Consumer-te tana ka ṭhahnemngaihpui zawng zawngte chibai ka buk a che u.
Mipui Mamawh RawsawtConsumer Huang kan nei thei zel hi Pathian malsawmna leh hruaina kan chan a ni a. A lawmawm hle a ni. He kan thu leh hla avang hian mi tam takin an right-te an lo hriat phah a. Bazara dawrkai bungrua an lei leh mi tha leh zung sum senga an hmannaahte nasa takin Consumer Huang hian a lo pui ṭhin a ni. Hmanni lawk pawh khan Aizawl hmar lam Durtlang Venga pa pakhat chuan heti hian message min lo thawn teh tlat a. "Ka Pu, i Consumer lehkhabu palite kha ka va lei duh em! A man te eng zat nge ni aw, i WhatsApp ve lo en ni??..he number-ah hian, pls," 13/6/20 - KC Durtlang Hospital Message hi ka lo en tlai deuh va. Ni 17-ah ka lo en chauhva, KC-a hi ka phone nghal thuai a, ani ka ṭhian chhar thar nen hian kan inbe mawlh mawlh a. Sakhmel inhmu lo chung pawhin vei zawng leh ngaimawh zawngte, ngaih pawimawh zawngte a thuhmun chuan kan inkawm ngeih nghal zel chu a ni mai thin a. Tunah hian a lehkhabu tur chu ka lo zuah mêk a ni. 


Pu KC-a te ang hi Vengtin, Thlertinah awm ila chuan mipui kan thawveng hle ṭhin tur lah ni le! Mahse, tun thleng hian Consuner-te dikna leh an chanvo vei hi ka hmu tam lo rih khawp mai. Tlawng vuak a Mat dap an sawi ang deuh a ni.Tirhkoh Paula ṭawngkam takin, eng pawh ni se, kan thlen chin atang hian hma i sawn zel ang u, tiin kan insawm a ni. Kan hotupa ho hian thil leitute chanvo venghim tur hian harh chhuah Kan mamawh hle a ni ber mai. 

Kei ve hi taimak vanga zing tho hma ṭhin ka ni law, thawh hma hi ka tleirawl at lai ata tun thleng hian ka chin ṭhan a ni a. Ka pang a dam phawt chuan ka tho hma ṭhin, tih hi a ni a. Thawh tlai ka thiam ve lo, ka tihna a ni. Ka thawh veleh ka inphih fai a, zing thingpui, a hmeh nen ka in thin. Chumi hnuah ka Walk thin. Chumi hnuah kan unaupa, ka ṭhianpa Pu F.Lalnienga Inah ka in-report a, thingpui hang min lo hlui thin. Ka lawm thin hle. Chumi hunah chuan Ram thil kan sawiho thin a, a changin kan inhnial bap bap ṭhin bawk. 

Pu Nienga chanchin hi tlar hnih khat lekin ka'n tar lang zuai teh ang. He Pa chanchin hi he Consumer Huangah hian a hranpa ngata ziah ka duh, ka lo tum reuh reuh mêk a ni a. Tunah hian a khuh hawnna ang deuhvin ka han hel nuai teh ang. Pu Nienga hi Farmer hlawhtling tak tunlaia Mizoramin kan neih tlemte zing a mi a ni. A Farm-ah hian hnathawktu sawm thum(30) vel a chhawr, Manager fel tak a nei bawk. Tuktin Bawnghnute litre engemaw zat khawpui chhungah an pe chhuak thin.

Bawng hi englai pawhin sawm hnih thum a kawl reng bawk. Pu Nienga Farm hi, Multi-purposed-a ni ber a, Bawng, Ar, Varak, Vawk, Sangha leh thlai chi hrang hrang a neiin a enkawl mek a ni. He Farm hi Mualpui ram Rajiv Gandhi Stadium liam, World Bank Road bul a awm a ni. Mahni kutkawih liau liauva ding chhuak, Farmer hi an tlem hle a. Ka han zep tel zawk a ni e. Hun remchangah a hran ngatin he Farm zir bingna hi Pathianin rem a tih chuan ka rawn chhawp chhuak ang.

He kan ram riangte hi a lo intodelh lo em em khawp mai a. Intodelhna kan neih chhun hi tuibur a ni mai awm e, kan ṭhian' pakhatin a ti a. Ani ka ṭhianpa vek chuan buh pawh hi Mizorama tharchhuah kan ei si lova, Alu lahin kan chaw ei apiangin chanvo pawimawh tak a chang a, kan chawhmeh zingah chuan Alu tel lo chuan chhungpui nu lawma kim thin lo. Mahse, Khasipa thar chu kan rinrawl ber a ni si. Buh lah kan thar mang si lo, Haryana leh Punjab pa tharah kan innghat bawk', a ti bawk. Buh thar nei ve mumal ta lo chuan Sawrkar chak, buhfai tithleng ṭha thei apiang kan chawimawi mai a ni. 

National Food Security Act 2013 hi September 2013 ni12-a Parliament a pawm a ni a. Mahse, July Ni 5 2013 atangin India pumah tun thlengin kan hmang ta a ni. He policy thar hi India ram chhunga chhungkua 1.2 billion aṭanga hmun thuma ṭhena hmun hnihin an chhawr ṭangkai mek a ni. Buhfai sem chhuah dan pawh tihdanglam a ni a. Ration hi miin an lak zawh hma chu sem tur a ni. Order ah chuan thla khat chhung sem tur tih a ni. Retailer-te hian Dan zawm tur an nei a, hetiang hian thil an ti tur a ni. Ration sem hun: Zing lamah dar 6:30 aṭangin dar 8:30 inkar. Tlai lamah dar 3:30 aṭangin Dar 5:30 chhung sem tur a ni. He thupek zawm ṭha lo Retailer chu hrem theih an ni. Hetiang hian Retailer chuan a Dawr hmun remchang lai, customerte chhiar theih ngei tur hmunah Signboard a tar chhuak bawk tur a ni. Hetiangin:

1. Retailer Hming:
2. Dawr Hawn Hun:
3.Ration Rate:
4. Retailer Phone Number:

Tunlai angah hi chuan Retailer-te hi Ruling Party worker an ni duh khawp mai a. Retailer inthlak hri vei a ni tlangpui bawk. Chuvangin Retailer ni tharte pawhin Dan an zawm ve mai a ngai thin a ni. Hman lai deuh khan Sapin Ration an tih chu Mizo hovin, 'rawsawt' kan lo ti ve ngawt a, rawsawt hmarchate pawh kan tih ṭhin hi. 

Engpawhnise, kan mamawh ber Buhfai hi Sawrkar zar kan zona leh India khua leh tui kan nih ang a, chanvo kan neihna ani a. Chhiah petu khua leh tui kan nih anga hamṭhatna kan dawn zinga pakhat a ni a. Ration hi kan hlutin kan zah bawk tur a ni. @Lunghnema Consumer Activist, Charity Lodge: 9862288182

Post a comment

Powered by Blogger.