Pakistan Foreign Minister Qureshi leh China Foreign Minister Wang Yi, August ni 19 a Beijing a an inhmuh thu kha kan hre ngei ang a. Ram pahnih te inzawmna tinghet tura an hmalakna chuan Pakistan tan rah duhawm a chhuak mek niin a lang. Pakistan ralthuam thar kan sawi hmain, Beijing atanga ram pahnih foreign minister te thuchhuah han thlir zuai ila. 

The Global Times in a rawn tarlan angin, Pakistan chuan elsen takin India a tawngkhum leh ta a. India hian duhloh hle mahse China chuan China Pakistan Economic Corridor (CPEC) hi a tawpsan dawn lo. Indian duh loh zawng takin China hian a kalpui zel dawn. Ram ropui leh chak tak hi Pakistan in a tawiawm zel ang a, CPEC hmasawnna hi India in a titawp thei lovang, tiin thuchhuah an siam a. Pakistan hian China hi a mamawh ngawih ngawih a, a tel lo chuan hma lam a pan thei ngang lo a ni. 

Qureshi leh Wang chuan an hriat hnu Kashmir phairuam buaina chu an sawi dun a. An duh angin India an nawr theih si lo, a rûka chet lak dan an ngaihtuah ngeiin a rinawm.  Pakistan leh China te hian UN Charter anga Kashmir valley buaina chinfel an duh a. Mahse, India hian inchi khat mah tawlhsawn a tum tawh lova, UN thu pawhin zawm a hlawh loh hle. 

China Pakistan Economic Corridor hian Pakistan Occupied Kashmir (POK) a paltlang dawn a. India chuan hei hi a duh loh ve khawp a. POK hi Pakistan in dan lova a awp a ni a. India ram a ni, CPEC hian a paltlang a thiang lo, tiin a dodâl tang tang a. Mahse, POK kher hi chu Pakistan atangin India hian a láklet a rinawm loh hle a. India in laklet a tum luih chuan Nuclear War a chhuah zawk a rinawm. 
china warship to Pakistan

Ministry of External Affairs, Government of India thupuangtu Anurag Srivastava chuan China leh Pakistan te chu Kashmir chungchanga fimkhur turin a chah a, he lai buaina a inrawlh fo loh tur leh, India thuneihna chhunga che lo turinna a hriattir ve nghal a ni. 

China Pakistan Economic Corridor project hian kawngpui pawimawh siam hna an thawk mek a. China atanga bungrua awlsam taka thawn chhuak zung zung theina tur leh, indo a lo awm pawha tangkai taka hman theih tura duan niin, Pakistan pawh hian a tangkaipui nasa hle dawn. 

Pakistan Foreign Minister Qureshi China zin chu a hlawhtling viau mai a. China chuan indo lawng hrawl zet mai a pe ta. China hian Indo lawng 4 zet Pakistan ta tur a siam sak a. August ni 24 khan a hmasa ber tur chu hman theihin Hudong Zhonghua lawng chawlhhmun, Shanghai khawpui atangin tuipuiah an chhuah ta. Pakistan leh China inzawmna hi India leh Russia inzawmna ang tho in a nghet ve tawh a. India hian a ram thenawm te a huikhawm vat vat a ngai a ni. 

Pakistan indo lawng lian thar hi type 054 an ti mai a, ralthuam tunlai tak tak a pai teu a. Jet Fighter te pawh a kap thla ve thei dawn a. Râl khata hmelma te pawh duh thlâlin a kap thei dawn bakah,  sensor chi hrang hrang advance radar leh missile a keng telh a, hmelma ralthuam te awlsam takin a man chhuak zung zung thei dawn bawk a ni. 


Kum 2017 daih tawh khan Pakistan chuan China Shipbuilding Trading Company Limited (CSTC) hnenah Type 054 A, P Frigate  hi a lo order tawh a. Nikum khan China official te chuan Pakistan tan lawng 4 an siam mek thu an lo sawi tawh bawk a ni. Lawng lian 4 leina tura an inremna thuthlung hi tarlan a ni lova, lawng pakhat man zat pawh kan hre thei rih lo. 

Pakistan hian indo lawng F-22P Frigate, China siam tho a hmang mek a. 054A/P frigate hian a thlak dawn ta a ni. Pakistan in US a kalsan hnu khan China a belh chawt mai a. Thian tha dang nei loh ve ve chu an thawk dun thei hrep mai a. Pakistan Aeronauti Complex (PAC) leh Chengdu  Aircraft Corporation of China chuan single engine, multi role combat aircraft an siam mek a ni. Hei pawh hi kum 2021 lamah chuan hman thei a ni mai thei. Tunah Pakistan-China siam mek aircraft hian Tejas a pha ang em? Nge Tejas a rawn dah nil dawn, a ngahhlel awm ta hle. 

Tun tuma China in Indo lawng Pakistan a pek hi, ramdang hnena ralthuam a pek zinga lian leh hrawl ber tur a ni. Pakistan Navy te chuan tun hma aiin a lét hni in Pakistan Navy a tichak dawn thu an sawi a. A dang lawng 3 hi kum 2021 kum tawp lamah an dawng kim thei tur thu an sawi.

Pakistan Foreign Minister chuan Pakistan a thlen hnuin Islamabad ah, India ngei zawng takin a tawng leh a. Tun tuma China-Pakistan inzawmna rah chhuah chanchin thar hrang hrang te hian, ram pahnih te inzawmna that zia a pholang a, USD billion 60 zet senga project kan kalpui mek China Pakistan Economic Corridor hi a hlawhsam dawn lo thu kan hre thei bawk, tiin India enghel turin a tawngchhuak a ni. 

CPEC hi kum 2013 khan Chinese President Xi Jinping in a hawng a. A tirin USD 46 ruahman ni mahse, kum 2017 khan  project hlutna hi USD 62 billion lai a kai ta a. CPEC hian Southeast Asia, Central Asia, Gulf Region, Africa leh Europe ram te a thlungzawm ang. China policy en hian Nakinah chuan India thenawm ram te  pawh a la paltlang a rinawm ta hle. 

Pakistan chhungah hian Gwadar Port atangin China khawpui pakhat Xinjiang province a thlungzawm ang a, Pakistan Occupied Kashmir a paltlang dawn a ni. Hei hi India in a dodal chhan ber chu a ni. @TimesofMizoram

Post a comment

Powered by Blogger.