TRIPURA-IN MAU-AH MIN FIN KHALH EM NI? MAU ÚM TUI PAINA AN SIAM A LAR NGHAL, KAN RAMAH ENGTIN?

30th June: Tripura-a mau hmanga tui paina úm (bamboo water bottle) an siam chu a lar nghal hle a, Bollywood actress Ravina Tandon paw'n a chah nghal.

Pradhan Mantri Van Dhan Yojana hnuaiah mau tui ùm hi thla ruk chhung an lo siam tawh a, a thawhkhatna atan úm 100 chu ram chhung hmun dangah nimin Thawhtanni khan an thawn chhuak tawh a. Ravina-in a chah (order) a chhannaah Tripura chief minister Biplab Deb said chuan, “Raveena-ji hian tualchhung mi themthiam te a tiphurin nasa takin an rilruah hmasawn duhna a thlen ngei ang. Kan lawmzia entir nan kan mau úm hian i hnen a rawn thleng thuai ang", a ti.


He tui paina mau úm siam kawnga bultumtu chu Prasada Rao Vaddarapu, Indian Forest Service (IFS) officer, Chairperson of Tripura Rehabilitation Plantation Corporation (TRPC) ni bawk a ni a. Ani hian an siam dan tur ruangam te a duang (design) a. A zirchiang a, Bamboo and Crafts Development Institute (BCDI) leh Centre of Forest Livelihood and Extension (CFRE) atangin a siam chhuahnaah hian puihna a dawng bawk.

Simna, Mohanpur, Subalsingh para leh West Tripura, Khowai districts-a tunhma atanga kutthemthiam mi 10 rualin a siam hna an thawk phawt a ni.

Prasada Rao-in indianexpress.com a hrilh dan chuan bazar-a an zawrh ang chi ai chuan a tha chungchuang hle a, mau úm ni mahse tuiin a mau kha a chiah lo a. China siam ang chi ah chuan tuiin mau kha a zuk chiah a, chutiang chu a rim a tui duh lo a, hmuar lam chiin a kap a, taksa tan pawh a hrisel loh a rinawm a ti a. An siam chhuah ang chi chu zan pawh a zang hle niin a sawi.

Tunah hian chi hnih- copper containers emaw thermal flasks emaw ang chiin an siam phawt a, mau pum kawrin an tuam thlap a. Chin ṭhana neiha tam tak siam chhuah theih tur a ni dawn a ni.

Chief Minister Biplab Kumar Deb pawh a phur hle a, ni thum kalta khan 'social media' ah, “Tripura-in kuta mau tui úm tha danglam tak leh eco friendly em em a siam chhuah avangin chhuanawm ka ti a. He úm siamchhuah hna hi TRPC leh BCDI thawkdun leh FRCLE, Tripura te vang a ni a, PMVDVK leh NBM schemes hnuaia mi a ni. He industry hian tualchhung kutthemthiam tam tak te hnathawh tur leh ei zawnna kawng a hawng dawn a ni," tiin a 'post' nghe nghe a.

Aldrin Majumder, chief of Pegasus Corporation, i/c sales, marketing, branding and promotion chuan an thil siam chhuah chu thil tlo tur chi, mihring tana hlauhawm lo a nih bakah tun lai 'export standards' a ni a ti bawk a.
A siamnaah 'bleaching powder' leh 'chemicals' dang aiin 'neem' te, aieng te leh hnim leh hlobet dang te an hman thu a sawi bawk.

Prasada Rao chuan hetiang mau úm 600 vel hi Lal Bahadur Shashtri National Academy of Administration, Mussoorie ah thawn a nih mai theih tur thu leh sumdawnna hmunpui heng Mumbai leh Delhi ah te pawh a 'sample' thawn dan an zawn mek thu a sawi a. USA, Dubai leh European countries atang te pawn an rawn zaawtchiang tawh niin a sawi bawk.

Tunah hian Tripura hian hun rei tak chhung atan hetiang mau ùm siamna tur mau hi an nei tam tawk sa a. Mau tlawn khat hi Rs. 200-300 inkarin an hralh a, mau úm an siam hnu hian a man hi a let thumin s man hi a pung niin an sawi.

Prasada Rao chuan mipui te pawh mau chin kawngah a tihphur hle a beisei thu a sawi nghe nghe a ni.

Tunah hian Tripura ah mau chi hrang 21 chu mumal taka enkawlna hnuaiah sq.km 3,246 a zauah chin a ni a. Kum 2019 khan state sawrkar chuan mau chinna tur hectare 15,000 a zau a ruahman tawh bawk a. New Delhi-based National Centre for Design and Product Development (NCDPD) nen mau atanga thil siam zawrhchhuah kawngah MoU an lo ziak tawh bawk.

• Keini ramah chuan mau chi supply tur zawn atangin thil fel tawk lo a awm nia ngaih theih turin sawi leh sel a awm nghal a.

Khatia June 6 a "Mizoram Sorkar Flagship Programme, SEDP leh National Bamboo Mission hmanga Rua-a intodelh tura hmalaknaah Horticulture Department-in raw chi supply-tu tur a zawng mek", tih a rawn lar hluai hnua sawi leh sel a awm ṭak ṭak khan Horticulture Department chuan June 11 ah
Sawifiahna a rawn chhuah vat a. Chutah chuan, "Hmunpui leh Lengpuia Model Bamboo Plantation siam tura mau chi supply-tu tur tender an tih chhuah mekin, Covid 19 dona tur sum ruahman a ti buai loh thu leh Sum hi SEDP leh National Bamboo Mission hnuaia 2019-20 a ruahman sa a nih thu an rawn sawi a.

2019-2020 sum ruahman sa a nih thu an rawn sawi hian Congress Ṭhalai lam an rawn sa deuh phat ang chu tiin ka lo thlir a, an reh ta hiai lawi a! A chhan chu 5 Aug., 2019 khan RTI hmanga Congress Ṭhalaiin a zawhnaah Mau chi buaipui nan hian 2019-2020 budget-ah sum dah a ni lo tiin Horticulture department hian a lo chhan tawh thu thuchhuah an siam a (a chhanna lehkha an tar lan pawh an dah tel a ni). Congress Ṭhalai hian RTI a zawhna chhanna tia an rawn tar lan hi a lem em ni aw tih theih a ni ta rum rum a. Thu tak a nih chuan 2019 leh 2020 Horticulture Department thu hi a inkalh ta em ni tih chu kan hrethiam pha ve ta lo a.


Tin, Mau chi supply tender chhangtu mi pakhat chauh a awm thu leh pawm tlaka an ngaih thu te, Mau chi supply nan Cheng nuai 90 ruahman nghal a nih thu te June 18-a Vanglaini-a a rawn chhuah tuk atang khan Horticulture Department-in Short Tender Notice-a an tar lan, 'terms&conditions' kimchang chu Department website www.horticulture.mizoram.gov.in ah a awm an tih website ah hian June 18 atang khan luh ka tum ni tin a, vawiin thlengin luh theih loh in a la awm ta char char a, an khar nghal hmiah niah ka ngai a, ka nghak peih ta lo. Engati nge an website hi an khar kher ang le tih chu kan hre phak leh ta lo.

Hetiang tehnuai hi thil awmdan a nih avangin beisei angin kan hlawhtlinpui ve ang em tih chu zawhna a ni lo thei lo a. Horticulture Department hian sawifiah tur an nei leh nual niin a lang.

Tripura CM hian mau a buaipuia a chi supply chungchanga a inhnamhnawih an sawi awm thawm kan hre lo a, an dinhmun chu hetiang hi a lo ni ta bik si! 'Hlawhtling tur chuan mi fa nih a ngai' an tih fiamthu ang deuh hian hmasawn tur chuan mi ram nih hi a ngai tak tak ang tih a hlauhawm thin hle mai.
Source: Saihmingliana Sailo

Post a comment

Powered by Blogger.