1. He khawl hi neih harsa tak a ni lo. A aia khawl man to pawh project tlem kan hmuh atangin kan lei thei. Chuvang chuan, state sorkar pakhat ve duang chuan a duh a, tul a tih phawt chuan district tin daih a lei thei awm e.
2. Virology lab maintain erawh a hautak viau ang, ka la hmu lo a, ka la hrethiam phak lo. Mahse, laboratory set up hi, hmunhma awm sa ah, pawisa a awm anih phei chuan in zirchawp pawhin a tih theih nameuh mai! (Chemistry lab ni se kan hnehsawh ve dawn nen!)
Tun dinhmun ah BSL-2 level a ngai hian a ti buaithlak a, laboratory atanga natna darh thei hi ven a ngai. Fimkhur tawp a ngai. A senso pawh a hautak. District tin a dah hi kan sorkar hian a tlin lo ang. Tin, a enkawltu tur mithiam pawh kan indaih kher lo ang. Mahse, kan tum erawh chuan hmun 3, Aizawl (a awm sa), Lunglei leh Champhai ah erawh a dah thei ngei in ka ring. Tin, natna darh huk palh thei thil ah invennan a ruahmanna kan lo kalpui lawk pawh a va tha em! A darh ta lo anih leh thil lawmawm ah ngai ila.
3. Scientific instrument te hi a working principle nena kan zir duh thlap kher a nih lem loh chuan; scientific knowledge nei tan chuan hman thiam a har lem lo. Khawl changkang leh tunlai ber ber heng: Nuclear Magnetic Resonance Spectrophotometer atanga XRD, GC-MS, XRF, te pawh ni 2 kan trainning a, kan thiam ve mai. Khawi khat erawh in theihnghilh a awl.
4. RTPCR khawl MLA pakhat in a donate hi a ropui hle in ka hria a, a MLA fund atanga a donate a ni awm e. Mahse, tun dinhmun ah a hnawng mek! Kan Health minister sawi an sawi chhawn leh ka hriat hi a dik anih chuan, tuna kan MLA leh Minister ni mek zingah pawh donate duh an awm a ni awm e.
Mahse, a khawl leh a behbawm a hautak vangin an welcome vak lo niin a sawia, Chutih laiin, kan Health Minister vek hian USA lam atangin RT-PCR khawl an chah mek niin a sawi bawk si hi enge a awmzia le? A bunna leh behbawm a tlem ta bik nge ni ang..
5. Kan sorkar lai in tun hripui len laiin thildangah tender a chhuah thei a, party mi te tan contract a sem thei bawk. Heng aia pawimawh, hripui do kawngah hian ke a chhep muang deuh a, RTPCR khawl dahna turah pawh a harsatna thu hlir a sawi mai hi eng nge a awmzia? Khinga a sum sen ai khian, mipui mamawh hmasa hi a buaipui thei lo em ni?
6. Heng khawl supply chungchangah hian hlawkpui an awm zawk nge tihte rilruah a awm ta hial mai! Nakin ah thudik erawh a rawn langchhuak mai turah ngai ila.
7. Mipui mamawh te hi kan sorkar ropui tak, Pathian leh kan ram tan titute hian an buaipui hmasa turah ngai ila. Chumi teh tuah pawh chuan kan tel vek ngei ang.
8. A tawp naah chuan, RT-PCR khawl MLA pakhatin Lunglei hospital tana a pek hi Sawrkar hian lawm takin dawng sela, a rang thei ang bera hman tum hram teh se..
Chuti niloa, politics khelh nana an hmang a nih chuan Community Spread lo awm palh tase, mipuite hian kan ngaidam hauh lo ang, a bikin Chhimlam mipuite hian kum 2023 inthlan thleng hian an hre reng palh a nge.
Dr. K. Vanlaldinpuia
Dept. Chemistry, PUC
Post a Comment