YouTube ah Zo Inspiration channel te'n Nula VANLALVENHIMI , Durtlang an interview hi kan PROMISE group ah an rawn dah vei hlauh va. Uluk takin ka en chhuak a, Mizo tawnga interview ah chuan ngaihnawm ka la tih ber ani hial ang.
Kumin 2020 a Mizoram HSSLC ( Class XII) Arts stream bika Top 8-na ani. Primary atanga Higher Secondary hi Durtlang khaw chhunga Mizo Sikul kan tih ang chi a zir chhuak parh ani. A nu leh pate hi nitin inhlawh chawpa eizawng an ni. Tuna an chenna in chu lei chhuat, a bang dap, a chung rangva ani, a hlui hmel tawh khawp bawk. A subject har tih ber English, awl tih ber MIZO... ka va like tak.
Khai mah aw...
1. Veni hian an chhungkaw dinhmun harsat zia a hria a, chu chuan amah chu a future dream zawh kawngah ti chautu nilovin ti chaktu ah a hmang daih.
2. Vawiin ni ah tak hian Veni hi Mizo nula hmeltha leh duhawm/ itawm zawngin an Veng chhungah pawh a la lar lo ani mai thei. Mahse nakin lawkah dinhmun tha zawk , hahdam ve deuh zawk, changkang zawkah tun ang zela zirna/ thiamna lam kawng zawha a tran mar pat reng chuan...Veni hi a lo va hmel tha em em si ve, a lo va smart si ve....titu leh phulo ti taka en ngawih ngawihtu tur Mizo tlangval an la tam chho dawn chauh tih a hre fuh tlat. Lehkha zirlai a lar aiin zir zawh hnu, hlawhtlin tawh hnua lar chu a thlang fel ve tlat tawh. Facial make up/ dress up lam aiin character / socio-economic status make up a tlo zawk tih pawh a chian hmel.
3. A Bible chang innghahna... Amah chu ring la, Ama'n a ti vek mai ang ...tih anih reng laiin ....a rin tak zawk nia lang chu Veni hian a tih tur, taima leh ding taka a hun tam thei ang bera lehkha a zir ve tlat chuan...a fapa mal neih chhun pawh pe ngam chuan khawvel thila hlawhtlinna vawrtawp pawh a pe duh dawn tih a hria. Veni hi Ringtu nung anih bakah RINNA NUNG neitu chu ani. A Pathian rinna chu a bawhzui tlat avangin a rinna chu vung takin a nung ani tih a chiang.
4. Veni nu leh pa te kha mi hlawhtling emaw neinung kan tih ang chi an ni ve lo mai thei. Mahse... khawvel an RO HLU BER...an fate chu Vanram thlenga an chhawm theih tur awm chhun anni tih hre fuh nupa ni ve tlatin...ei leh bar harsa tak chungin an theihna zawng zawng, an theih dan zawng zawngin an fate nakin hun atan an inpe hlawm ve tawp niin a lang. Veni nu leh pate ngaihtuahna ang nei hi Veng / Khaw tinah 51% tal chu ni hlawm ila...he Mizoram leh hnam hi a va hrisel dawn rua e.
5. Vannei turin thawh rim peih hmasak a ngai thin. Dam chhungin lehkha zir a ngailo tih chiang ila, dam chhunga ei bar a harsa tur bik a siam kan awmlo tih nen. Chunglam khi ON fuh chuan...khawvel thila malsawmna ang lek lek te hi chu min pe chak lutuk, Amah ti lawm, ti lungni fuh ho te phei chu a boksis uar thei hlaih hlaih teh ania aw. Lehkha zirlai TEXT bu , a kawm leh kawm inkar hi hneh hle ila exams na atan zir sual a awm duhlo ber. Zir vak, beih vak hi Sure Success Formula rintlak ber ani tawp , a aia han sawimawi tur a awm chuanglo. Mark lama min pui lo tu thil , thiante leh activities hrang hrang te hi chu hmelmak hrih ngam a ngai. Khami kan exams tum khan MARK ka lo hmu sang lutuk a, a pawi ta ani ... tia inchhir awm thawm an awm ka la hrelo. Naktuk tuk leh ah mai chuan khawvel hi a la tawp loh hmel bawk...Tuh hun dik hria la, seng hun dik i thleng ngei ang.
DUHSAKNA CHIKIM NEN.... Congratulations to Miss Vanlalvenhimi, Durtlang.
~Hriata Chhangte
Post a Comment