Pakistan in India a Vo: Nuclear a hmang dawn
Nuclear ralthuam thil tihtheihna hi a takin kan la hmu lova, an sawi dan atanga kan hriat ang hi chuan, a hlauhawm hle a, a kaptu pawh a him bîk chiah lo mai thei a ni. Ralthuam hlauhawm tak, ram ropui leh thil tithei entirna ve si hi, tu ram mahin an la hmang lova, thu a inbeihna mai a la ni rih.
Asia khawmualpui ramte zingah US leh a thawhpui te chuan Nuclear Power Plant hi an neih deuh vek tawh a. A sem darhtu chu US a ni. World Nuclear Association in a tarlan danin, Asian ram bikah Australia, Bangladesh, China, India, Indonesia, Japan, Kazakhstan, North Korea, South Korea, Malaysia, Pakistan, leh Vietnam te chuan Nuclear Power Plant hi an neih tawh a. Mahse, ralthuam anga Chher thei hi chu China, India, Pakistan leh North Korea chauh an la ni.
Ram ropui leh thil tithei nihna zia pakhat Nuclear Power hi ram zawng zawngin neih an duh vek. North Korea pawh Nuclear warhead a neih chinah chuan tha te te in an be tawh hi.....
ZeeNews in a tarlan danin, Pakistan Railway minister Sheikh Rashid chuan India a vo nasa mai a. Nuclear warhead hmanga beiah a vo a ni. Pakistan rama News Channel pakhat Samaa TV chuan Sheikh Rashid hi August ni 19 khan interview a neihpui a. India laka nuclear weapon hman dan tur a sawi nual.
Pakistan minister chuan, an nuclear warhead thil tihtheihna (power) an hriatchian thu leh, India ram an kah a nih pawhin Muslim ten an tuar ve dawn loh thu a sawi a. "Nuclear warhead kahna hmun tur kan hre vek" a ti.
Pakistan Minister chuan Indian states zingah Assam chu an target a nih tur thu a sawichhuak a. Mahse, Assam ramah hian Muslim an tam hle sih a, Pakistan Intelligence te hian India rama Muslim tamna pawh an hre si-se loh a ni mahna!
Kan sawi fo tawh angin, Tunlai hian Asian ramte chuan China huangtau dan nan Ralthuam an lei sup sup a. India pawhin Pakistan leh China beihna tur ralthuam a chher ve reng bawk a. Pakistan lah chuan drone bák a lei thei ve si lova, páwr taka tawng bâk hi an tlin loh niin a lang.
Cricket atanga hriat hlawh Imran Khan chuan Pakistan Prime Minister a rawn chelh ve ta a. An economy chhiat zia hmuhin, sawrkar sum renchem nan nasa takin kalphung a thlak nghal a. Pawisa pûk tur zawngin a zinkual a, mahse tu ram mahin helpawl tamna Pakistan hi sum an pe duh tlat lo... An Muslim chanpui Arab ram te ngei pawhin an pe duh mang lova, a awmzia chu, Sudden Muanga tawngkam takin "Mahni pawisaa intihbuai" an duh loh a ni ber awm e.
Tichuan, Imran Khan chuan ram economy siamthat nan Cricket lama a thiamna hman tangkai tur a hmu ta chuang lova, a hmaa Prime Minister te ang bawkin Kutdawh Policy chu a la khél ta zel a. Tun khum thar chhung ringawt pawh hian Asian Development Bank, World Bank leh International Monetary Fund atangin loan a la hnem tawh khawp mai. Imran Khan thlaktu tur Prime Minister tan chuan a phûr awm loh hle. March 2020 thlenga Pakistan leiba tlingkhawm hi US dollar 256 billion zet niin, chu chuh an GDP atanga chhut chuan 98.2 percent lai a ni; Ralthuam han lei belh ngaihna a awm lo hrim hrim.
Pakistan hi a rethei em avangin India tan chuan ram hlauhawm ber a ni thei. India nen hian han indo ta réng se, chawlh kar khat pawh a tang thei kher lovang. Muslim puipa te chuan India laka han tlawm leh chu an hreh sih ang a, Nuclear ralthuam an lo neih ve khanglang si nen, ai kaw tawp tan khawh nan Nuclear ralthuam hmangin India a káp pawp dawn a. India tan pawh tawrh hlel awm tak a ni dawn.
Helho hmangin India a bei reng a. Ramri lamah India sipai thi an awm reng. Heti chung hian India hian a beih hmasa ngai lo. India chuan khawvela ram ropui ni turin beiseina sang tak a neih mék a. Nuclear ralthuam phei chu a sawi ri ngai lo hrim hrim. Pakistan ram dinhmun enin, beiseina sang tak an nei meuh lova, nuclear ralthuam hman mai an duh dawn tih India hian a hriat vang nge, Pakistan hi a beih tak tak duh ngai lova. A huangtau phah réng a ni.
Ram economy a chhiat miau chuan han beisei tur vak an nei lo, Pakistan Minister te hian an Nuclear Ralthuam chu titi tui nan an hmang loh theih loh a ni, a dang awm hek lo le.
US leh a pawl te a lo thlâwp thin avangin Muslim ram zinga Nuclear Power neih hmasa bera a tang thei a. US ralthuam F-16 thlengin a hmang ve hman kha a nia. Mahse, tunah chuan US thléng tlawr a liak pha ta si lova, Eng thil tha mah a thlawn in Jinping in a pe dawn lo tih a chiang si, a che buai ta vek a ni ber.
US President hmasa ten fa mal duat takin an enkawl thin a. Vawiina a dinhmun hi a thleng thei hrâm a ni. Mahse, India tana thil lawmawm em em, Chanchintha ber tur chu Donald Trump an a rawn thlen ta a. Trumpa duh anga Pakistan a khawsa loh avangin January ni 6, 2018 khan USD 2 billion zet tanpuina a titawp sak a. September ni 4, 2018 ah khan military aid 300 million zet a cut sak leh a.
Tichuan, Pakistan chuan US in a thlauthlak ngam tak tak a ring lova, China lam a hawi kual tan a. Mahse an rin angin Donald Trump chuan Obama ang khan Foreign Policy a kalpui ve ta si lova. "US in Pakistan atangin eng thil mah a dawng ngai lo" tiin Trump chuan Pakistan a tanpui thinna zawng zawng chu a tihtawp sak hlen ta a ni. Hei hi India tan chuan thu lawmawm deuh mai niin, cheng khat pawh min pe lo mahse, Trump hian nasa takin India a puih ka ti thei ang. A chhan chu, Pakistan atanga rikrapa che thin ho zawng zawng hi US sum hmanga Pakistan in a sponsor an ni a. US sum an hmuh loh hnu atang hi chuan Pakistan rama helho pawh an thapui a chat ve ni ngei tur a ni, an reh sawt khawp mai.
Vawiin August ni 21 hian Pakistan Foreign Minister Makhdoom Shah Mahmood Qureshi chuan China ram a tlawh a. Chinese foreign Minister Wang Yi nen inbiakna an nei a ni.
Pakistan Prime Minister Imran Khan chuan thu 3 a ken tir a. Chungte chu:
1. China Pakistan Economic Corridor (CPEC) Project chhunzawm dan tur.
2. Nikum August thlaa PLA leh Pakistan Army te inremna pawhsei.
3. Thla thara UN General Assembly awm hunah China in Kashmir buaina UN a a putluh theina tura sawipui te a ni.
China hian China Pakistan Economic Corridor (CPEC) Project hmangin Pakistan ramah hian USD 60 billion manhu hna a thawk mek a. He project vang hian Nepal leh Pakistan chuan China lam an hawi der tawh a. Asia khawmualpui rûn an tum mek a ni.
Tun hnaia UAE leh Israel inremna kha Pakistan hian a duh loh hle a. Prime Minister Imran Khan chuan Palestine mipuiin an chanvo an hmuh hma chu Israel hi kan thawhpui ngai lovang. Pakistan hian khawvela Muslim te inunauna turin hma a la zel dawn, a ti.
Muslim ram ve ve an nih angin Pakistan leh UAE hian inzawmna tha tak an nei a. Mahse, UAE in Israel chu a inrempui tak avangin Pakistan leh UAE kar thu hi sawi a har ta khawp mai a. That lam aiin Chhiat lam a pan zel a rinawm zawk.
@TimesofMizoram
Post a Comment