CHINA IN RAFALE JET A HLAU - DASSAULT BIHCHIANNA

CHINA CHHUANVAWR J-20 hi 4th Generation a ni : DASSAULT AVIATION COMPANY BIHCHIANNA

France company-Dassault kutchhuak thra zet mai, tunlai thiamna thar ber bera thuam indo thlawhna 5 chuan India ram boruak hipin, Haryana state chhunga Ambala Air Base a han rap chiah chu, Chinese People's Liberation Army Air Force ho an awm hle hle thei ta reng reng lova. Crore 5,9000 lai senga lei, Rafale Jet Fighter chu trawngkam tala dah hniam an tum ru hle niin a lang.

China sawrkar chanchinbu-The Global Time thuchhuah ang chuan, China hian 5th Generation Jet Fighter hi a lo la nei bik lo a nih hmel. Kan hriat angin China sawrkar hian thudik a puangchhuak ngai meuh lova. Ralthuam a neih anga tarlan ṭhin ho pawh hi, a dik hmel ta tlat lo. Technology an hman chungchangah pawh thudik lo pui pui an puangchhuak ni ngeiin a lang.

China sipai Peoples Liberation Army Air Force (PLAAF) chuan an indo thlawhna neih thrat ber nia an sawi Chengdu J-20 chu 5th Generation thiamna hmanga thuam niin an sawi ṭhin a. Hei hi thudik niin a lang lo bawk.

The Global Times in July 31 a a tarlan danin, J-20 fighter chu 4th Generation lo ni rengin. Dassault Rafale chu 3th Generation a tihsak hmiah mai. Chinese Military expert Zhang Xuefeng chuan Rafale chu Sukhoi Su-30 MKIs aia changkang hret chauh a ni a, Indian Air Force tan han chhuan tham a tling lova, eng ual a ni pha lovang,tiin a sawi.

Global Times hian Rafale chu a dah hniam ang reng hle mai a. Ramdang jet fighter, 3rd Generation te aiin a san bikna a awm lova, Stealth hmang thei J-20 nena khaikhin chi a ni lo, a ti. Global Times in a tarlan hi thudik a nih si chuan, China hian thudik tawklo a lo thehdarh tihna a ni dawn a. PLA leh Global Times thusawi hi a inperhsan ta hle a ni. China hian Jet Fighter 5th Generation hi a lo la nei bik miah lo, nia ngaih theih a ni.

Dassault Rafale hi 3rd Generation a ni lo hrim hrim a. Global Times in huaisen mangkhenga 3rd Generation a han ti mai hi, an kawhmawh zia le luhlul zia a tarlang chiang ber awm e.

India in a chhuan em em Rafale hi 4.5 Generation thiamna hmang pha ngat a ni, tih China hian a hre lo nge a haider luih zawk. Nge, 5th Generation Jet an neih loh vangin India thlawhna thar hi Chinese mipui te hriatah a dahhniam mai mai zawk?

Kan hriat tur chu, 4th Generation aircraft ho hian stealth an hmang pha lova. Stealth hmang pha tur chuan 4th Generation aia sang a ngai a ni. Chengdu J-20 hi PLA te sawi ṭhin angin, 5th Generation a nih loh chuan, Stealth Fighter a ni thei lo hrim hrim a. Global Times sawi hi a dik a nih chuan boruak lama inbeihna lo awm ta se, China hi India aiin a sang bik dawn lo, tih a chiang mai awm e. India in a lei tur zawng zawng a dawn kim hunah chuan, China hian India pawi a khawih khat tawh viau mai thei a ni.

Rafale jet fighter hi 4.5 generation ngat, hmelma radar in a man fuh theih loh tura thuam a ni. Reduced Radar Cross-Section (RCS) leh Infrared Signature vuah vek a ni a. China radar in a man thei dawn lova, a rukin a duh na lai lai a bomb zung zung thei dawn a ni.

Indian Air Force thawm chak nana theihtawp lo chhuahtu leh, Rafale jet leina tura sulsutu, Indian Air Force Chief Marshal hlui BS Dhanao chuan Rafale hi “Game Changer” tih hialin a lo sawi tawh a. Chinese J-20 hian a el pha dawn lo hle niin a sawi a. Hemi chhan nan hian the Global Times hian 3rd Generation a rawn ti ve leh niin a lang.Mahse, Engvanga Chengdu J-20 hi 4th Generation rawn ti ta mai nge a ni? Tih chu zawhna lian tak a ni. The Global Times hian tihpalh thilthuin 4th rawn ti ngawtin a rinawm lova. Chengdu J-20 nihna dik tak a rawn tarlang zawk niin a lang.

Rafale hi Chengdu J-20 aiin sang lo se, engvangin nge the Global Times hian a buaipui tehlul ang? India sawrkar in vawikhat mah Chinese ralthuam chungchang a sawi kan hre ngai lo. A mamawh a lei a, duh a thlang mai a ni. China in heti taka a lo enghelh hi, India hnung a hnawt mai dawn ni a a inngaih vang a ni thei bawk a. Kan India ram, “Hamara Desh” hi a duai bik ta lo hle. Chinky hoin min ngam dawn lo.

 DASSAULT AVIATION COMPANY BIHCHIANNA

France Company Dassault hi military leh civil aircraft siamtu hlun niin, an kutchhuak hi rambung 90 laiin an hmang a. Aircraft hrim hrim hi chi 100 chuang an nei a, rambung hrang hrangah thlawhna 10000 lai an thawnchhuak tawh bawk. Hnatawktu mi 11500 an awm a. Heng zinga 80% chu France rama awm an ni.

Civil hman tura siam thlawhna hi Falcon tiin an koh a. Military bik hi chi thum an siam tawh a, Rafale chu kan hre fur tawh mai a. A dang pahnih te chu Neuron leh Multi-Mission Falcon an ni.  India in a leina ang chuan Rafale jet fighter pakhat man hi India pawisa in crore 670  vel a ni a. Neuron hi Euro 25 million a ni, chu chu India pawisa in crore 220 man bawr vel a ni. 

Kum 1929 khan a dintu hming chawiin Marcel Bloch tiin bul an tran a. A trum 4 nan 1990 khan company hming thlak leh in, Dassault Aviation ti a ni leh ta a ni. Tunah hian kum 91-na a hmang mek. Dassault company hlutna zawng zawng belhkhawm hi Euro 16.973 billion zet a ni.

France ram economy innghahna pui ber chu thlawhna siam chhuah lam a ni daih mai. Aircraft, helicopter leh spacecraft hi an thawnchhuak nasa em em mai a. Kum khatah USD 35,717 million lai an lalut thei.

A dawt leh a chuan, damdawi leh hmanrua lamah thiamna sang tak an nei bawk a. Kum khata an sum lakluh hi USD 27,453 lai a tling bawk a ni. 

A pathumnaah chuan, France company siam car te hi ram dangah hralh a tla hle bawk a. A larzual te chu, Bugatti, Renault leh DS te an ni. Car siam aṭanga an sum lakluh hi USD 19,311 million zet a ni.

France in ram danga a thawnchhuah lian ber berte hi automobile technology lam thiamna a tam hle a. A dawtah chuan chemical lam thil a ni. India ram angin Agriculture lamah hma an la nasa lem lo a nih hmel. India in Rafale a leina ringawt hian buhfai bag eng zat tak man ang maw? Mau leh sawhthing ai chuan thlawhna siam lam hi an tan chuan a hlawk zawk fe tak ang.