India defense minister Pu Rajnath Singh, June ni 22 a Russia rama a zin thu kha kan hre vek ang a. India leh China boruak sat vanglai tak a ni bawk a. Engemaw tak chu China huat zawng a han tih ngei awmhmun atangin kan lo ring fur mai a. Hei, tunah Rajnath Singh zin rah chhuah kan hmu tran ta reng mai. 

Chanchinbu hrang hrang atanga kan hmu ang chuan, Defence minister kha Russia Victory Day Parade  chhim tura kal a ni. Mahse, a phenah khan thil pawimawh tak tak tih tur a nei treu mai a. India leh Russia chu hman a tranga thrian thra, englai pawha inbe chhe ve ngai lo an nih, ti kan hria. Mahse, tunlai boruak anga chuan âwnlam neih hi a fuh ta chiah loh deu a. 

A chhanchu, Russia tan pawh, India nge China ti a duhzawk thlan a ngai ta tlat mai a. Khawvel ram ropui pahnih, economy leh military power anga chhût pawha duai loh tak ve ve, pakhat zawk zawk thlan a ngai ta kha, Russia tan pawh thutlukna khir ber te zinga mi a ni ngei ang. 

Mahse, India leh Russia inzawmna ngheh zia chu sawi hian a siak lo a ni ber mai. India in zalenna a hmuh hma hret, April ni 13, 1947 atang khan Russia chuan India puih turin hma a lo la daih tawh a. 

India sawrkar in ei leh bara intodelhna tura plan a siam Five Year Plan a ruahman tir khan, Russia ram bak belh tur a nei meuh lo. 

Tichuan July ni 9, 1951 ah Five Year Plan hmasa ber chu hman tran a ni ta. Kha plan chhunga Industry lian dinna tura project 16 zinga 8 zet kha Russia puihna hmanga tihpuitlin a ni a. India rama zirna in tha bera chhal  Indian Institute of Technology Bombay khu Russia puihna liau liaua bul tran a ni. IIT Bombay hi khawvel zirna in tha zingah 172 na a tling hial. 
Chu tiang khawpa inzawmna thuk neih an nih avangin, India leh Russia hi eng thil mahin a thren thei loh a ni. 

Tichuan, China nge India, ti zawhna chu Russia tan chhân harsa lo tak a ni. A thrian India chu Pakistan leh Russia in an chhai buai rengna lak ata a chhuak theih nan, a ralthuam neih ang ang chu a hman tir ta thin a. Tunah pawh India in a mamawh ang ang a pel zel dawn a ni.


Russia s-400 news
Galwan valley atrangin China a tawlh hnung ta emawh kan tih laiin, Ladakh lamah ralthuam a chhekkhawl leh ta der mai a. China sipai Peoples Liberation Army  te chuan tank 15 lai chu ladakh lamah an dah ta rup mai a. China laipui (tank) te hi tunlai tak tak, a zangkhai theih ang bera siam niin, thlawhna hmanga phur lawr thei tura duan a ni. Hei vang hian India  leh an ramri, tlang/kham chhawrdawh tak tak karah pawh tank an dah thei zel a. Hei hian nasa takin indo huna pawh a tranpui dawn a ni. China laipui te chi hi tonnes 33 a rit a ni. 

India laipui erawh a lianin a rit hlawm hle mai a. Laipui pakhat hi Tonnes 58 laia rit a ni. Thawlhna in lo phur thei ta reng pawh ni se, Tank pakhat a phur lawn chhung, China in 2 zel a phur kual thei dawn a ni. 

Russia laipui erawh China laipui aiin a la zâng ta cheuva. Russian laipui 2S25 Spurt-SD hi tonnes 18 chau niin, thlawhna  a duh duha phur kual thei tura duan a ni. 

Laipui te hi a rit chi leh a zângkhai chi hi hmanna tur a awm vek a, a chi kima neih hi hmelma neih India ram ang tan chuan a pawimawh hle, ti kan hre vek awm e. 

Russia tank, India in lei tuma a buaipui mek hi Spurt SDM1 lightweight tank niin, tonnes 18 a rit a ni. A KG anga chhut chuan KG 16000 vel a nih chu. 

The Print in a tarlan dan chuan Rajnath Singh, Russia a zin trum khan ralthuam tam tak leina tura inremna a han siam a. Chumi rahchhuah a ni, tiin Indian Defense ministry a official pakhat chuan a sawi. 

Tuna India in rinrawl berah a neih laipui te chu T-90 tonnes 46 a rit leh T-72 tonnes 45 a rit te a ni. Sawi tawh angin China sipaite hman mek type 15 hi tonnes 33 a rit a ni. 

Indona hmunah hian ralthuam zangkhai te hi sipaiten an duh zawk fo a. Laipui rit leh lian pui pui aiin, a te chi hian trangkaina a ngah zawk a, hman a awlsam hle dawn a ni. 



Kum 2009 atang tawh khan India sipaite chuan laipui te chi hi an duh thu an lo sawi fo tawh a. Defense ministry lam pawhin an thil duh hi a ngaihsak hle a. Defence Research and Development Organisation (DRDO) chuan private company Larsen & Toubro nen hma la nghalin, project kal lai mek a ni. 

India hian trum engemaw zat indo a lo hmachhawn tawh a. Chung zingah chuan 1947, 1962, 1971 te kha kan hre vek awm e. Khang indonah khan India chuan laipui te chi, lightweight tank, a lo hmang tawh thin a. A trangkai hle niin an sawi. 

Russia leh China inzawmna hi a chhe mek zel niin a lang. Russia siam air defence system S-400 hi ram tam takin an awt viau a. China hi a lei hmasa bera a trang a. Pahnih lai chu a dawng hman nia hriat a ni. Mahse, July ni 30 khan Russia chuan S-400 China kutah pek a tum chu tihkhawtlai a ni ta a. Hei hi Rajnath Singh in Russia Defence Minister Sergei Shoigu a hmuh truma an thutlukna ni ngeiin a lang. 

Kum tawp lamah Russia defence minister hian India ram a lo zin mai thei bawk. Tunlai hian Russian hian China hi a haw thar hle a. Kan ram min enthla a, enthlakna hna thawk turin kan mite a hmang, tiin a puh a. Hei vang hian S-400 hlan hun chu a tihkhawtlai ta rih a. Russia hian India nawrna vanga chhuanlam siam mai mai niin a lang. 

Russia Deputy Prime Minister Yury Ivanovich Borisov chuan defence lamah India leh Russia thawhdunna chu a kal tluang zel a. Russia chuan India duh tihlawhtlin turin theihtawp a chhuah reng, tiin a lo sawi tawh bawk. 

India pawhin S-400 hi lei a tum ve reng a. A man tur pawh a tam zawk chu a pe tawh nghe nghe. China lam pe chhunzawm tawh lovin, India lamah a deliver tawh hmel a. I lo thlir zel ang. @TimesofMizoram

Post a Comment

Powered by Blogger.