ni a ti a, vawiina a vuina hun hmang tur hian CYLA hruaitute pawh Sangau-ah kalin a huntawp hi an han hmanpui bakah Lawngtlai district chhunga YLA branch tin ten YLA flag a ngul chanve-ah zarin amah vuina hun hman anih lai hian mahni branch theuhah sunna hun hi an hmang a ni.
Tin, vawinn a Lawngtlai DC Conference Hall a Lawngtlai DLTF thukhawm pawhin Covid-19 duty tura an volunteer nula boral ta zahna leh sunna hun hi an hmang ve bawk.
Post a Comment