CHINA SCIENTIST US A TLANCHHIA CHUAN CORONAVIRUS HI "MILITARY LAB" AȚANGA PUT CHHUAK A NI A TI
August 03, 2020 Thawhțanni : Huna Kawlni Kawlvawm
Chinese virologist US a tlanchhia chuan Coronavirus hi Chinese "military lab" ațanga put ru ngei a nih thu a sawi. The SUN newspaper, London ațanga chhuakin hemi chungchang a ziah dan chu hetiang hi a ni.
Dr. Li Meng-Yan, virology specialist, Hong Kong school of Public Health chuan COVID-19 hrik hi 'chiang takin' People’s Liberation Army nena inkungkaih lab ațanga chhuak anih thu a sawi.
Coronavirus hriat chhuah hlim khan China hian virus chungchang leh a lo chhuah dan te hi nasa takin a thup a, laboratory ațanga chhuak nia puhna phei chu a thinrimin a pha nasa hle tih Khawvel hriat a ni. Hetiang hi ni mahse Dr. Li hian thu dang a rawn sawi leh ta tlat mai. Mihring inkai chhawn theih dan a zir chianna ațangin 'military lab' ațanga chhuak ngei anih thu a sawi.
Taiwan News, Lude Press in livestream hmanga a biaknaah hetiang hian a sawi a, a tir chuan a thil hmuh chhuah chu an hotupa hnenah a hrilh a, amah ngei pawhin a ngai thupui lo hle a ni.
"Wuhan sa zawrhna (wet market) hi a tawktarh mai mai a ni," a ti.
Tunah hian scientist te chuan natna hrik hi Wuhan sa zawrhna market ațanga rannung/ ransa ațanga mihring hnena pakai leh zuang lut ngei niin an ngai a ni.
Dr. Li Meng-Yan hi thil a sawi chhuah chuan China thu neituten an man ang tih hlauin April thla tawh khan Hong Kong ațang hian US lamah a tlan chhia a ni. "Hei hi ka hre chiang khawp mai, thil ka sawi chuan engtik hunah pawh bo thei ka nih thu hi, Hong Kong zalenna duha dodaltu huaisente ang hian," a ti.
"Engtik lai pawha bo mai thei reng ka ni a, ka hming nen lam bo vek thei ka ni".
Dr. Li Meng-Yan-in he thu a sawi hma hian University of Hong Kong chuan Dr. Li hian mihring inkai chhawn theih natna hrik chungchang zir bingna a tih thu hi an phat thu an sawi bakah a thil hmuh chhuah hi "thu dik nena inkalh" anih thu an lo sawi tawh a ni.
Fox News in a kawmnaah Dr Li chuan amah chu virus thar zir bing hmasa ber zinga mi anih thu a sawi. "US a ka tlan chhiat chhan hi he natna hrik chungchanga thu dik (the truth of Covid-19) ka sawi vang a ni," a ti.
Dr Li chuan an hotupa (supervisor) in natna thar SARS ang tak-- "SARS-like" chu "a ruk tea" chhui chiang turin Wuhan ah December 31 khan a kal tir tih a sawi. Heta a va chhuinaah hian mi tam tak a kawm chiang a, chung zingah chuan China Centre for Disease Control and Prevention a thawk ngei pawh a tel bawk niin a sawi.
A sawi zel dan chuan a țhian pakhat hnen ațangin natna hrik thar hi Wuhan khawpuiah "a hlawma darh" chu mihring te inkai chhawn theih nia a ngaih thu a lo hrilh bawk tih thu a sawi a, Dr Li chuan a thil zir chian leh hmuh chhuah dan chu an hotupa hnena a hrilh chuan, "ngawi chip cham tur leh fimkhur hle turin" a hrilh nghal a.
"Min vau khan nghal a...hlauhawm chhinchhiahna (red line) khawih hlek suh ang che" a ti a, hetiang thil chhuina sawi chhuah hi Beijing in a duh ngai dawn lo tih a sawina niin Dr Li chuan a sawi.
Coronavirus hri pui darh țan tirh khan China Sorkar hian natna hrik leh hri pui zeizia chungchanga mipuite hriat tura inrinna leh fimkhurna thu a ralkhel dar vawtu apiang chu a bitum nghal hmak hmak a nih kha. Doctor te pawh he natna hrik thar chungchanga an tawn hriat thu social media lama sawi chhuakte pawh man nghal hmak hmak an ni. Chanchinbu mi te pawh hemi chungchanga ngawi tlat tura tih an nih bakah report chhuah tuma che kual vel te chu an hmanrua zawng zawng tih chhiatsak vek an ni bawk. He natna China ațanga darh hi khawvelah kai mi 18 million an tling tawh a, mi 7,00,000 velin an thih phah tawh a ni.
He virus chhuah leh darh hlima China khawsak duh dan leh natna hri a hma chhawn dan te, zep leh thup a tum danah te thil fel lo tak, thehdarh chakna a ruka awm nia puhna chu China chuan a pha nasain a thinrim nghal hlur mai a, mahse US chuan he natna hrik hi thehdarhtuah ngaiin China chu a puh reng a, President Donald Trump chuan he natna hri hi China in a lo chhuah dan thup bo a duh tlat reng avangin deusawh takin "China hri chhia" (China virus) a ti.
China ram hian an record dan chuan hri kai 84,385 an awm a, heng zinga 4,634 in an thihpui a ni. US ah thung chuan 47 million in hri an kai tawh a, heng zinga 1,57,000 chuang nunna a suat tawh a, nitin mi 60,000 chuangin kai thar zel ang an la ni a, engzat nge la kai belha, la thihpui zel dawn tih phei chu sawi thu a la cheng lo hial a ni.
US Secretary of state Mike Pompeo chuan "zalen ram te" chu China nawr/beihpui atan a sawm hial a ni. "Khawvela zalen ram te hian Communist China hi a sáwi danglam loh chuan, Communist China hian min khawih danglam vek dawn tho tho a ni," a ti.
He hri pui avang hian China leh US inkar chu a ni telin a chhe zual zel a, hei mai hi a la ni lo a, China hian khawmual leh tuipuia a țhenawm ram 21 te chu hri pui an tuar lai pawh sawi loin ram zauh tumin a zar buai hle a, India sipaite leh PLA te June 15 nia tharum thawhna avangin India sipai 20 an thi a, China hian a sipaite thi zat hi a sawi lo thung a, India nen hian inbiain tawlh kir hlek mahse a hma aia rip zawkin India ram ri hrulah hian sipai leh ralthuam tunah hian a chhek mek nia hriat a ni. China ram chhungah kum tam tak chhunga tui lian nasa ber an tawn mek avangin an la che hlei thei lo zawka ngaihna pawh a awm a, tui lian hian ziaawm lam pan ta se India a bei dawn nge, khawi lam nge a beih dawn tih hi thil chhui mite ngaihdan a ni.
He hri pui avang hian World Health Organisation pawhin a hmelhem phah hle a, China thu hnuaia kun leh China in a nawm amaka a bawlzàn theih nia ngaiin WHO sum chhung lut tam ber chuan a sum chhun luh țhin a tih tawp bakah rual lo taka nghawngkawl bahpui tlakah ngai loin an inzawmna a chhut chah thu a ti chiang ta bawk a ni.
Hetih lai hian Coronavirus lo chhuah dan China in thup leh zep pil hmak a duh chu, English țawng hmang ram panga US, Canada, UK, Australia, New Zealand ram enthlatu (spy) țang rual "Five Eyes" te chuan hriatsak an duh loh tawp kha hriain, hemi thu ruk tawp ziakna engtin tin emaw phek 17 zet mai chu an neihsak thei tlat mai a, hei hian "International transparency" dan nasa takin a bawh chhia tih an sawi chuan Khawvel a barakhaih hle a ni.
"Mihringte inkai chhawn theih ngei a ni tih finfiahna hi December 2019 thla bul lama hriat a ni tawh chungin People’s Republic of China hian khan a pha lui tlat a ni, " tiin Five Eyes Intelligence chuan a sawi.
Dr Li Meng-Yan hian hetiang thu hi sawi mahse Coronavirus lo chhuahna hi mumal taka (scientifically) a tuna pawm dan erawhchu China khawpui pakhat Wuhan ațanga lo darh chhuak tih chin hi a la ni a, Chinese lab ațanga put chhuak ngei a nih thu hi finfiahna rintlak leh innghahna tlak a la awm rih lo a ni.
Post a Comment