Mizoram dung leh vanga mipuite ‘Leng Lengin’ tia lo awi tlei thintu Vanlalzami kha tunah chuan kum lamah te a lo upa ve tan tawh a, solo (malzai) lam chu a chawlhsan titih tawh a, a hnu hma tam tak erawhin hriat a hlawh reng tawh ang. Pu R.Thanngura leh Pi ZD Dengchhungi te fa pasarih zinga a mi lai tak a ni a, tunah chuan Chhungpuinu niin, a pasal nen fanu leh fapa an nei a, vanduai thlak takin an fapa hian a naupan laiin a boral san. Tunah hian chhung kuain Rahsiveng, Lungleiah an khaw sa a, a mah hi PWD-ah a thawk.
Radio-ah hla 60 chuang a record tawh a, Album chi hrang hrang 6 (cassettee-in) a siam tawh a, a nau Lalnunziri nen pakhat an siam dun bawk a, tunlaia zaithiamte mipui hriat hlawh tura an in phochhuahna ber Music video hi Kum 1986 -ah a lo siam daih tawh a, 18 vel music video hi a nei a ni.
Eighties chho a Mizorama Studio lar ber Otto Recording Studio Aizawlah kum 1984 khan cassettee album siam turin a kal a, Studio neitupa hian a tirah chuan a lo welcome vak lo chungin hla hi a record a, a hla khung hote hi an han tichhuak a, hralh a tlak chhoh tak em avangin hla dang record a album siam turin Studio lam hian an sawm chhunzawm ta zel a ni.
A album siam hmasak ber hi cassettee pakhat Rs. 3/- zela hralhchhuakin, cheng sing tel man hralhchhuah a ni a, heta tang hian a lar dan tur chu kan chhut thiam mai awm e.
Vanlalzami’n album a tihchhuahte hi chi hrang hrang an ni a, Hla Lenglawng, Christmas hla, Pathian fak hla leh Khawhar hlate an ni a, hei vang hian mi chi hrang hrang fans a neih phah a tih theih awm e.
A hlasak zingah a lar pui em em chu ‘Leng Lengin’ tih kha a ni a, he hla hi Roliana Ralte phuah a ni a, a hla thu a tha a, nun a khawih a, a thluk a nalh a, a satuin a sa nalh a, Mizoram a deng chhuak hneh hle. He hla a larpui em avang hian mi tam takin, ‘Leng Lengi’ an tih phah a, tun thleng hian hetianga la kotu hi tam tak an la awm.
Kum 1983 khan Lunglei District Jail-a tangte chuan Vanlalzami zai ngaihthlak an duh a, ‘Jail-ah a rawn zai loh chuan chaw kan nghei dawn’ an ti mauh mai a, Jail tang rualin hunger strike an neih mai a hlauhawm ta a, thuneituten zai turin an sawm angin a zai sak.
Mizorama PC Ministry a din lai khan, Mizoram chhimlamah Sorkarin hma thar lakna a ngah a, Lei hawn, Kawng hawn, Hall hawn, Electric hawn tihtea programme siam a tam a, khatih laia Finance Minister Pu Lalhmingthanga hnung zuiin programme hrang hrangah a zai nasa hle a, hemi rual hian Roliana Ralte nen Concert siam dunin Mizoram chhimlam khaw hrang hrangah hun an hmang nasa hle bawk a ni.
Mizoram chhimlamah chauh ni lovin Mizoram chhung hmun hrang hrangah zai tura sawmna a hmuh angin a kal a, Mizoram pawn lamah pawh vawi enge maw zat zaiin a tei chhuak tawh bawk a, heng hunlai hian a mah ngaihsangtu nu leh pa tam takte chuan an fate hmingah a hming ang hi an phuah fur mai a ni.
Mizoram Governor AR Kohli khan kum 1981-ah khatih laia Hollow guitar man to leh tha tak mai, mi nazawngin an neih phak loh Hobner a pe a, Governor hian a perh thiam leh thiam loh a zawt a, a ni chuan zaiin a in perh rem a, Governor hian ngaihnawm a ti hle.
Lungleia Chief Minister Brig T. Sailo alo kal tumin DC’s Indoor Stadium-ah Padma Shri J. Buana hla ‘Pi Pu Nunmawi Chul Lo Se’ tih hla a sa a, Pu J. Buana lawm lutuk chuan, ‘ Kan dawr a mi hi i duh ber thlang rawh’ a ti hial a ni. Hetih lai hian Pu J. Buana dawr JB Store hi Lungleia dawr lian leh bungkaw changkang tak tak zawrhna ani.
India sorkar leh MNF in inremna thutlung an sign a, Mizo tana rammu Hnam Sipaite an lo chhuak a, Lunglei District-ah mihring punkhawm tam ber tum a thleng a, hetah hian zaia sawm a nih angin a zai a, F. Lalthanliana hlaphuah ‘Zoram Nuam I Siam Ang Aw’ tih hla a sa a, he hla hi mipui hmaa tumahin an la sak chhuah loh ruah \ham loh a ni a, mipui tam tak hmaah sain hlut a hlawh hle a ni.
Vanlalzami te chhungkua hi rimawi leh zai ngaina tak mai an ni a, Gospel singer Pensy B. Lalthangliani hi a nu lam atanga a cousin fa a ni a, Hmingpuia (Albatross Band) pawh a cousin fa bawk a ni.
Kum 2014-ah BKHP Group JJ (Jehova Jire) an din a, Fakna hla sain hmun hrang hrangah an zai. Solo lamah chuan a kal meuh ta lova, kumina Missionary Day-ah khan Kohhran mipuite hmaah zaiin a in lan a, hei hi a zai hnuhnung ber a ni ta rih.
Kum tam liam tawh mahsela, a zai ngaitute hian an la theih nghilh lova, tun thleng hian an la rawn zawng chhuak a, thlalak puitu a la nei thei zel a ni.
Post a Comment