Kum sawm pali zet a lo liam ve ta reng mai, kha mi ni kha tiin ka sawi dawn nge, kha mi kum kha tiin ka sawi zawk dawn? Kum 2001, Pawlkut thla tir, tahrik ni 15 zan dar 9:30 vela i sakhmel ka hmuh hmasak ber tum kha tu te emaw hla thu-in "Nang ka tawn ni che khan” an tih ang ngawt hi chu a ni thei ngangin ka hre silo.

Khami nia Mizopa hun bi chhiar dan chuan kha zanah khan kei chuan ka tawng ngei mai che. Chawp leh chilh a ka thinlung fan chhuak vek tu, tun thlenga ka theihnghilh tawh loh ka chhing mitthla a, thlalak tha ber ang mai a fiah fai fel tak maia la cham zui reng, hlim taka Kristian Hlabu leh KTP General Conference hlabu, hla sak tur a zir zela l keu thlak vel sek mai leh, thalai rual kal khawmte boruak ti zang khai tura, mi thenkhat lemchan tawi buatsaih leh fiamthu thawh a hun hmang tu te i thut hmun atanga za fahrana i lo nuih vel hmel te mawlh mai kha chhing mitthla-ah a cham reng a, khami zan kha chhuihthangvala hian a theihnghilh phal dawn lova, a thinlung phekah hian a ziak tlat tawh dawn a ni.

A hming chuan tlangval tia hming an vuah zingah chuan ka tel ve ngei mai. Ka kum in a phak tawh miau a, chu a chhapah ka taksa pawhin a phu ve tawh hrim hrim bawk. Tlangval rau rau hi kan nungchang leh hringnun hman dan erawh a in ang teh chiam lo. Tlangval thenkhat chu hmeichhe mi tak “lerh” ti hiala sawi an awm bawk. Tlangval thenkhat erawh nula ngaihsak ve tak, amaherawh chu, hmeichhe mizia man thiam silo, hmeichhe lawm zawng leh rilrem zawng a inher rem leh thiam si lo, hmeichhia te’n an ngei rawn tak hlauh tak te pawh an awm ve chawk. Heng zingah hian eng chi ber nge ka nih ve tih hi hriatthiam a har ka ti thei teh a sin.



Tlangval, hmelchhe fel leh kawm nuam tak bula awm nuam ti ve thei tak, mahse, hmeichhe tel miah lo pawha awm thei tak, hmeichia ngaia lung lenga kur ngawih ngawih lo chi niin ka inhria. Ka thian te pawhin chutiang mi chu niin min sawi ve thin bawk. Tin, zirlai ka ni a, lehkhathiam thei filawr tak ka ni lo tih ka in hre chiang bawk a, ka zirna lam tluang ti bahlah thei tur chi nia ka ngaih hmeichiat-mipatna lam leh huau-huau lam chi reng reng boruak atanga inthiar fihlim tlat ka duh thinna chuan college leh university ka zawh thlengin hmeichia ngaihzawng anga han khalh fal ve deuh chu sawi loh, hmeichhia zingah thian hrim hrim pawh ka nei tlem hle.

Zu leh sa leh huau huau lam boruak tanga inthiarfihlim chu ka tan chuan thil harsa tehchiam niah ka ngai lova. Tin, nulat tlangvalna lamtluang pawh ka zawh thui lovin thlang Sappui tawng han hawh lawk ila, experience ka nei tam lem lo hle. Tin, insum harsa tur khawpin ‘A pawi chin’ huang la dai pawp lo, ka ni ber awm e, chu tak chu thil chhuanawm tak chu a ni ve ngei ang. Tunlai thalai tamtak buaina leh harsatna tawh mek atanga min ti fihlimtu a ni miau mai si a.

Awle, Zokhaw biakIn tlawm tak, lian tehchiam lo a chung rangva, a bang dap bul maia biakIn ang chiah thova sak biakIn aia tlema te deuh, Sande Sikul Hall-a a thu lai ka va hmuh khan ani chuan min rawn hmu ve hauh lova. mit tla lek lek a tukverh kawngka inhawng hiau mai bul chiah a bahsam thlah sang chunga fellowship kaihruaitu te thutna lam en rana a thu vei hnap mai hmel ka thlir ngawih ngawih lai khan a ni chuan min thlir ve hauh silo. Khami zan, pastor bial KTP conference tawp ber Inkhawm ban fellowship programme zuk chhim ve tuma kal, hall chhunga thutna a awm tawh loh avanga hall kawta ding khawtlai mai mai khan kum 29 chuang zet he khawvela a zin kawng a zawh mek a vawite khat mah a la hmuh ngai loh a hmu ta mai chu mak a ti a, hmuhnawm a ti a, thlirnin har a ti a, hriatthiam har a ti ngawih ngawih lo thei lo!

Tute emaw hlathu-in 'Kan in tawn ni khan’ ti a an sawi hi khami zana ainawn par iang ‘Chhingkhual lenmawii' tan kha chuan a dik thei lo tlat mai! Kei chuan ka tawng che a, nang erawh chuan mi tawng ve silo. Kei chuan i sakhmel mawi thlir ninawm loh tak mai kha khaw dang hawi thei lo lekin ka thlir vawng vawng a, nang erawh chuan khami zan, kha mi darkar ah khan ka awm ve tih pawh i hre silo. Kha mi zan khan kei chuan ka tawng ngei mai che. I hmel ka hmuh tirh phat khan kan nun hi i sawi danglam dawrh a ni ber mai . Ka thinlung chhungril ber thlengin i rawn su hawng nghal rawp mai a, tichuan ka thinlung leh ngaihtuahna te chu i nei ta vek a, tawngkam khat pawh seng lovin min thunun ta nghal a, ka thinlung chu i ta a lo ni ta. Ka thinlung atang hian nangman min chhuah san ta anih chuan thu hran a ni, kei chuan hnawhchhuah ngaihna che ka hre lova, ka thinlung lalnu chu ka hnawtchhuak phal bawk lovang.

Kum sawm pali lai a lo vei ta, kha thinlung lalnu kha chhingmitthla ah kum 2001 tahrik ni 15 zan dar 9:30 a Phuldungsei khua-a ka hmuh ang chiaha la cham zui reng kha. Ka hmuh hmaasak ber zan khan khawi lam mi nge anih a, khawilam khaw chhuak nge a nih te leh a sakhming thlenga zawhna hun a awm thei si lo. Kei lah chu mikhual tlangval ve tho ka ni bawk si a. Ka sawi tawh ang khan nula mi tak ka ni hauhlo ka tih tawh kha. Tu te emaw chu ni ila fellowship an tin darh chiah khan bekbawrhna hun ka zawng chuak thiam ngei ang, mahse, ka thiam ve silo. Chu nula chu fellowship an tin darh lai vel tak, mahni riahrun lam pana an hawn darh sung sung lai chuan ka hloh ta daih mai a, chuta tang chuan kha chhingkhual lanu kha tawn leh ni ka nei ngai ta lo a ni.

Chumi zan fellowship chu zai a nuam bawk a, zan dar 12:30 velah daih kan tin nghe nghe a. Hemi chhung zawng hian a rei leh rei loh pawh thlu lovin Chhingkhual Lenmawii thlir theih rengna turah, a tira ka thuthmun remnaah ngar ngar chuan ka thu tluan chhuak zak a, kha nula kha mi rilru tluang tak, ti zawk zawk lo tak a ni ngei ang. A bula nula dang thu ve te ang khan a hawi kual ve vak vak lova, a bula nula dang anga hawkdak ve deuh chu ni se, Sande Sikul Hall-pawn lama hmuhnawm thlir a lo thlirtu, amah pawh biak chak em em mai chu mi rawn hmu ve ang a, ka rilru ang chiah lo pu ve hlauhin, ka lam pawh a rawn hawi ve zauh zauh mai thei asin. Mahse, kha nula hawkdak lo tak mai kha ka lam a rawn hawi lo . A awm ve tho e, Hall pawn lam thim chin leh chin lovah thuthmun ka rem tlat a lawm!!!

A sakhming takngial pawh ka zawt hman silo. Tlangval zei tak, remhre tak chu ni ila, a bula nula thu ve, zun ram thiara rawn chhuak sekte kha lo zawh nachang ka hre tur hi a nia, amaherawh chu ka ka inthiam ve tho mai, a sakhmel mawi tak ka thlir lai kher kher chuan khawvel chhunga thil dang reng reng hi a bo vek ni ber hian ka hria a, cinema film hmuhnawm tak thlirin ka thlir a , ka rilru zawng zawng amah ah khan a kal vek a, kum puitling rilru fimtak nei ve tham tawh chu naupang chhe rilru no leh pangchang tak ang dinhmunah ka ka tla thla dawrh a, ka rilru ngaihtuahna chu ka thlifim thei bik lo. Fellowship ban veleh a thlen inah ka zui lut ve nghal ang ti lam hawia ruahmanna lo siam lawk nachang ka hre bawk silo.

Khami zan felowship-na hmun atanga ka riahrun lam pana ka haw ta kha ka rilru leh ngaihtuahna chu a vak kual zak zak a ni ber mai.

Khami zan mutna hun rei tawhlo tak maiah khan darkar khat vel chang chang ka chhing sek awm e. Tawnmawng lamah ka tawng zui ta bawk si lo.

A tuk khua a lo var a, Reiek tlang dung mawi tak mai rawn chhun eng hmasain, Turnipui chuan a engmawi tak mai chu a rawn herchhuahpui leh ta. Phuldungsei leh a chhehvel ramte chu nidang zawng aiin a mawi zual ta emaw tih mai tur hi a ni a. Khawthlang lam han thlir ila, Bangladesh Tuikhuah tia an sawi thin chu tlangram karah chuan tiauchhum ang mai hian a var phei zui mai bawk a, Dai bul vela hramthiam va tin zai vawr te leh partin thangvul chiai maite chuan ka lunglen a ti zual hle mai.

Hmeichhe tellova tlei ve thei tak ni a ka thiante ngeiin min lo sawi ve thinna dinhmun chu ka humhim zo ta lo. Hmeichhia tunge a nih? Khawilam khua nghe a nih? Engang chhungkua atanga rawn zi chhuak nge a nih? tih pawh ka la hriatchian loh, a sakhming takngail pawh ka la zawhchhuah hman loh , a sakhming pawh ka hriat loh zuna uaiin zo dawl zawrin ka zawr a ni ber mai.

A sakhming pawh ka hriatloh kha, nu leh pa unau laina hnaite hnenah han sawi darh a, han in hnempui chi lah a ni si lo. Phuldungsei khua-ah lah chuan mikhual tlangval ve tho ka nih miau avangin, tlangnel taka a sakhmingpawh ka hriat loh nula han zawn kual vel chu a rem si lo. Tin, han zawn ngaihna lam ka hre bawk si lo. Tichuan, Phuldungsei Medical quarters pakhat, Phuldungsei Damdawi Ina (PHC), Pharmacist hna thawk, ka u chiah, C Laltharzuala quarters luah mek chhunga tingtang hlui tawh tak, a hrui te ber (no.1) awm tawh lo chu la chhuakin he hla hi ka sual chhuak ta ngawt mai a ni e.


A SAKHMING PAWH KA HRIAT LOH KHA

Satu: Lalngengpuii Tochhawng
Phuahtu: C. Laláš­hazuala
Music arrangement: Chhuantea, Hauhnar Recording Studio,
Chanmari, Aizawl.

1. A Sakhming pawh ka hriat loh kha.
Han dawnin lunglam ka vai.
Min dawn ve reng hian a mawi si lo,
Mual zapui kardanah hian.
Heihi maw chhingkhual ‘D’ zun
Ngaia tlai nilena uai chu.


A sakhming pawh ka hriat loh kha,
Thinlai ah aiang a cham;
Tawn lehni herchhuak leh ang maw,
Chhaktianga’n a zing riai e;
Lenna tlang zo dum dur nen.


2. Duhthu aiang han sam ila,
Thuva len thiam dung thulin.
Fan ka nuam e tlang liai luai,
Tleitir len mawii lenna.
Engtin min lo chhang ang maw,
Runin chhung va lawi ila.


3. Run hmun lendun rel ve in,
Chung khuanun min tuah rem se;
Chutin hlimten lengdun in,
Damlai pialral dungthulin;
Nang vanga duhaisam hian,
Chin lem reng ka nei si lo.

~C. Lalthazuala

Post a comment

Powered by Blogger.