July 6,2020 : Mizo ten Ukil tia kan hriatlar, Advocate zinga langsar ber pawl Pu K.L. Liana, MJS chu kum 20 dawn cancer natna avanga enkawl a nih hnuah vawiin chawhnu dar 3 (July ni7) khan Tuikual North, Aizawl-a a chenna In-ah a boral.
Kum 67 mi Pu KL Liana hi District judge cadre, selection grade niin, December ni 31, 2019 khan presiding officer, Motor Accident Claim Tribunal (MACT) niin a hna atangin a chawl a ni.
KL. LIANA CHANCHIN TAWI: Pu KL. Liana hi Pa kawm nuam tak rilru zau tak, fiamthu duhtak, chapo lo tak, dikna duhmi, thamna la ngailo,eiru lo, tupawh an zawlpui anga kawm thei vek, michhia an nih avanga hmusit ngailo, Mizopa diktak tlawmgaihna ngah tak a ni a. A nni anga mi dik, Pathian trih hi kan Zoram hian amamawh a ni, ti ila kan sawisual awm love. Zoram khawvela dikna ngainatu, amah ngaisangtu tamtak a nei tih chu kan hriat sa mah ni se, sawi lan hrim hrim a tha awm e.
Engvanga lar leh miten engvangin nge an ngaihsan? kan tih chuan, dikna a duh, a huaisen a, Pathian a trih hle. A taka Pathian thu nunpuitu hi tuman kan hailo.
Pu KL. Liana hi March 1, 1960 khan Pu Lalhela leh Pi Lalchhungi te in karah Sumsuih khua ah alo piang a. Unau mipa 2 niin farnu pakhat annei thung a ni. Zirna lamah nise tumruh taka zirmi a nih angin, lehkhathiamthei tak a rawn ni chho zel a, rilru chak tak, leh rilru zau tak, pa fiamthu duh ve tak, mahni ngei pawh na deuh deuh a infiama insawisa ngam chi, fiamthu duh deuh hi a ni ve tlat a. Pa biak nuam tak leh kawm nuam tak a ni. LLB a zir zova,megistrate te aia sang zawk a ni chung hian a chapo ngai lova, pa rawntlak, mi dik, thamna la duhlo tia hriat a ni thrin. Eiru ngailo anih vangin mite ngaihsan a hlawh em em a, a office banga 'Rorelna dik chu luipui angin luang rawh se' tia a tar te hi a inhmeh bik hle thin. Dikna a duh vangin Zoram mipuiin Pu KL Liana hi kan ngaisang a ni. A chhan chu, a nundan kan hai lova, a taka nunpuitu anih vang hian mite nunah nasa takin thu a sawi ani. Hna sang tak a thawk chung hian a chapo lo bawk a, hei vang rigawt pawh hian ngaihsan tham chu a tling ve hrim hrim bawk.
A lungdumtu Nula J. Vanlalruati nen intawgin, kum 1981 khan kohhran dan thiaghlimin 'tia m tlat e' tiin an inneih a. A nupui, fapa 3 leh fanu pakhat a kalsan a. A chhungte hi tunah hian Tuikual North, Aizawl ah an cheng mek a ni. Hna zahawm tak, sum tam tak hailut thei dinhmunah ding reng siin a rethei a. A nun simple tak hian mite thinlungah thu a sawi a, zoram dung leh vangah Pu KL Liana hrelo kan awm kher lovang.
Chanchinbu hrang hrangah Dan leh hrai chungchang Pu KL Liana thuziak kan hmu thin a. Khang te kha bengvarna mai bakah Mizo literature tana hmasawnna a ni bawk a. A thuziakte kha a ngaihnawm thin hle. Beng ti var theih, ngaihnawm tel bawk thuziak min hlui thintu kan chan ta hi, Mizo Literature khawvel pawhin a sun hle dawn a ni.
Zoram tana Pa huaisen, mirethei te tana ding thin, dikna duh mi kan chan ta mai hi a uihawm hle a, Zoram tan channa nasa tak a tling a ni.
Mizo rohlu, midik tlemte kan neih zing a mi Pu KL Liana Kan ui takzet ani tih lantîr na'n a chanchin leh thlaka kan hmuh theih ang ang kan han post ve a ni e.
"Pu KL, Mizo kan mang hma chu i hming leh i sulhnu hi theihghilh a ni ngailo ang"
PU KL. LIANA HNENA LEHKHATHAWN ( True Story )
By Zothana Khiangte
To,
KL Liana
Ka pu,
Kum 15 liam ta khan, tlangval pakhat cher dawldang zet, thisen nei lo tih hriat ngawih biang thawp ki van mai chuan i office-ah Law Journal a rawn lam a. He tlangval hi engdang vang maha cher leh dawldang a ni lo, ruihhlo-in a taksaah bu a khuar ngheh tawh vang leh, ruihtheihthil reng reng ruih duh loh a neih loh vang a ni. Tumkhat chu he tlangval hian a nun a nin avangin a ruihhlo kawllai zawng zawng chu a nunna tihtawpnan hman tumin a thisenah a chiu lut a, nikhaw hre lova inthiarna kawta a let reng chu mi pakhat hian hmuin, harsa takin a chhan chhuak leh ta a ni. Tumkhat leh chu, chu tlangval chu veng pakhat YMA in a ruihhlo kawl an mansak a, a mit tuam sakin a hnung an khirh a, electric wire thlur thum hrual fipin a ke hnuaia wire thla lang kawkalh duk vek khawpin an hlap a, an hlap zawh chuan khawsikin a tlun nghal a nih kha. Kha tlangval an vuak lai khan nang chu awm la, i chhan loh vek pawhin zaidam tak leh duhsak takin i zilhhau ka ring.
Hun inher zelin kum 10 liam tawhah khan Central Jail-a Camp Court in neih tumin he tlangval nen hian in intawng leh a, a jail tan chhan i zawh hnuah, cheng 25 man vel damdawi man sak in, sorkar suma lei, buhfai cheng tam tak man tanin chhungah a lo eiral tawh a ni tih i hriat khan lap/hlawk lo i ti pawh a ni mahna, kha tlangval kha tanin atangin i chhuah zalen ta a nih kha. Kha mi tuma kha tlangval lawm zia kha hriatthiampui kher lo mahla, engtikah emaw chuan kut thinga chibai buk che a lawmthu hrilh che a, midang tana malsawmna i nih zelna turin duhsakna thilpek hlan che hi a tum ngar ngar thin asin. Mahse maw ka pu, khi rilru a put lai ngei pawh kian he tlangval hian kawng dang zawh turin kalkawng a hre chuang lova, a sual ngaiin a sual chhunzawm zel a, a hriat chian em em chu, a thih vaih chuan a chan tur chu hremhmun tih hi a ni.
Tichuan nun beidawng bawkin camping-ah mahni duhthu ngeiin a tum lina atan a lut leh a, ka pu, kum tam tak liam ta taa jail tang i chhuah kha vanneih thlak takin a piangthar asin. Kha tlangval khan vengkhat KTP nula fel nupuiah a nei tawh a, thalai rawngbawlnaah Bialah leh mahni lawina Kohhranah leader te, secretary te, incharge te a ni tawh asin. Hun a liam a, Dt. 22. 9. 2014 zan a lo herchuah chuan he pa nen hian Pulpit-ah in intawng leh a, kut thingin in inchibai a, a nin inkhawm a hruai a, nangin thu i sawi a nih kha. Kha mi zan khan a chunga malsawmna i lo nih tawhna rulh let a tum ngar ngar chu a tihlawhtling ta a, duhsak tak chein 'DUHSAKNA' tih thupui hmangin thuziak tar mawi a hlan ta che a nih kha. (He lehkhathawn hi he thu post tu, keima chanchin a tak ngei a ni a, nunhlui inphawrh mualpho ka nih rualin, Pathian chauh a lo ropui zel nan leh, Pu KL. Liana hnena ka tihtheih chhun thilpek atan ka ti a ni e.
(Edited & Complied by TOM)
Post a Comment