India rawn lovin Bangladesh in Covid19 damdawi enchhin phalna China a pe
Kan hawvel hun tawn mek hi hun danglam leh khirh tak a ni a. Ralthuam thra pui pui aiin faskmask te, personal protective equipment (PPE) leh hand-sanitizer te chu kan invenhimna a ni rih a. Kawng lehlamah chuan a tha viau mai. Khawvel mihring te hian, kan mihring puite nunna laksakna turin ralthuam ringawt kan buaipui a. Chaw ei tur nei lo riltam tam tak awm mahse nuclear ralthuam leh missile chi hrang hrang siam kan thulh phah reng reng lo.
Mihring te hian, nun kawng dik kan zawh theih nan, Covid19 hi tirko tha tak ni thei hlauh se, a duhawm ngawt mai.
"Mahse" ti a ngai leh thin. China hian engkim hi chawhchawrawi vek a tum ni hian a hriat a. Covid19 damdawi hi China in a siam hlawhtlin a ni vaih chuan, a hnuaia kûn duh loh ram te hi kan cháklo khawp ang; a thlawnin min pe der dawn si lova! Pu Jingping, kan ti kan ti tawh mai ang.
Tunlai khawvelin a mamawh ber chu Covid19 damdawi a ni. Nitin nuai tel hri kai thar an awm reng a. A lo chhuahna China erawh hri hlauhawm laka a zalen tawh hle a, Covid19 chu ram dang vethlem nan a hmang ta niin a lang.
India ram thenawm leh a thiantha anga ngaih Bangladesh chuan Covid19 damdawi enchhin (human trial) turin China phalna a pe leh ta rup mai. Bangladesh hian India a rawn lova, China hian engtin nge a hmin theih tih hriat ni lo mahse, Bangladesh hian hlawkna a hmuh ngei a rinawm.
Covid19 damdawi a thawk thum enchhina tur hi July ni 19 khan China company pakhat Sinovac Biotech Company chu Bangladesh Medical Research Council (BMRC) hian phalna a pe a, India sawrkar chuan July ni 24 khan a hre ve chauh a ni. Kasmir ramri ven a ngai, Pakistan dan a ngai, Nepal-in a lo vauh ve chhen bawk nen, hmalakna tur a tam hle. India palaite hian ram dang nenna inlaichinna thar hi, an siam thiam ve thlawt lo niin a ngaih theih.
Indian company Bharat Biotech, National Institute of Virology (NIV) leh Indian Council of Medical Research (ICMR) te tangkawpa an siam Covid19 damdawi Covaxin chu India ram damdawi in hrang hrangah enchhin mek niin, a hlawhtling zel nia hriat a ni.
India leh Bangladesh hian ramri thui tak an intawm a. Hetiang hmalakna lianthamah India a hriat tir ngei tura ngaih a ni laia, a ruka a lo che mai hi, India sawrkar chuan a lawm lo hle.
Chinese medical team 10 te chuan Bangladesh an thleng tawh a. Sawrkar dan protocol bawhchhiain, Bangladesh foreign minister Dr. AK Abdul Momen chuan airport ah a lo hmuak ngat a ni.
Indian High commissioner to Bangladesh, Riva Das Ganguly chuan Bangladesh foreign minister Dr. Momen hi hmu nghalin, India leh Bangladesh thawhdun dan tur a sawipui a. Mahse, Chinese palai Li Jiming aiin a che tlai deuh niin a lang.
India ram hi ramdang nenna thawhhona tha zawk a neih theihnan ambassador te hi an pawimawh ber a. India palai te hian an hna an tlin tawk loh deuh niin a lang.
China palaite erawh an fiak a tha hle thung a, an awmna ram minister te ina an lenglut tam hle. Hei vang hian China lamah ram tam tak an thle tawh nge nge.
China sawrkar chanchinbu the Global Times in a tarlan danin, Brazil leh UAE pawhin Covid19 vaccine trial (enchhinna) neih an remti tawh bawk a. Ram dang pawhin phalna an pek zel a rinawm ta hle. India ve thung chuan a ram chhunga enchhin tur pawhin hma a la chak lo hle thung a. A sawia sawi bak hi kan thiam tak tak lo a ni ber e.
Bangladesh khawpui Dhaka-a awm International Centre for Diarrheal Disease Research chuan Covid19 damdawi enchhinna tur hi engkim a peihfel tawh a. Hlawhtling taka kalpui an beisei thu tarlan a ni.
Bangladesh Medical Research Council (BMRC) director Dr. Jahan chuan, Sinovac siam covid19 damdawi hi ngun taka an bihchian thu sawiin, a hlawhtling ngei a ring.
Hetih lai hian China sipaite People's Liberation Army hman turin Sinovac siam covid19 damdawi hi pawm a ni tawh a, mipui hman tur chuan trial hi la neih chho zel tura ngaih a ni. Enchhinna thawh thumna hi a thlawhtlin chuan, mipui hman theih tura pawm thuai a ni a rinawm.
Post a Comment