Kum 15 chhung Russia tana a rûka lo thawk thin US Sipai bâng man a ni

Rambung tin hian ram dang chanchin hriat theihna turin enthlatu an nei vek a. Tu ram pawh hian enthlatu tur hmun hrang hrangah an dah vek a, thil mak a ni lo. Mahse, mahni ram ngei phatsana, ramdang hnena thurûk pe thin hi an tam lo khawp ang. 

August ni 22 a BBC in a tarlan danin, US army Special Forces Green Beret a Captain lo ni thin chu Russia tan kum 15 chhung zet a rukin a lo thawk reng tih hriatchhuah a ni. He thil hih US tan chuan thil pawi tak niin, Russian hian US top secret tam tak a lo hre tawh ngei an ring a ni. 

Kum 45 mi Peter Debbins hi tun hma khan Russia tan zawngin thu a lo sawi zeuh zeuh tawh thin a. "Russia Fapa" ti te in a inchhal thin a. America hi khawih darh a ngai a ni ti teh a lo sawichhuak tawh. Hetiang tawngkam a neih fo avang hian US Department of Justice chuan an chhuizui ta a. Tichuan, Russian tan a lo thawk reng tih an hre ta a. Ram phatsanna thubuai siamkhum mék a ni. 

Peter Debbins hi sawi tawh angin US Army special force a Captain lai a ni ve a. Thuruk tam tak chu a hre ngei ang. US Special Force, Green Beret an tih hi, US force zinga  a tha ber tia sawi ngam tur niin, force pawimawh tak a ni. Green Beret te hi Asia, Europe leh hmun hrang hrang, US Army in operation lian leh pawimawh a tihna apianga a hman thin an ni. US Special  Forces te hian hming inkoh dan an nei nual a, chungte chu:- Green Berets, Quiet Professional, Snake Eaters, Soldier Diplomats leh Bearded Bastards te a ni. 
Russian Spy

Green Beret a captain hlui Peter Rafael Dzibinski Debbins hian a service chhung kum 15 teh meuh kha Russian tan a ruka thawkin, information chi hrang hrang a lo pe thin a. Russian Intelligence GRU nen inzawmna tha tak a nei ngei tih hmuhchhuah a ni tawh.

Prosecutor chuan kum 1996 atanga kum 2011 chhung khan Peter Debbins hian a hote chét dan te, sipai awm zat, ralthuam an hman chungchang te, an awmna hmun leh information pawimawh tak tak te chu, Russian  Intelligence Directorate GRU agent te a pe thin a. GRU agent te nen hian tum tam tak an lo inhmu tawh thin bawk a ni. 

Peter Debbins hian kum 19 a nih lai khan Russia ram a lo tlawh tawh a. Kum 1996 a Reserve Officer Training Corps a zir lai khan University of Minnesota, Russia ah a lo awm tawh bawk a. Kha ta tang khan Russian GRU te nen inzawmna tha tak an lo siam daih tawh a ni. 

Peter Debbins hi US Chemical Weapon siamna lamah tawnhriat ngah tak niin, Captian a a kaisan hma hian South Korea leh Louisiana Chemical siamna hmunah a lo awm tawh bawk a. Tichuan, First Battalion ah Captian rank ah kaisangin, 10th Special Forces te hovin Germany lamah a posting a. US Army a  a service chhung hi 1998 atanga 2005 thleng ni mahse, 1996 atang tawh khan Russian GRU te nen an lo in hmuh tawh thu kan sawi tawh kha. 

Germany bakah, Republic of Georgia leh Azerbaijan ah te pawh a lo awm ve hman a. US Army thuruk leh sawrkar foreign policy tam tak a hre ngei dawn tih a chiang reng. Tin, Chemical company lamah  dah a lo ni tawh angin, US Chemical Weapon chungchang pawh hriat a neih nual ang. 

Kum 1997 khan Russian in a spy te hming lem code a pek thin angin, Peter Debbins a spy code atan Ikar Lesnikov an pe a. Russia tana enthlatu diktak a ni chho ta a.  

US Army information tam tak a pek hnu hian US Army atanga ban a duh thu hi Russian GRU te a hriattir a, Mahse Russian Agent  hian a bánsan chuan US tana enthlatu angin a puh let tur thu in a vo a. Peter Debbins hi Russian thisen kai a lo ni bawk nen, Russian tan US Army ah chuan a awm zui ta zel a. Special Force a zawm hma khan, Russian Spy hian Tuna i awmna ah hian Russia tan tangkaina i nei lo, tiin awmhmun sawn turin a hrilh a. Peter hian Special Force a zawm ve ta a ni.


Sawi tawh angin, Debbins  a nu hi Soviet Union a piang niin, a pa chungchang hi tarlan a ni lova. Debbins a nupui pawh hi Russia lam mi tho niin, a nupui a pa hi Russia sipai a ni bawk. 

Vawi khat chu, Russian spy khan US Army manuals, Sipai te inenkawl dan chungchanga document chu lachhuak turin a hrilh a, Debbins hian information chu a pe thei a, Mahse document kher chu airport velah man a tawk dawna a hriat avangin a pe thei ta lo a ni. 

Kum 2005 a US Army a chawlhsan hnu hian Russia lamah sumdawng turin a zin a. Ukraine steel company velah te hna dang dang a thawk kual a. Computer lama thiamna ril tak nei a ni bawk a, Russia tan a thawk reng a, kum 2011 thleng khan Russian Agent te nen an inbe pawp reng thu hriat a ni. 

Tunlai hian US Justice Department chuan US thuruk a pûtchhuah zel thin chungchang hi uluk takin an chhui mek a, ramdang tana thawk tur awm anga ngaih te chu an chhuichiang mek zel a. CIA officer hlui pakhat pawh China tana thawka puh mek a ni. Enthlatua puh te hian Court lamah thiam thu an sawi ve dawn a. Court phalna angin an travel history leh email te US Department of Justice leh FBI ten an chhui zel dawn a ni. 

Kan hriat tawh angin, US hian China leh Russia te hian hacker ho hmangin an thuruk ru angin a puh fo a. Covid19 damdawi siamna kawnga US thuruk pawh China in a lo ruchhuak leh tawh thu kan hre tawh kha. Heng zawng zawng hi ramdang Hackers ho ai mahin, US Department mi leh sa te ngei an ni fo mai a. US hian a thawktu te uluk zawka a vilh a ngai hle a ni. 

Hnam tin chi tin tlankhawmna US hi fimkhur taka a kal loh chuan, a chhunga awm te ngeiin an la tichhe vek thei. India ramah pawh kan buaina ber pawh Muslim thenkhat, Pakistan tana thahnem ngai tak tak an awm thin vang a nia. Tunhnai pawh khan Bengaluru a Ophthalmologist doctor pakhat chu ISIS nena inzawmna a neih vanga man niin, India sipai zingah pawh Pakistan tana thawk thin manchhuah an ni fo mai. 

China in US ralthuam tlukpui tur a siam thei zel chhan hi ngaihtua ngai tak a ni. A mi te ngei hian US hi an tina thin niin a lang. Trump a policy han sawi kai ta zel ila, Kum 2016 campaign lai khan Hillary Clinton chuan, "Mi tin tan America ramah hmun a awm," tiin a lo campaign tawh kha. Trump chuan Maxico ramri ni se khar hmak a duh a. Immigration chungchang pawh khauh zawka dan kengkawh a duh a ni. Hei hi ram him nan a pawimawh hle a, hnam tin awmna ramah hian inlungrualna a awm thei meuh lo. 

Mi thar tak tak America ramah an pem thla zel a, American tan phurrit a ni zel dawn. China ve thung chu hnam khat awmna ang a ni a. Hma pawh an sawn chhak réng a ni. Chinese hnam zingah Han an tam ber a. China population 91% zet hi Han hnam an ni. @TimesofMizoram

Post a comment

  1. University of Minnesota Russia ah a awm tih I ziak khi a dik maw ?

    ReplyDelete

Powered by Blogger.