Kan video hmasa lamah khan China Foreign Minister in Tibet a tlawh thu leh, ralthuam an chhék thu kha kan tarlang tawh a. Tukin zing chanchinbu hrang hrangah Indian Air Force (IAF) insingsat thu kan hmuh leh a. Times of India leh India Today chuan India sipaiten Pakistan ramri hrûlah Light Combat Aircraft Tejas an dah thu an tarlang a. Indo hi a hla tawh lo niin a lang. 

Kan hriat sa vek a ni. China solfa key ang zela che thin chu Pakistan hi a ni. Nimin mai khan China chuan Ralthuam a chhek belh thu kan hmuh a, India tan chuan ramri zawng zawng hi ven uluk a ngai tak zet. A khawi lam mah hi inthlahdah a thiang lo a ni ber. Tlem chuan Bangladesh lam hi ngaih a ngam deuh a, mahse, Muslim rual tam tak, India rama rawn luh tum an awm ve reng a. India hian International border a nei sei sih a, hna a titam em em ta a ni. 

Thenawm ramte chezia enin India tan chuan awm hle hle na hun a ni tawh lo. Theihtawpin eng thil pawh hmachhawn thei turin a inpuahchah ve reng a. Tun tuma Tejas fighter a dah chhan pawh hi, Pakistan atanga beihna hmachhawn tur a ni ber a. China ramri lamah chuan Tejas fighter aia chungnung zawk a hmang turah ngai ang. 

India hian ralthuam tam tak Hindustan Aeronautics Limited (HAL) atangin a order leh mek a. Lei lam inbeihna chu ngaihtuah awm kan ni lova. Tlemin boruak lam inbeihna hi thuam chak a ngai a. Hemi atan hian Rafale leh Lockheed siam khawvela a tha ber ber pawl thlawhna a lakhawm mek a. Tin, ramchhung company te pawhin ralthuam siam hna an thawk mup mup ta bawk. HAL siam Tejas Mark 1A 83 zet chu buaipui mek niin, December 2020 hmaa zawh fel hman beisei a ni. 
Indian Tejas aircraft

Indian Air Force in HAL hnen atanga a lei tur Tejas 83 hi crore 39,000 man tur a ni. Heng ringawt pawh hi Pakistan tan chuan huphur awm tak a ni. India chuan rami ven tur a ngah a. China in jet fighter 5 a neih chuan, India in 7 tal a nei a ngai. 

HAL Tejas hi Single engine, Fourth Generation a ni. Light Combat Aircraft (LCA) an ti mai a, indo thlawhna zangkhai chi, a ni mai chu. Tejas hian MiG-21 ho kha a rawn thlak a. India hian kum 2001 atang khan hmang tanin, tangkai takin a hmang thin. Tunah IAF hian Tejas fighter 324 vel a kawl mek a, 2020 hnu lamah chuan 400 chuang a neih tawh ang. 

HAL Tejas hi ram dang pawhin an duh thu an sawi thin a. Kum 2016 khan Bahrain International Air Show ah Tejas hi pholan niin, United Arab Emirates (UAE) leh Malaysia chuan an duh viau mai a. 

Kum 2018 khan UAE Defence Minister Mohammad Falacy chu India ramah lo zinin, HAL lam hi a dawr a. Tin, Malaysia pawhin November 2019 khan HAL atangin information chi hrang hrang Tejas chungchang hi an lo dil tawh bawk a. Mahse, HAL lam hian ramchhunga hman tur pawh an supply hneh loh avangin UAE leh Malaysia hi a supply thei rih lo a ni.

Ramri buaina lamah han lut leh ila India hian Ladakh ringawtah Sipai 30000 zet a dah tawh a.  Ladakh population hi 2.74 lakh niin, mihring awm zat anga chhut chuan Sipai awm zat hi 11 % vel a ni, a awmzia chu civillian 10 zelah Sipai pakhat awm ang a nih chu. 

India sawrkar chuan China inhnuhdawk hma chu Ramri hrûlah hian sipaite dah a tum a. Tum 5 lai inbiakna awm tawh mahse a tu lam mah inthiarchhuah an tum si lovah chuan, boruak a ziahawm hleih theih tak tak lo a ni. 

Forbes chanchinbu pawhin China J-20 stealth fighter ho chungchang a rawn update ve a. J-20 pahnih chu China hian Himalaya tlangdungah a dah tawh thu Forbes hian a tarlang a. Satellite thlirna atanga a lan dan chuan Hotan Air Base vela J-20 che vel a hmuh thei a. A zat dik tak leh Ralthuam an pai chungchang hriat chian a ni lo. Hotan Air Base hi Ladakh atangin mél 200 vel a hla a ni. 

China chezia en hian, June ni 15 a Galwan inbeihna chungchang media te report kha a dik ngei niin a lang. Chanchin bu hrang hranga kan hmuh angin, India sipai 20 in nunna an chan a, China sipai lam hi 40 chuang an thi ve thung nia hriat a ni a. Hei hi thudik a nih ngei a rinawm ta viau mai. China hian phuba lak a tum ta char char niin a lang. 

Mahse, Pu Modi chuan India sipai te chu an duh hun hunah indo puang mai turin thuneihna a pe zui ta mai si a, China lam hi an huangtau lutuk ngam rih lo a ni. 

Pakistan lamah Tejas a hmang a. China lamah Su-30, MiG-29 leh MiG-29K fighter te a hmang bawk a. Tun dinhmunah chuan ramri hi an véng hneh viau mai. 

China hian J-20 hi 40 bawr vel bak a kawl bik lova, South China Sea lam boruak a dái thei bik si lova, Kashmir lamah hman tur hi a ngah lutuk bik lovang tih a chiang. A chhan chu, helam ai chuan khi lam khi ral rél a khirh dawn, US leh a hote an ni tlat a. He lama pawh a rûkin Russia thiamna India hian tam tak a hmang telh dawn tho bawk a, China hian indo kher kher hi chu a duh viau a rinawm lo.

Tin, Covid19 hmanga politics khél a tum hi, a hlawhsam chiang hle niin a lang. Covid19 lo chhuah atang khan ram 150 chuangah tanpuina a pe a, medical team 32 zet chu ram 30 ah a tirchhuak bawk a. Mahse, China dodalna a nasa hle reng a. Covid19 damdawi chungchanga pawh, Russia nen boruak an neih pha leh a. 

China inrin loh lai tak maiin Russia president Putin chuan  covid19 damdawi a kawl thu a puang thut a. The Global Times chuan chhang nghalin, China in kan siam hmasa zawk, tiin, Company 5  covid19 damdawi siam hlawhtling thei  a tarlan zingah Russia chu a sawi telh duh tlat lo. Video hmasa lamah khan kan sawi tawh a, Russian hian a Air Defence system chhuanvawr S-400 chu China a pe chhunzawm duh tawh loh a nih kha....

Post a comment

Powered by Blogger.