TRUMPA'N COVID DAMDAWI HMUH CHHUAH THU A PUANG

Dr. Pc Biaksiama
24 Aug. 2020.

AMERICA TUALCHHUNG INEPNA Tun țum inthlanna tur ang reng renga khawvelin a thlir rawn, ram changkang leh hausa ber, America ram chhunga inkhing pahnih - Democrat leh Republican te karah heti em em hian an tual a la chhe ngai lo. Khawvel pum pui dinhmun nghawng thei a nih avangin USA a thil thleng khu India ram chanchin ai pawhin nitin darkar tin ngaihven a ngai ta mai a. Information a chak em em a. Kan thuhnar tam tak chu a chhuahtuten Youtube a an upload hlim hlawt te a ni fo mai. Chanchin thar hi darkar tin pawh ni lo, minute tin hian a lo lut nuaih nuaih mai a, mumala thliar fel pawh harsa tham a ni. Chutih laiin mi țhenkhatin țan lam bik nei (bias) hlein min lo ngai a, an ti dik ang, bias nei lo mihring an awm si lo va. A tehna azir a ni ang.

Mipui Chi Hnih Ințhen America khu a tira an din anga kristian ram țha tak anga inkaihruai a, khawvel police tak tak ni tur leh, Pathian țihna nen kal zel se, hmasawnin ropui deuh deuh se, Communist leh Muslim Fundamentalist te leh Hindu firfiakten kristiante min nekchep zel tur laka min chhan tura kan duh chuan Pathian mi ruat Donald Trumpa te ang khu a term 2-na atan tling leh ngei se. Trumpa term tawpah amah ai maha Kristian ringtu țha lehzuala an sawi, tuna ama Vice President ni lai Mike Pence a khuan thlak leh thei zel se kan duhin, kan țawngtaina chhan tur a ni.

Lehlamah thung chuan, America khu kristian ram ni tawh lo sela, socialist lamah kal tawh se, Communist China te, Muslim firfiak Iran te nen inthurualin, kristianna hi America ram atang khuan nekchep tawlh tawlh sela, sakhaw zalenna pawh ti bo hialin, Setanic takin, a duh duhin zalen takin nau titla sela; patil leh mawngkawhurte chu an kohhran hruaitu pastor atan hmang tam tial tial sela, Obama hun lai ang mai khan White House te chu Muslim clergy hote hmunpui a ni deuh thaw tawh ang khan, tunah phei chuan communism leh socialism hmunpui lo ni sela; a ram mipui nâwlpui mingoho (74%) vel khu engmah sawi thei lovin, African/Latino mihangho mi tlemte zawk (14%) vel khuan America ram ropui khu duh tâwkin han sawp vel sela. An president atan pawh mi corrupt ber leh Communist China sorkarin thamna dollar tluklehdingawn chuang zeta a lo tham lungawi fel diam tawh Joe Bidena te ang tar ât nei tawh bawk si khu tling sela, an chanchinbu leh TV news zawng zawng khu Fake News (CNN) tih ang velin control vek bawk rawh se, kan ti a nih chuan Liberal Democrat lam khu țan hle mai tur a ni mai!! Mizo zingah pawh chutiang mi chu kan awm ve nual a ni lawm ni?
Trump vs Biden

DEMOCRATIC NATIONAL CONVENTION (DNC). Tun kar kalta khan democrat-ho chuan inthlan lo awm tura an president candidate officiala ruatna nei pahin ni 3 chhung khawmpui an nei a. Obama leh a nupui Michelle Obama te, Trumpa hneh lotu Clinton-i te, Kamala Harris-i te, Bidena te leh mi tam takin thu an sawi a.

Thusawi apiangin an party hmalakna tur agenda leh ram siamțhat hna aiin Donald Trumpa chu an sawichhe tluar tluar ringawt mai a, an official candidate Bidena aiin a hming an lam chhuak hnem zawk lehnghal a. A hming chauhvin an party policy an sawi a, tun laia khawvelin a chai luai luai Communist China thiltih dan leh covid hripui hmanga khawvel a chawhbuai dan erawh chu an sawi duh hauh lo va. China-in USA technology thiamna a ruk chhuah nasat zia leh a enthlak nasat zia, national security lam tana him lo a nihzia an tilang duh reng reng lo. Republican sorkarna state te aia anmahni Democrat sorkarna state-ah law and order a mumal loh avanga buaina a nasat zawk zia, an economy pawh a chhiat zawk ziate chu an tilang duh hauh si lo. Engti kawng zawng pawha Trumpa hi tih hmingchhiata, a tlin lohna tur a nih dawn phawt chuan thil tihchhiat buaih buaih pawh an hreh lo, an tichhe ta viau reng a. Mahse hetiang thil tichhetute hi America mipui te khuan an vote duh loh phah zawk dawn niin a lang ta. Mipuiin an duh lohna chhan țha dang leh chu, mi tam takin America hmelma ang hiala an ngaih, America rama pulh hri rawn theh darhtu China chuan Bidena hi tling se an ti ngawih ngawih a; tling hlauh se chuan suma an lo tham lungawi tawh a ni bawk a, duh duh an tihtir mai tur hi a ni a. Trumpa pawhin Bidena hi president ni ta se America hi China ta tur a ni ringawt (If Biden is elected, China will own America), a ti tawp mai. Tichuan America hausakna duhtawkin an sâwk leh thei ang a, America rama kohhrante chu an hrêk bet rawk rawk mai ang. Obama Hussein-a president chhung khan Kristiante dinhmun a chêp sâwt lutuk avanga Kohhran hruaitu mangang intêlkhawmte khan Trumpa hi president chuh ve turin an sawm chhuak zawk a nih kha.

Democrat Party an pung nge an kiam?

News channel thenkhat leh abikin Dr Steve Turleya report danin, Democrat convention zan 1-na lo thlirtute (viewers) kha 2016 convention an neih hnuhnun ber atanga tehin thlirtu mipui 30% in an tlahniam duai mai. A zan hnihnaah phei chuan Views te kha 50% in an tlahniam bawk, tiin a report. Hei hian Democrat party dinhmun tur engemaw chen chu a hriat theih mai awm e.

Biden-a Thusawi

Convention tawp zan (Zirtawp tuk, 21.8.20, 8:30 a.m. velah live-in kan lo ngaithla a). Sawi buh deuh nuai te, sawi ngai sawi nawn te leh sawi sualte a neih thin avangin chumi hre renga han ngaihthlak chuan, sawi sual nei lova 28 minutes vel a han hmang tlingtla thei ringawt pawh kha an tan chyan thawkna huai a tling awm e. President ah thlan ni ta se engti takin nge policy a kalpui dawn tih fumfe taka sawi chian a nei lo. Trumpa paithlak ringawt kha a thupui ber a ni ve mai. Thil țha tih a tiam nual a, mahse kum kha leh chen politics ah fawng a lo chelh tawh chhunga ram tana thil tih țhat sawi tur a nei miah lo mai hian amahah beiseina a tisang thei lo va; chu chuan a mize dang, corrupt-na kawnga a lo kal thuk si zia a ti langsar zual sauh mai a ni. Trumpa nen hian in debate hi an ngampui lo khawp mai a, mahse nawr chhuah erawh chu a ka ngai ngei ang. I lo thlir ang u.

REPUBLIC NATIONAL CONVENTION (RNC) Zanin 24 Aug. 20 a ințan turin Trumpa Republican party lam chu N. Carolina state a Charlotte khuaah an nei ve dawn a ni. (Kar tawp lamah report kimchang a lo lang hman tawh ang)

BLACK LIVE MATTER Protest movement. May, June, July thla chhunga America ram puma mihang thlavang hauh inti a Democrat-te fuihpawrha America khawpui za chuang zeta tualchhung buaina siam tute khan chhiatna rapthlak tak tak, khaw tam takah kangmei nasa tak an chhuah a, inthahna, inrawkna, thisen chhuahna, inpawngneknain ram chhung an tikhat a. Kha khan Democrat-ho rilru suahsualzia chauh a hai lang. Mi pawngpawrhho thil tihchhiat buaih buaih kha America mipuite duh zawng a ni lo. Tunah hian hmun tinah khâng buaina siamtute kha ram leh hnam hmelma angin miten an en tawh. Police kan duh lo, (Defund Police) tia buaina siamtute an ni a, an thlavang an hauhsak Blackho zinga 81% lah chuan police neih chhunzawm an duh bawk si. Khang buaina siamtuten chhinchhiahna an siamte kha ngawi renga lo thlirtu mipuiten an tih chhiatsak zel tawh mai a ni. Ngawi renga lo thlirtu mipui za zela 73 ten khatiang buaina siam kha an duh lova, America ram chhunga thil thleng atan an duh lo. A hrim hrimin Mingo tam zawk khuan kum 40 kal tawh atang khan Democrat hi an vote ngai tawh lo, tih a ni.

DEMOCRAT-ho leh REPUBLICAN State khaikhinna

India ram ang lo takin USA-ah khuan State governorte khu an state chhungah an lal riau mai a, anmahni state dan siamin an president thu pawh an hnial thei a ni. Tichuan, Trumpa thu zawm duh lo Liberal Left Democrat-ho sorkar state-ah te khuan Covid hri a leng nasa deuh bik zela report a ni. Law and order lamah pawh an buai zel. Covid vanga thi an report tam bawk a, a chhan chu natna danga thite pawh covid hri vanga thi angin an chhiar tel zel nia rinhlelh an kai a, Trumpa chunga mawh an phurh tam tir theih nan. Entirnan, Trumpa dotu langsar New York state governor Cuomo-a (CNN hotupa ni bawk) enkawlna hnuaiah chuan inpawngnekna, tual thahna (criminal offence) hi a pung phut phut mai a. Nunphung a khawih chhia. Sumdawng hausa leh mipui tam takin New York state an chhuahsan zut zut a. In luah turte chu a ruak hiai huai mai a ni. Reporter pakhat Altucher-a sawi danin "New York is dead forever," a ti hial a. Chhiah chawi (Tax) a sang viau a, mi hausa, industrialist leh businessmen ten hnim hring țha peh tur awmna zawk leh factory dinna țha leh hlawk zawk an hmuh chuan, an chhuahsan khuate chu a ro ve rawp rawp mai a ni. China hausakna hnar siamtu ber ber foreign company maktaduai 2 (2 million companies) in an chhuahsan tawh an ti a (WION, 21.8.20), an ro ve tlak tlak tawh khawp khawp ang. New York khu America ramah pawh Covid hripuiin a nuai nasat ber khawpui a ni bawk. An chhiat tawhnaah Trumpa vang niin an puh duh tho.

California khu America rama state lian leh mihring tamna ber, foreigner-hoten tlawh an châk ber thin a ni. Mahse Democratic sorkarin a awp khawlo vek a. America ram ve si-ah kutdawh, in leh lo nei lo, khawlaia riak mai mai, slum area tamna ber a ni ta. Dr Steve Turley-a report (dt. 6/8/20) ah chuan, California state atangin mipui an pem chhuak hum hum mai a ni, a ti a. Hollywood mi lar tam takin an chhuahsan mek bawk. Chutih laiin Democrat rorelna state leh khawpui dangah law and order a mumal loh lutuk avang leh, an state sorkar thuneituten an police te che thei lova an siam bawk si avangin Chicago te, Baltimore leh Portland khawpui te chu mihang leh mingo, mihang leh mihang inkarah dan bawh chhiatna (crime rate) a sang em em a, nun a him lo va, chenna tlak lo hmun a insiam belh zel.

Nov. 3, 2020 Inthlana Trumpa dinhmun tur Thlirlawkna


1. America President ropui leh hmasa George Washington-a te, Abraham Lincoln-a te hnua țawngtai thiltihtheihna ringtu ber chu Trumpa hi a ni ta. Amah vote tlingtu bupui Evangelical kohhrante lung a tiawi viau mai si a. An vote tling leh ngei ang tih a beiseiawm. Hei hi khawvel puma ringtute, abikin Mizorama ringtute pawhina kan țawngtaipui na chhanna pawh a ni. Kristiante kan țangrual ang a, Lalpan hnehna a chang leh ngei ang.

2. America mipui nâwlpui hi Sap Mingo an ni a; Mihang, US mipui zaa 14 vel emaw hi Africa atang leh Central America vel atanga lo lut an ni. Mihangte hi an mizia avangin Mingo ai chuan intihbuai leh dan bawhchhiat an ching deuh. Mihangin mihang a tihhlum chuan engmah an sawi buai lo; Mingo police-in mihang kha dan a bawhchhiat vang pawh ni se, a kahhlum emaw, a tihnat emaw hlek chuan, "Chi inthliarna" (racism) tiin black nunna chu hlu ta bik viau ang maiin buaina a chhuah phah vak zel a. Hetianga mihangho voh lutuka a ram neitu zawk leh America ram dintu Mingo hote ngaihdan hi a pêl thui tawh. An rilru na hi an ngawi thei viau (silent majority). Trumpa'n "America First" tih policy a kengkawh pawh hi tun hma zawng aiin White Majority hian an la serious lehzual tawhin a rin theih ta. Tam zawkin ngaithah an tuar rei ta deuh.

3. Democrat hovin convention an neih atanga Trumpa sawi chhiat bak ram tana beisei tur leh mipuite hip thei tur propaganda îtawm nei hek lo, an khawmpui zawh ațang khan Trumpa dinhmun a tițha sauh mai a. Kar khat vel liam taa a hnathawha lungawi thlak ti mipui approval rate 49% atangin 51% ah a chho ta hial a. Hei hi a nêp lohzua chu: Obama lâr vanglai khan hetiang approval point hi a thleng pha lo.

Tun dinhmunah chuan Trumpa an sawichhiat nasat poh leh supporter a ngah sauh zel niin a lang tlat mai.

TRUMPA'N COVID-19 DAMDAWI A TLANGZARH

Democrat-ho an lawm lo!

Tunah hian US President Donald Trumpa chuan covid hrileng damdawi, Mayo Clinic-in an hmuh chhuah Convalescent Plasma an hmuh chhuah thu a puang ta. He damdawi hi covid hri vei dam tawhte thisen, plasma atanga an lak hmanga damdawi hi siam a ni. Hei hian covid avanga thihna 35% in a tihtlem phah a ni tih hriat chhuah a ni bawk. Mahse Democrat party chuan Trumpa hming țhatna tur nia ngaiin an lawm leh lo pek a.

An party president candidate Biden-a chuan president a nih chuan a hnapui hmasa berah covid hri tihrêm a tum thu a puang kha a ni a; mipui vote a hîpna tur pawh a ni a. Mahse Trumpa'n a lo phawi khalh ta si a le!

Covic-19 avanga America mi nuai khat sing riat zetin an thih phah tawh avanga Trumpa an dem huai huai laiin, a damdawi an hmuh chhuah chu Trumpa'n a han tlangzarh ta mai chu an lawm leh si lo; election dawn ruaia Trumpa hming țha tur chu an thîka an îtsìk awm teh a nia. Zanin CNN news-ah pawh sawi nep turin mithiamte an han ruai vel a; mahse mithiamten an duh angin rinthu ngawtin an lo sawi nep thei si lova, a zawttunu (anchor) pawh a meng râm râm mai. 'Hetiang te chu 'fake news' a nih hi, han ti mai se chu a hlim țhen sâwng dawn si a. A enga ma hmaa sawiseltu (critics) ten "a dik ngei tih finfiahna tham an la test tlem lutuk" tia sawi nep an tum tawk a. Mahse he damdawi hmang hian mi 70,000 aia tam an lo enkawl der tawh si a, a him tawk a ni, tiin Dr William Morice-a, Mayo Medical Laboratories President leh Chairman, Department of Laboratory Medicine & Pathology, Mayo Clinic chuan a nemnghet hmiah a ni. Chuvangin, covid hri damdawi hi ban phak lekah a awm ta. USA bakah ram changkang deuh deuh - Israel, UK, Japan, Australia, Russia, India etc. leh China rama medical scientist-te pawhin covid damdawi hmuh chhuah ngei tumin an bei nasa a, Pathian țanpuinain anni pawhin hlawhtling ve ngei turin kan duhsak e.

Post a comment

Powered by Blogger.