Kan hmaah engnge awm?
KAN ZAWLNEITE ATANGIN
David Sailo; 5th July

Mizo Zawlneite hrillawknaSunday a ni bawk a kan Zawlnei rintlak bera ngaih te, Zawlnei Saikhuma leh Pastor Chhawna ten Hrillawknaa an lo hmuh, hun harsa kan hmabaka awm an sawite tarlang teh ang.

LIRNGHING - Pastor Chhâwna
"Chutih lai tak chuan 'In ram en rawh' tih hi ka thinlungah a lut a. Ka han en a, engmah ka hmu lova, rei vak lovah chuan palian em em mai hi a lo bungbu vuah mai a, a han ding ngil a, thingler hian a phak lova. "Zoram, i tuartur lirpui a lo nghing dawn" tiin a au a. Tichuan chhum dum hi a lo hniam ruai ruai a, kan ramah chuan lir a nghing ta chiam mai a. Kan ram mipui mangang chuan mahni khua lo kan pan mur mur mai a, a lo nghing zual a, Rorel maichâm a chawl thuap mai a, riltamin kan vak nuai nuai mai a."

CHINA RÂL - Zawlnei Saikhuma :
“Khawchhak atangin ‘Hnam kawlh’ an lo kal ang a, in ui leh âr, ei theih thil zawng zawng an ei buan buan ang! Sàkhàw nei lo an nih avàngin engmah pawisàk an nei lo vang a, in hmeichhiate an pâwngsual mai mai dâwn a ni. Nimahsela, Lalpa-a innghat tlàtte chuan lo hlau suh u, an tipawi lo vang che u, kan ram thian faitute an ni e,”
(Hnamkawlh a tih hi China tiin a sawi lang)

Pastor Chhâwna :
“He hunah hian kan ram chuan hmai fel tak, hmêl lî a nei tawh ang. Khawthlang diar khim leh khaw chhak diar khim hnuaia’n kan ram a lùt dâwn ngei a, chu miah chuan kan ram chu hmèl fel lî-ah pûin a tàl chhuak dâwn tih ka nghàk reng a ni. Zoram, I ke chu Lalpa chungah nghat tlat rawh.”

Pu Chawngkhupa :
“Ngawi teh u, nizàn chu ka mumang niin ka hria, ṭhenkhat chuan ‘Inlàrna’ an ti ang. Khawchhak lam aṭang khian ‘Zâwng Hmai sen’ hi lei vàng dàpin anlo chhuk thla chiam mai a, an vir èm èm a, eitùr rèng rèng hi an ei duak duak mai a, ka kuta ei tùr ka ken pawh chu min dîl zèl mai a"

TLIPNA -
Bible pawhin lir a nghin tur thu a sawi a, puansak kan ngailo ti pawl a awm theih a, mahse Mizoram tan bika lirnghin dan tura kan hmabak te an tarlang thung. China râl lo len tur hi an sawi deuh fur bawk a ni.

Zawlneia kan ngaih leh Zawlnei inti kan awm thei a, Pastor Chhâwna leh Zawlnei Saikhuma te hrillawkna hi a hunlai chuan awihawm loh tak, nuihzatthlak zawk hial tam tak a awm a, thlengdik tawh a awm nual a, lo la thleng tur intintuah meka ngaih theih pawh a awmin a lang. Kan ngaihdan te sawi ho ang u hmiang.

Post a comment

Powered by Blogger.