Zoram mipuite hian kan ram hi ‘Lalpa zawn chhuah ram’ tiin chhuang takin sawi ṭhin mah ila, min zawng chhuaktu Krista leh a taksa Kohhran inzawmna ngheh zia te, ‘chu kohhran chu enge a nih‘ tih te, kohhran hlutna, pawimawhna leh a ṭobul hriatchianna kawngahte hian kan pachhe hle niin a lang a. Hei vang hian rinna kawngah te, rawngbawlnaah te, kohhran inrelbawlnaah te, mimal nun thlengin harsatna leh buaina kan tawk fo ṭhin niin a lang. Kohhran ṭobul leh a nihna dik tak te, ringtute tana a hlutna leh pawimawhna te hi ringtu mipuite hian kan hriat chian a pawimawh tak zet a, chuvangin kohhran dik tak chu Bible leh mithiamte lo sawi tawh behchhanin a tawi thei ang berin i han chhui chiang dawn teh ang.

Tunlaiin mi ṭhenkhat ten, ‘Kohhran chu sual lak aṭanga koh chhuah mimal tin hi kan ni mai a, denominations pawl hrang hrang, Pressbyterian, Salvation, Baptist, UPC etc. te hi kohhran an ni phak lo,’ tiin an lawina kohhran ngei pawh an hmu kohhran thei lo fo ṭhin a, khawvel pawl (organisation) pakhat ang chauhah ngaiin, an thinlunga kohhran an hmuh dan chu khawvel pawl dangte aiin a chungnung chuang bik lo hle a. Vawiina ‘Ringtute inpawlkhawmna pawl Thuthlung thar Kohhran’ hi Lal Isuan a thinsena a lei leh a din, Krista thisen hrin chhuah, Lal Isua leh Tirhkohten ‘Kohhran’ tia an sawi ṭhin kha a ni tih an pawm lo va, Lal Isua thisen hrin chhuah kohhran a nihna tak leh ringtute tana a hlutna pawh an hrethiam phak lo fo ṭhin. Hei vang hian kohhran chungchangah inhnialna a awm fo ṭhin a, kohhran rawngbawlna pawhin harsatna a tawh phah fo ṭhin.

Mi ṭhenkhat chuan Bible-a kan hmuh Tirhkoh Paulan ‘Kohte’ tih ṭawngkam a hmante (Rom 1:6,7 – 9:24 – 1 Korinth 1:2, 24), Paula leh Peteran ‘A kotu che u’ tih ṭawngkam an hmante, (Galatia 1:6 – 5:8 – 1 Thesa 5:24 – 1 Petera 1:15 – 2:9 – 5:10) hengte hi, ‘ringtu mimal tin hi kohhran chu kan ni mai’ tia ‘Kohhran’ hrilhfiahna ṭanfung atan an an hmang ṭhin a. Tin, Pathianin Abrama (Abrahama) a koh chhuah te kha ringtu mimal hi kohhran kan ni e tih ṭanfungah te an hmang bawk ṭhin. Mahse, hengte hi Kohhran = Ekklesia = Churh sawina an ni lo va, Lal Isuan Kohhran din tura mimal tin khawvel mi nihna aṭanga ‘A mi’ ‘A ta’ ni tura min koh hranna, ‘ko hrang, ko chhuak’ (ziak zawm loh a ni hi) sawina an ni zawk a ni.

Ringtu mimal tin hi khawvel mi nihna aṭanga a koh hran, a koh chhuah chu kan ni tehmeuh mai, mahse, chutianga mimal a koh hran, a koh chhuah chu Bible-in Kohhran a tih hi a la tling phak lo va, mimal tin a koh hrante, a koh chhuahte chu thlarau lamah taksa pumkhatah siamin kan lo awm a, chu taksa pumkhata siama lo awm tak mai chu Bible-in ‘Kohhran’ (ziak zawm a nih hi) tia a sawi chu a ni tih hi kan sawihawnna han ni phawt teh se. [Ziak zawma ‘Kohhran’ (collective noun) leh ziak zawm loha ‘koh hran’ = ‘koh chhuah’ (noun phrase) te, ‘ko hrang, ko chhuak’ (phrasal verb or verb phrase) tih hi a awmzia leh nihna a hrang daih a ni.]

Kohhran ṭobul: Aw le, a hmasain kohhran lo pian chhuah dan han sawi dawn ila. Thuthlung Hluiah khan Kohhran hi la awm lo mahse Pathianin ‘Thuthlung Thar Kohhran’ din tura a buatsaih ṭanna hi Thuthlung Hlui hun lai aṭang daih tawh khan a niin a hlimthla min lo hmuhtir tawh a. Pathian chuan a hmangaih suala tlu tawhte chu chhandam leh a duh a, Abrahama hnenah chuan, “Nangmahah chuan leia hnam tin an la thawveng ang” a ti a (Genesia 12:3). Tichuan, leia hnam tin thawvenna tur Krista a lo lan hmain Abrahama thlah hnam pum pui chu Pathianin tih tur bik neiin khawvel hnam tam tak zing aṭangin a koin a thlang a. (Deut 7:6, Ex 19:6). Chutiang chuan tih tur bik neiin Hebrai hnam chu khawvel hnam tam tak zing aṭangin a koin a thlang bik a, hei hi ‘Thuthlung Thar Kohhran hlimthla hmasa’ chu a ni phawt a.

Tichuan, hei bakah hian, hnam thianghlim ni tura a koh leh a thlan bikte hnenah chuan Pathian chu a inhrirttir hmasa a, a hnam pumin emaw, ‘an aiawh mi engemaw zat lek emaw’ te chu a hmaah inlan turin a ko fo ṭhin a. Tin, Lalpan tih tur bik neia a koh leh a thlan Israel hnam pumpui emaw, an aiawha a koh mi engemaw zat emawte chu ‘Lalpa mipui pung khawmho’ tih an ni bawk ṭhin a (Num 16:3).  Chutianga Pathian kohna avanga a hnam pum ang emaw, aiawh mi engemaw zat lo kal khawm, pung khawmte chu Hebrai ṭawngin ‘Qahal’ tih a ni a, hei hi Thuthlung thar lamah Greek ṭawngin ‘Ekklessia’ tih a ni a. Hei hi ‘Kohhran‘ tih ṭawngkam lo chhuahna leh a ṭobul, Thuthlung thar kohhran hlimthla anga ngaih theih leh sawi ṭhin chu a ni.

Tichuan, Pathian hnam thlan Israel-te chuan Pathianin a koh chhan an tihlawhtling thei lo va. (Hetianga Israel-ten koh an nih chhan an tihlawhtling thei lo hi Pathian chatuan remruat sa rêng a ni a, he lam chu chhui thui lo ila.) Tichuan, chu hna chhunzawm tur chuan leia hnam tin thawvenna tur Krista chu Pathian chatuan rel lawk angin leiah a lo piang a, Thuthlung Hluia a koh hran, a thlan bikte, Pa lungawina tlin zo lo hote thlakna turin ‘Thuthlung Thar kohhran’ a rawn din ta a, chu chu, ‘Pathian kohhran pawl Kristaa awmte’ (1 Korinth 1:2) tiin sawi ṭhin a ni a, hei hi Kristiante sawina a lo ni ta bawk a ni.

Hetianga Lal Isuan ‘Kohhran’ a dinna turah hian a tirin zirtir sawmpahnihte a ko phawt a, chumi hnuah sawmsarihte a ko leh a, chungho hmang chuan hmun hran hranah ‘Kohhran’ din hna chu a han thawk ṭan ta a. Chung zinga Kohhran ding hmasa ber chu Jerusalem kohhran a ni a, Pentikos Niah khan Thlarau Thianghlimin a rawn thuam a, chuta ṭang chuan Thuthlung Thar kohhran chu a nih tur angin a pian a lo kim ta a, Pentikos ni hi Thuthlung Thar kohhran pian ni leh din ṭan ni a lo ni ta a ni.

Tichuan, Thuthlung Thar Kohhran chu, ‘Krista avanga chhandamna changtute inpawlkhawm, Pathian pawl khawvela awm, khawvel chung lam aṭanga awp, Chanchin Ṭha hril tura nun leh rawngbawlnaa Pathian a laipui bera dah tlat Pawl Thianghlim’ tiin hrilh fiah a ni ṭhin. Lal Isuan a thisena a lei, Thlarau Thianghlim hmanga serh hran a ni.

Kohhran chi hniha sawi dan: Kohhran hi chi hnihin sawi theih a ni a, chu chu han sawi fiah dawn ila. A pakhat zawk chu Hmuh theih loh kohhran (universal church) tih a ni a, pakhat leh chu Hmun theih kohhran (local church) tiin an sawi ṭhin. A pahnih hian thil inzawm tlat, ṭhen hran theih reng reng loh a ni. (Kan la sawi fiah chho zel ang.)

Hmuh theih loh kohhran: Hmuh theih loh kohhran (Universal church) awmzia chu hei hi a ni. Khawvel pumpuia ringtu dik tak awm zawng zawngte, hmana mi leh tuna mi te, nakina lo la awm tur zawng zawng te pawh, kan zavaiin Kristaah chuan pumkhat kan ni vek a, chutianga Pathian ringtu dik tak zawng zawng, Kristaa pumkhata hruai khawm leh phuar khawm, Kristaa taksa pakhata siam chu ‘Hmuh theih loh kohhran (universal church) tia sawi chu a ni a. Krista chu kohhran lû niin, kohhran chu a taksa, a mo, a famkimna (Krista famkimna) a ni. Thlarau Thianghlimin a tithianghlim a, A ropuinaa Kohhran hmelhem lo, ropui leh hnehtu nia a hlan tur chu a ni.

Hmuh theih Kohhran: Hei hi Hmuh theih kohhran (Local Church) lo pian chhuah dan chu a ni.

Hmuh theih loh kohhran (universal church), Kristaa taksa pumkhat ni tura Thlarau thianghlim hmanga phuar khawmte tan chuan, hmuh theih loh thlarau lam chauha pumkhat chu he khawvel Setana lalna rama awm chhung atan hian a la tawk zo lo va. Tin, hmana mi thi tawhte leh tuna mite, lo la piang turte chu thawhho theih a ni lo va, khawvel chhim leh hmar, chhak leh thlanga mi pawh thawhho vek phak a ni lo bawk a. Chuvangin, khawvela Pathian mission hna chawl lova a kal reng theih nan hmuh theih lamah pawh ringtute chu englai pawha mumal taka phuar khawma an awm reng a ngai a, chuvangin, mumal taka pawl hming leh inkaihhruaina dan te neia taksa pumkhata siam an ngai a. Chu chu Pathianin he khawvela a mite awm dan tura a ruat dan tak pawh a ni bawk a. Chutianga pawl hming leh dan te neia an lo awm takah chuan hmuh theih kohhran a lo ni ta mai a. He hmuh theih kohhran tak mai hi Bible-a Lal Isua leh Tirhkohten an hun lai pawha ‘Kohhran’ tia an sawi ṭhin, Pathianin he leia a thilte, mimalin enkawla a phurh zawh loh enkawl leh phur tura a ruat, a tak taka Lal hna thawk ṭhintu, Lal Isua’n a thisena a din Kohhran hmuh theiha lo lang chu a ni. (Qahal – Eddah/ Ekklesia – Synagog).

Tichuan, Hmuh theih kohhran (local church) nihphung chu hetiang hi a ni. ‘Kristian Thurin pawm ‘Pawl’, Bible-a innghat, Tirhkohte zirtirna uluk taka pawm leh innghah nana hmang kohhran, ringtute leh an fate awmna Kohhran pawl tin hi a ni. He hmuh theih Kohhran hi eng lai pawha he khawvela Pathian thilte enkawlna kawnga Pa chan chang ṭhin, Chanchin Ṭha puan darh hna ki pui kawltu, hun harsa leh hlauhawm hnuaiah pawh ringtute tan ‘Kulhbing,’ ringtuten sual doral a huhova kan dona leh kan intihchak tawnna hmun a ni a. He hmuh theih kohhranah hian Pathian thu puan chhuah a ni a, Lalpa sacrament-te uluk taka buatsaih a ni a, Dan leh inthununna te vawn leh kenkawh tlat a ni.

Tichuan, Hmuh theih kohhran hi Hmuh theih loh kohhran nen ṭhen hran theih loha inzawm tlat a ni a, an nihphung ve ve ngun taka kan ngaihtuah chuan, ringtu mimal tin hi Kohhran ni mai lovin, taksa pumkhat ni tura Thlarau Thianghlim hmanga phuar khawm an niha, taksa pakhata siam an lo nih hnuah ‘Kohhran’ nihna chu a pu phak ta chauh ni.

Pawl (denomination) hrang hrang lo awm dan: (A kaih tawi theih ang berin sawi dawn ila.)

Hun a lo kal zel a, ringtu an lo pung telh telh a, hun laihawl kohhranah khawchhak leh khawthlang kohhran chu ‘filogue controversy’ avangin an lo inṭhenin, reformation period aṭangin pawl hrang hrang a lo awm bawk a. Heng hi a chhan chu, mihring famkim lo karah chuan Pathian thu hrilhfiah duh dan te, rawng bawl duh dan te, pawl kaihhruai duh dante a lo thuhmun vek reng thei lo va. Tin, khawvel hmun hrang hranga cheng hnam hrang hrangte chu hmun khatah lawi khawm vek phak a lo ni ta lo bawk a. Chungte avang chuan a remchan dan ang zelin pawl hming leh dan hrang hrang neia awm hran thliah thliah a lo ngai ta a. Chutianga pawl hming leh dan hrang hrang neia an lo awm hran thliah thliah takah chuan ‘Denominations’ tih a lo ni leh ta mai a ni.

Mihring famkim loten Pathian chatuan remruat, a thuk zia leh zau zia chhui sen rual loh kan hriat kim sen loh avanga hriat dan leh pawm dan a lo inang lo va, ngaihpawimawh zawng pawh a lo inan vek loh avanga pawl hrang hranga kan lo awm hran thliah thliah avang hian, Pathian chuan famkim lohna rama la awm ‘A kohhrante‘ chu a hnawl phah hauh lo va, rem hre takin an ṭangkaina tur hmun ṭheuhah a hung mai zawk a, a thlarauin hmaih nei hauh lovin a uap tlat reng tho va. (Helai chungchang hi hnung lamah fiah zawkin kan la sawi nawn leh dawn a ni.)

Chuvangin, khawvelah kohhran pawl hrang tam tak awm mah ila, a laipuia Isua Krista dah leh ‘Krista Lungpuia innghat’ apiangte chu lang thei lamah pawl hming leh inkaihhruaina dante nei hrangin awm mah ila hmuh theih loh thlarau lamah chuan kohhran pumkhat leh taksa pakhat kan ni reng tho va. Khawvelah chuan remchan zawkna avangin pawl hrang hrangah kan awm a, thlarau lamah chuan Lei leh Vana Pathian mite zawng zawng huap zo pawl, ‘Huapzo Kohhran’ tia sawi a ni ṭhin.

Tichuan, leiah chuan he Hmuh theih Kohhran hi ringtute inpumkhatna tur, sual doral kan hmachhawn hona tur, kan intihchak tawnna tur, Pathian thilte a huhoa kan enkawlhona tura Lal Isua’n a thisena min din sak chu a ni a, van kohhran hlimthla, he leia van lam thil kan lo tem lawkna a ni a, ringtute tan he hmuh theih kohhran hi ‘Beram huang’ a niin, keini ringtute hi ‘Beramte’ kan ni a, ‘Beram vengtu’ chu Krista a ni.

Amaherawhchu, kohhran hi chhandamna ki pui ber a ni lo tih hria ila. Chhandamna chu “Rinna avanga khawngaihnaa chhandam” tih a nih kha. Chuvangin kross lera chhandamna changtu ang khan hmuh theih kohhrana tel ve hman ta lo pawh awm theih a ni a, amaherawhchu, tel duh lo leh ngainep nen chuan a dang daih a ni. Tichuan, Kohhran chu ringtute inpumkhatna, Lal Isuan a thisena a din, taksa pakhata min siamna chu a ni a.  “Kan zain, Juda-te emaw, Grik-te emaw, bawih emaw, bawih lo emaw, taksa pumkhata awm turin Thlarau pakhat chauhvah baptis-in kan awm ṭheuh si a, Thlarau pakhat chauh min intir ṭheuh bawk a.” (1 Korinth 12:13)

Chutih laiin khawvel a la nih avangin kohhranah chuan Buh lem te pawh an inzep ve thei reng bawk a, Nikin Ni rorel hunah Pathianin a la thliar mai dawn a ni.

Kohhran dik leh dik ziktluak lo: Aw le, hmuh theih kohhranah chuan Kohhran dik leh dik ziktluak lo, Lal Isuan a din chhan phawk fuh leh fuh lo deuh a awm theih avangin a dik leh dik lo chu Bible aṭang leh an rah aṭangin point pali lek hmangin i han sawi fiah dawn ila. Chutih rualin dik ziktluak chiah lo deuhte pawh hi Pathian ngilnei leh khawngaihna ngah chuan thlauthla nghal mai lovin kawng dikah hruai luh a tum hram reng ṭhin tih kan hre reng dawn nia.

Kohhran dik chuan Isua Krista rin chauh hi chhandamna atan an pawm tlat a, kohhran dik lote chuan Lal Isua aia ngaih pawimawh leh buaipui lian zawk an nei fo ṭhin. Eg. Pawl ram, hnam thuthlung, sakawlh etc.
Kohhran dik chuan la hre lote hnena Chanchin Ṭha hril an ngaipawimawh ber ṭhin a, kohhran dik lo chuan la hre lote hnena Chanchin Ṭha hril aiin hre tawh sate an pawla hui luh tumin ṭan an la fo ṭhin a, pawl dangte an nêkin an sâwt fo bawk ṭhin.
Kohhran dik chuan an kohhran inkaihhruaina dan leh hrai piah lamah Krista tana thawhpui theih apiang an thawhpui thiam ṭhin a, kohhran dik lo chuan an kohhran hmalakna bik a nih loh chuan tumah an thawhpui hlei thei ṭhin lo va, anmahni chauh chu dik berah inngaiin mi dangte chu van ram pawh kai ve lo turah te an chhuah mai fo ṭhin.
Kohhran dik chuan an chenna ram leh khawtlang siam ṭhat an tum ṭhin a, kohhran dik lo chuan hmuh theih loh thlarau lam thil chauh an lungkhamin taksa lam thil an hlamchhiah ṭhin.
 
Kohhran hming leh a nihphung sawi fiahna: Lal Isua chuan amah ringtute hi he khawvela kan awm chhung hian mahni duh dan dana tla darh lova inpawlkhawma intichak tawn tur te, hmelmapa Setana beihna laka inveng tawn tur te, amah vana a lawn hnuah pawh a huhova a thu puandarh hna thawk chhunzawm zel tur te, he khawvelah hian Pathian thilte enkawla hum him tlat tur tein min ruat a.

Pathian hian a mite hi Thuthlung Hlui hun lai aṭang tawhin a huhoin a awm tir zel ṭhin kan tih tawh kha. Chutiangin Lal Isua pawhin a dam lai aṭang tawh khan a Pa thu angin amah zuitute kha mal tlat tir lovin a huikhawm tlat zel a, a thih hnuah pawh Tirhkohte kaihhruaiin an inpawlkhawm chhunzawm zel a. Chutianga Isua zuitu, a thisena a tlansa intelkhawm tlat te chu khang hun lai khan ‘Lalpa mipui pungkhawmho’ tiin an ko ṭhin a. Pungkhawmho tih chu khang hun laia an ṭawng tualleng leh Bible (Thuthlung thar bik) ziakna hmasa Greek ṭawng chuan ‘Ekklesia’ tih a ni a, chu chu sap ṭawngin ‘Church’ tiin an letling a, mizo ṭawngin ‘Kohhran’ tiin kan lo letling leh ta a ni.

Tichuan, Kohhran chu Krista’n a thisena a tlante, mal tlat tir lova inpawlkhawma taksa pumkhata a siam, Thlaraua a uap tlat leh chhandamna banga a hung tlat chu a ni a. Amah Krista chu Pa Pathian ruat angin Kohhran Lu a ni a, Kohhran chu a taksa a ni.

Efesi 1:22-23 “Tin, thil engkim a ke hnuaiah a dah a, amah chu engkim zawng zawng chungah lu atan kohhran hnenah chuan a pe a, kohhran chu a taksa a ni, engkim engkima tikhattu famkimna chu.”

Hengte hi han bih chiang ila (Bible lehlin thar aṭangin): Mathaia 16:18 “Tin, nang, Petera i ni tih ka hrilh bawk a che; he lungpui chungah hian ka kohhran ka rem chho vang a, mitthi khaw kulh kawngkharte chuan a ngam lo vang.”

Mathaia 18:17 Tin, anni chu a ngaihthlak duh loh chuan kohhran hnenah thlen ang che; kohhran pawh chu a ngaihthlak duh loh chuan ani chu i tan Jentail leh chhiahkhawntu ang ni rawh se.”

Tirhkohte 7:38 “Amah chuan thlalera pung khawm zingah Sinai tlanga amah betu vantirhkoh chu a lo chhawn a, kan pute hnena thu sawi thina, min pek chhawn tur thu nungte pawh dawngtu a nih kha.”

Khing Mathaia ziaka kohhran sawina ṭawngkamte leh Tirhkohte 7:38 a kan hmuh, thuthlung hlui hun laia Sinai tlanga Pathian thu avanga mipui pungkhawm a sawite khi Bible ziak hmasa Greek ṭawngah chuan ‘Ekklesia’ tia sawi an ni vek a. Grammar ah chuan Ekklesia tih awmzia chu ‘inhmukhawm, pung khawm (assembly)’ tihna mai a ni a, mahse Bible chang tar lanah te hi chuan ‘Ekklesia’ tih ṭawngkam chu Pathian avang leh Pathian be tura pungkhawmte sawi nan a hmang vek a. Tichuan Lal Isuan ‘Ka kohhran’ tia a sawi leh Tirhkohten ‘Kohhran’ tia an sawi ṭhin chu Pathian hming avanga mipui pungkhawm (Ekklesia) a ni vek a, a awmzia lo lang ta chu, kohhran chu ringtu mimal ni mai lovin, Krista avanga an lo inhlawmkhawma thlarau lama taksa pumkhata siam an lo nih chiah khan Kohhran tia sawi a ni ta chiah a ni.

Tin, Thu Puan 1:20 ah chuan, “Ka kut ding lama arsi pasarih awm i hmuhte leh, rangkachak khawnvar dahna pasarihte thuruk chu. Arsi pasarih chu kohhran pasarihte tirhkoh an ni a; khawnvar pasarih chu kohhran pasarihte chu an ni e.” tiin kan hmu a.

Heta kohhran pasarihte tia a sawi hi Ephesi khuaa kohhran te, Smurna khuaa kohhran te, Pergamos khuaa kohhran te, Thuatira khuaa kohhran te, Sardis khuaa kohhran te, Philadelphia khuaa kohhran te, Laodikei khuaa kohhrante an ni a. An vai hian mimal sawina an ni lo vek a, khaw khata ringtu inhlawmkhawm pawl, kohhrana lo insiam ta sawina vek an ni a. Heta ṭang pawh hian ringtu mimal chu Bible-in kohhran tia a sawi hi ni lovin, ringtu inpawlkhawm taksa pumkhata lo insiam ta kha kohhran tia a sawi chu a ni tih a hriat theih bawk a ni.

Hei hi han en leh ila: Mathaia 16:18-19 Tin, nang, Petera i ni tih ka hrilh bawk a che; he lungpui chungah hian ka kohhran ka rem chho vang a, mitthi khaw kulh kawngkharte chuan a ngam lo vang. Vanram chabite ka pe ang che a, lei chungah eng pawh i phuar apiang vanah phuar a ni ang a, lei chungah eng pawh i phelh apiang vanah phelh a ni ang,” (CL)

Lal Isuan ‘He lungpui’ a tih hi amah ‘Krista Pathian nung Fapa’ a insawina a ni tih chu kan hriat vek hnu a nih avangin sawi thui lo mai ila. Tichuan kan hriat atana pawimawh lai chu, Lal Isuan amaha a rem chhoh tur chu ‘Ekklesia’ tih ṭawkam a hman avangin ringtu mimal a sawinna mai ni lovin, amah avanga inhlawmkhawma pumkhata lo insiam ta kha a ni a. Chutianga ringtu pungkhawm/inhlawmkhawm taksa pakhata lo piang chhuak ta (Ekklesia) chu Mizo ṭawnga Kohhran kan tih hi a lo ni ta a ni. Mimal chu Ekklesia a ni phak lo va, an lo inhlawmkhawma taksa pakhata an insiam chiah khan Ekklesia = Church = Kohhran a lo ni ta chiah a nih chu.

Tin, Tirhkoh Paulan, “Tupawh Kohhran hotua ṭan duh chuan hnathawh ṭha a duh a ni,” a tih leh, “Pathian chhungte chu Pathian nung Kohhranho, thutak ban leh innghahna chu an ni” a tih aṭang pawh hian tirhkoh ten kohhran an sawi hi mimal a ni lo tih a hriat theih bawk.

Hei pawh hi han en leh ila. Tirhkohte 14:21-23  “Tin, chumi khuate hnenah chuan Chanchin Tha an hrilh a, zirtir tam tak an siam hnuin Lustra khuaah te, Ikonion khuaah te, Antiokei khuaah te an kir leh zel a, “Hrehawm tam tak tuarin Pathian ramah kan lut tur a ni reng a ni,” tiin zirtirhote rilru an tinghet a, rinnaah chuan awm reng turin an fuih zel a. Tin, kohhran pawl tinah chuan upate an ruatsak a, chaw nghei chunga an ṭawngtai zawhin, an rin Lalpa hnenah chuan a kawltir zel ṭhin a.  Hengte hi ngun taka kan en chuan, khaw hrang hranga awm ringtute, anmahni awmna hmun ṭheuha hmuh theih leh hmuh theih loh lama inpawlkhawma taksa pakhata siama awmte chu Bible-in ‘Kohhran’ tia a sawi chu a ni tih kan hrefiah thei ang.

Tichuan, kan hriat fiah lehzual theih nan heti hian han sawi leh ila. Lal Isuan a thisena kohhran a din chhan pawimawh tak chu hei hi a ni. Ringtute hi Setana lalna ram khawvelah kan la awm si a, mumal taka phuarkhawm kan nih lohva kan maltlat chuan sualin awlsam takin min hneh mai thei dawn a, chuvangin, mihring remhriatna ni lovin, Lal Isua lo sawi lawk tawh ang leh Thlarau thianghlim hruaina ang zela inhlawmkhawmin, ringtu mi tam takte chu taksa pakhatah siamin kan lo awm ta a, chu chu Kohhran chu a lo ni ta a ni.

Tichuan, mihring inhlawmkhawm leh thawkho chuan pawl hming leh dan te neih a lo ngai ta a. Chuvangin kohhran (Ekklesia) chuan a ṭulna avangin pawl hming leh dante a lo nei ta a. Pawl hming leh dante hi kohhran ti kohhrantu a ni lo va, kohhran dik tak chu pawl hming leh dan a lo pian hmaa piang hmasa zawk, ringtu pungkhawm taksa pakhata lo insiam ta, Thlarau thianghlim hmanga taksa pakhat ni tura phuar khawma kha a ni a. Pawl hming leh dan te hi chu mamawhna avanga lo piang chhunzawm ve chauh a ni zawk a ni.

Atirah chuan Kohhran hmasate kha an awmna ram leh khaw hmingtea koh an ni mai ṭhin a, eg. Jerusalem kohhran, Korinth Kohhran etc. ti tein. Tichuan Kristian an lo pung zel a, Judai ram leh a chhehvel mai ni lovin khawvel ram hrang hrangah pawh ringtu an lo pung zel a. Chutianga khawvel ram hrang hranga awm hnam hrang hrangte chu an remchan dan te a lo inchen vek thei ta lo va, an inrelbawl duh dan pawh a thuhmun vek ta lo bawk a, tin, Pathian thu an hrilhfiah duh dan te, rawngbawlnaa an ngaih pawimawh zawng te pawh a lo thuhmun vek thei ta lo bawk a. Chungte avang chuan hming hrang hrang leh pawl inenkawlna dan leh hrai hrang hrang neiin an lo awm ta a ni. Hetiang hian pawl hming leh dan leh thurin hrang hrangte neiin awm mah sela, Kristaa innghata Bible zirtirna pen san lo an nih phawt chuan Pathian Kohhran an nihna a bo chuang lo.

Kohhran chu Krista taksa a ni: Tichuan he kohhran kan sawi hi Lal Isua taksa ngei a ni tih heta ṭang hian kan hre thei a ni. Paula chuan Filipi 3:6 ah chuan heti hian a sawi a. “Ṭhahnemngaih lamah chuan kohhran tiduhdahtu ka ni a” a ti a. Tichuan, Paula chu kohhran mite tiduhdah leh man khawm tura a kal laia Damaska khaw daia engin a chhun tluk khan Lal Isua chuan kohhran chu ama taksa ngei a ni tih chiang takin heti hian a sawi a ni. Tirhkohte 9:5 “Tin, ani chuan, “Lalpa, tunge i nih?” a ti a. Tin, Lalpa chuan, “Isua, i tihduhdah hi ka ni e” tiin.

Kohhran chu Thlarau Thianghlimin a thlahthlam ngai lo: Kohhran leh a chhunga awm kohhran mipuite pawh hi mihring famkim lo kan la nih avangin dik tawk loh chang te a awm ve fo lo thei lo va. Kohhran mipui chu sawi loh, kohhran hnarkaitute zingah ngei pawh tisa leh thlarau lama chak lo deuh te, Pathianthu hrilhfiah duh dan leh pawl inrelbawl dana ngaihdan hrang lo piang te a awm theih bawk a. Hengte avang hian sualin kohhran chhungkhurah thuk takin kua a hreuh ve thei a. Mahse, hengte avang hian kohhran hi Pathianin a kalsan phah ngai lo va, kohhran chhungah sual bumna avangin kalsualna te, buaina te, harsatna te a lo awm pawhin Thlarau Thianghlim chuan kohhran chu harsatna leh buaina ata hruai chhuakin kawng dik a zawh tir leh zel ṭhin.

Tirhkohte hun lai aṭang tawh khan vawiin thleng hian kohhran chuan chhung lam leh pawn lam aṭanga beihna te, harsatna leh buaina te, tihduhdahna te vawi tam tak a lo tawk tawh ṭhin a, mahse Thlarau Thianghlim hruainain a dingchhuak leh zel ṭhin. He kohhran hi Pathianin Thlarau Thianghlima a chen chilh tlat avangin Lal Isua lo kal leh thlengin nghet takin a ding reng dawn a ni.

(Amaherawhchu, khawvel pum huap ngaihtuah chuan Kohhran hi Lal Isua lo kal leh thlengin ding reng dawn mahse, ram bial khat kohhran emaw, khawkhat kohhran emaw te chu kal suain an bopil thei em em thung a, chutianga kohhran bopil ta vang vang chu khawvelah hian tam tak an awm tawh tih pawh kan hre tel dawn nia.)

Tun dinhmunah hian pawl hming leh dan hrang hrangte, Thurin innghahna hrang hrangte neiin awm hrang hlawm mah ila Krista hminga pungkhawm, Krista thisen hrin chhuah, Kristaa innghat, Bible zirtirna zuitu kan nih phawt chuan khawi pawl mah hi Krista Kohhran kan nihna a bo chuang lo va, kan zavai hian bul thuhmun, Pa hmun, Lu pakhat vuan, huang khat chhunga mi kan ni vek a, Lal Isuan amaha a rem chhoh kohhran kan nihna hi englai mahin a bo ngai lo. Chuvangin vawiina Denominations pawlho kan tih te hian kal suala ‘Lu’ Krista’ chu an hransan loh phawt chuan Krista kohhran, amaha innghat leh rem chhoh an nih lohna a awm reng reng lo a nih chu. Pawl hming leh dan te hi chu mamawhna avanga neih chauh a ni kan tih tawh kha, pawl hming leh dan aia piang hmasa zawk ringtu inhlawmkhawma taksa pumkhata insiam kha Kohhran lai tak chu a ni a, chutianga taksa pumkhata insiam hnuah pawl hming leh dante chu a lo piang ve chauh a nih chu.

Kohhran pawl hrang hrang awm hi Pathian remruat a ni: Hetianga kohhran pawl hrang hrang kan awm hi mi tam tak chuan an hrethian lo va, ‘Pathian pakhat bia hmun khata awm khawm thei si lo hi Kohhran dik a ni thei dawn em ni?’ an ti ṭhin a. Mahse, hetianga pawl hrang hrang kan awm hian ṭhatna tam tak a nei zawk a, Pathian rem ruat dan pawh a ni ngei ang tih hi a rinawm hle zawk a ni.

Kan hriat ṭheuh angin Roman Catholic kohhran in khawvel pumah kohhran thuneihna a pumhmawm titih lai khan a lo ropui ta lutuk a, kalsualna nasa tak a lo awm a nih kha. Khang hun lai khan kohhran chu tumahin an sawisel ngam lo va, sorkar meuh pawhin an hlauhtlawn ṭhin a. Chuvangin Pathian hruaina ang zelin Protestant kohhran a lo piang chhuak a, kristianna atan thil ṭha tak a rawn her chhuak ta zawk a.

Tin, hei bakah hian Pathianin khawvelah hian kil hrang hrang aṭanga a rawngbawl hna peng hrang hrang thawk tur mi chi hrang hrang a mamawh avangin mi pakhat emaw, khaw pakhat emaw, ram pakhat emaw, kohhran pawl pakhat emaw chauhin chu chu a kengkawh vek zo lo va, chuvangin Protestant kohhranah pawh rawngbawlnaa hma lak dan leh ngaihpawimawh zawng inang lo, ṭangkai dan inang lo pawl hrang hrang kan lo awm leh ta a. Heng zawng zawng hi Pathian remruat vek zawk a ni. Pawl ṭhenkhatin la hre lote hnena rawng bawl an ngaih pawimawh viau laiin ṭhenkhatin fahrah leh rethei chhawmdawl lam an ngai pawinawh em em a. Ṭhenkhatin ringtute tan zirna leh thiamna lam an ngaih pawimawh viau laiin ṭhenkhatin Pathian thu har hrilh fiah lam an buaipui pui em em a. Heng zawng zawng hi Pathianin a mamawh vekte an ni a, hetiang hian Pathianin atana kan ṭangkai dan tur ang ṭheuhin pawl hrang hrangah min lo ṭhen darh a, thlarau lamah erawh chuan Fapa Isua Krista-ah huang khatah min khung khawm vekin Thlarau thianghlim hruihrual hmangin min phuar khawm tlat thung a. Hengte hi ngun taka thlir chuan kohhran pawl hrang hranga kan lo awm hian ṭhatna tam tak a nei a, Pathian rem ruat dan tak pawh a ni zawk tih hi a chiang em em a ni.

Kohhran mawhphurhna: Kan han sawi tak zawng zawng te kha pawm thei lo kan la awm a nih pawhin heng a hnuaia zawhnate hi a chhanna han ngaihtuah hmasa zet sela, chumi hnuah ngaihtuah ṭha leh sela an chiang tawh ngei ang.

Kan sawi chhunzawm leh hmain hei hi hre hmasa ila. Kohhran chu a hming leh a nihna chauhah kohhran a nihna a innghat lo va, a hnathawh leh a mawhphurhna phurh te, Pathianin a hman danahte kohhran a nih zia a lang bawk tur a ni.

Zawhnate chu: Lal Isua vana a lawn hnu aṭanga vawiin thleng, kum sanghnih zet chhung hian, Khawvela Chanchin Ṭha hrilnaa Pa chan changa khaipa ber nihna hi Pathianin tu chungah nge a nghah? Tin, Lal Isua thuchah Lalpa zanriah sacrament te, baptisma sacrament te hi enkawla vawng him turin Pathianin tunge a hman ṭhin? Tin, vawi tam tak Kristiannain nuai chimih tuma beihna a tawh laiin kohhran anga Pa chan chang an awm tawh ngai em? Tin, Pathianthu zirtirna dik lo laka vawiin thlenga Pathianthu dik hum him ngar ngar ṭhintu hi tunge ni? He khawvela Pathian thilte zawng zawng enkawla mawhphurhna sang tak lo phur ngar ngartu hi tunge? Heng zawng zawng chunga mawhphurhna hi mimal tuin nge la tawh? Mimal pakhat talin kum khat tal pawh hengte hi enkawlin a phur zo tawh ngai em?

Aw le, heng zawng zawng enkawla Pa chan chang tur hian Pathianin kum sanghnih zet chhung chu vawiina kohhran hrang hrang kan tih, Kristaa innghat te hi thlarau lamah hruikhata thlung khawm vekin a lo hmang tawh ṭhin a, a la hmang zel dawn bawk a ni. Tichuan kohhran chu he khawvela Pathian inpui leh a Iptepui bânna, a khawpui, Krista taksa a ni a, hun harsa leh hun khirhah pawh ringtute tan ‘Kulhbing’ a ni reng ṭhin. Tichuan, kohhran chuan hming ropuina chauh a khum tur a ni lo va, he leiah hian Pathian thilte a enkawl bawk tur a ni.

Mi ṭhenkhat ten ngaihtuah chiang mang lo va, ‘Pressbyterian, Baptist, Salvation, UPC etc. te hi kohhran a ni phak lo, kohhran dik chu Lal Isuan sual laka a koh chhuah ringtu mimal tinte hi kan ni’ an tih fo hian kohhran nihna a la thleng phak lo hle a, Bible min zirtir dan pawh a ni lo va, mimal hian kohhran nihna a keng phak hek lo. Hetianga sawi fote hian he khawvela Pathian ram zauh zelna tura kohhran rawngbawlnaah hian harsatna an thlen zawk ṭhin niin a lang. ‘Kohhran dik chu, Kristaa innghat vawiina hming hrang hrang nei, Bible zirtirna nena inmil innghahna Thurin nei ṭheuhva taksa pumkhata insiam “Kohhran Pawl hrang hrangte’ hi kan ni vek e.

Kohhrana tel a pawimawhna: Lal Isuan kohhrana tel pawimawhzia a sawinaah thil chi thum a sawi a, chungte chu- ‘Berampu,’ ‘Beram huang’ leh ‘Beram’ tiin a tehkhin a. (Johana 10:1-11) Ringtute hi ‘beram’ chu kan ni a, beram vengtu chu ‘Lal Isua’ a ni a, beram huang chu ‘kohhran’ hi a ni. Beramte chu huangah an lawi lut tur a ni a, beram, a huanga lawi lut lo chu a him lo va, sakawlh ten an seh ṭhin.

Tichuan hemi awmzia chu, mihring chu Thlarau Thianghlimin misual kan nih zia min hriattir a, tichuan, mi malin Isua Krista nun ṭawmpuia chhandamna kan lo chanin keimahni ang bawka chhandamna changtu mi dangte nen chhandamte huang kohhranah lawi lutin kan chengho ta a ni. Beram huang, chhandamte huanga lawi lut lova huang pawn lama awm chu dinhmun hlauhawm takah a ding tihna a ni a, huang lama a let vat loh chuan a ngam loh sakawlh tawn hun a nei a, thihnaah a inbarhlut nge nge fo ṭhin.

Harhna a lo thlen changte hian mi ṭhenkhatten kohhran hruaitute leh kohhran kalphung duhkhawp lovin an hmu ro fo ṭhin a, ‘He kohhranah hian ka thlarau a leng ve lo ve’ tiin kohhran chhuahsan mai an ching ṭhin a. Fapa tlanbo ang khan an neih sa, an thlarau chan chu an va hmang zo va, Thlarau Thianghlimin a pawl zui lo va, chutih laiin an chhuahsan kohhran chu atir ata vawiin thlengin Thlarau Thianghlimin a thlahthlam ngai si lo va, an beidawn tawpah kohhranah bawk an lo let leh nge nge ṭhin. Luhlul chhuaha let duh lote chu an kal sual thuk tulh tulh a, thihna (thlarau thina) thlenga kal hun an nei nge nge ṭhin.

Chuvangin, kohhran hi Lalpaah a chungnun zia hi kan hre reng tur a ni. Kohhran do chu Krista taksa chunga kut thlak ang a ni a, chuvangin, nuhrawn lakah fahrawnin fa tak chu thiam a chan khalh thei ngai lo ang hian, Pathian hmaah chuan mi tumahin kohhran hi an dinchan khalh thei ngai lovang.

Lalpan ropuina chang rawh se, Amen.

~Ṭpa Ngente

Post a comment

Powered by Blogger.