Khawvela entertainment industry lian tak pakhat Disney chuan Covid19 vangin harsatna tam tak an tawh thu sawiin, film liantham tak tak an beisei angin an tichhuak hman dawn loh thu an tarlang.

Film puithu leh senso tam tak tak, chhuah mai theiha awm tawhte pawh, Covid19 vangin an chhuah ngam rih lova. Tun ang boruaka chuan sum tam tak an hloh dawn nia a lan tak avangin, mipui nghahhlel em em film chhuah hun tur chu tikhawtlai a nih thu Disney chuan a puang.

Heng film tikhawtlai zingah hian Avatar-2, Mulan leh Star Wars te pawh telin, nghakhlel lo thlir mipui a barakhai takzet a ni.



Mulan film chhuah hun tur hi vawi hnih lai sawn hlat a lo ni tawh a. A vawi thum nan August ni 21 ah sawn a ni leh ta a ni. Tun boruok ang zela hun a kal a nih chuan August ni 21 pawh hi rin ngam a har ta hle.

Star Wars leh Avatar-2 hi kum 2021 kum tawp lamah sawn hlat niin, beisei taka lo thlirtu Avatar-1 ngainatu te tan chuan phurna a tlahniam phah ngei a rinawm a. Mahse, film producer te hian sum an hloh nasat dawn em avangin, an chhuah luih ngam dawn lo.

Walt Disney Studios spokesperson chuan, "kum bul atangin hun khirh tak kan hmachhawn nghal a. Hmachhawp kan duan lawk te zawng zawng a kal tluang hleih theih ta si lova, duh angin kan che theih ta meuh loh a ni. Theihtawp kan chhuah reng a, mipui en theihin chhuah thuai kan tum," tiin a sawi

Tuna ruahmanna ang chuan Avatar film zawmna hmasaber (sequel) hi December 2022 velah release beisei a ni. 

Avatar director, screenwriter leh co-producer ni bawk James Cameron chuan a twitter kaltlangin film tikhawtlai thu hi a puang ve bawk a. Los Angeles-a an film siamna hmunpui hun engemaw chen khar tawh chu, hawn thuai a beisei thu a sawi bawk.

Walt Disney hian April thla atang khan film tam tak an lo postponed (thulh) tawh a. Entertainment khawvel pawh Covid19 vang hian an talbuai ve hle a ni.

Avatar-1 (2009) siam nan khan US dollar 237 million zet hman ral a ni a. USD 2.76 billion vel sum an lalut hem mai, turu tak a ni. Avatar-2 siamna tura sum ruahman (budget) chu USD 100 Crores (1 Billion) vel lai a tling a. Avatar-1 kha a khum ngei ang. 

Post a comment

Powered by Blogger.