Kum 2016, US Presidential election campaign huna Donald Trump auhla kha kan la hre vek ang a. US economy dinhmun tla hniam mek kha "China vang" a ti mauh mai a. President Office a luah thei chuan, US-China insumdawn tawnna chungchangah  inremna thar a siam tur thu a sawi fo a. Tichuan, US President office chu a luah ta ngei a, a sawi ang chuan, US economy siam that tumin hma a han la nghal char char a. Thla 3 chauh Office a luah chungin, China hotupa Xi Jinping chu a hmu nghal a. He tah hian 100 Day Action Plan an siam ta a ni. He plan in a tum ber chu ram pahnih te ngaihdan inanlohna te dah bova, a hma aia sumdawnna tha zawk nei tura inpuahchana hun a ni deuh mai a. US chuan China bungrua chu tariff (chhia) a lo tihsan sak ve zel bawk avangin 100 Days Action Plan chu a hlawhtling ta lova, July 2017 khan a zuzi zui ta a ni. 

Trump hian Beijing chu China company te chu uchhuak takin a duhsak bik a ni, tiin a puh chhe ta reng mai a. US intellectual property te ruin, US thilsiamte chu an ngaihsak lo, tiin Trump chuan China chungah phuba a la ta a. 

Tichuan, July 2018 to August 2019 chhung khan US chuan ruahmanna dang a lo duang ta malh malh a. Chinese thilsiam atanga tariff US dollar billion 550 zet lakna tur, Trade War hmasa ber chu a puang ta kha a ni a. China pawhin thung rulh ve nghalin, US product atangin US dollar 185 zet tariff a la ve ta nghal a, tichuan vawiin a trade war kan tih fo chu a lo intan chho ta a ni. 

Trade War hi a tu zawk zawk pawhin an tuar a. US GDP pawh tlahniam ve hretin kum 2019 khan US economy (GDP) thranna chu 4.1% niin, 2018 GDP 5.4% aiin a hniam hle. China DGP pawh a tlahnuai ve bawk a, 2018 khan 6.6% niin, 2019 ah chuan 6.1 ah a tla thung. 
mizo world news
Tunlai Khawvel leh Trade War - China Hun A Liam Mek

Tichuan, US chuan China aiin a tuar zawk mah a, Mahse, insiamthat nan khaw dur a ngai thin an tih ang deuhin, Kum 2020 ah hi chuan US lam pawh a tha chho ve zel a. Mahse, covid19 in a rawn tibuai ta tlat mai a. Trump hmingthatna tam tak chu Covid19 hian a hliah ta rih a, President Office hi a hum zo thei ang em? tih chu khawvel mipuiin kan thlir thup mai a. US-China trade war lah chu, a la alh tha ropui mai a, Preaident Trump hi la tling leh se, US-China inkar thu hi a ngaihnawm telh telh dawn niin a lang.

Ram economy thanna ngawrh ngawrh thlir chuan, US-China trade war hi China in a tuar lo zawk kan ti thei awm e. Mahse, kan hriat angin, US leh a thawhpui ram tam takin China company hrim hrim thlauthlak duhna an nei ta vek mai a. India ngei pawhin, China company te tan dan leh dun khirh tak tak a siam sak a. International market ah chuan China hian a tuar zawk niin a lang. 

August ni 13 khan iPhone siamtu company chuan "Trade War nghawng vangin, China hun tha a liam mek" thu an sawi a. Technology lama China hmahruaina chu tlahniam mekin, international market ah China product chuan hlutna a hloh ta mek a ni. 

Hon Hai Precision Industry Co Chairman, Young Liu chuan, US-China trade war vangin China rama hmunpui nei te chu min hn├╗kchhuak mek a, Apple phone zinga hralh kal ber iPhone pawh hi ram dangah kan siam mai a ngai dawn niin a lang, a ti. Kan hriat tur chu, iPhone hi Apple company ta ni mah se, company hrang hrangin an develop a nih a. A remkhawm hna tam zawk hi Taiwan company Foxconn Technology Group in an thawk ve thung a. Hon Hai Precision Industry company hi tuna kan sawi tak Foxconn company nena inzawm a ni. 

Hon Hai Precision Industry co chairman Liu hian an hmunpui China atanga India, Southeast Asia leh America rama insawn chu a hnial loh thu leh, a tul a nih phawt chuan hma an lak nghal thei thu sawiin, China ni te a liam mek a ni, a ti. 

Tunlai hrileng vangin Apple  product zingah iPad leh Mac hi hralh a tla viau mai a. Covid19 karah apple company sum lakluh hi a pung hle niin an sawi. Apple company hian Hon Hai in iPhone an hralh zatve hi a chang thin. 

Heng zawng zawng hi Trump trade policy vanga awm a ni a. China hian a tuar dawn chauh a nih hmel. Kan post hmasa ah khan kan sawi tawh a, India in Chinese apps 59 lai a banned kha, security thil vang ni lovin US-China Trade war vang niin a lang. India chuan Galwan phuba lakna, a tih a. A dik ang, Economic War tak tak China in a tuar mek a ni. 

Donald Trump pawhin Wechat leh TikTok ni 45 chhung a khuahkhirh thu kha kan hre vek ang a. Kha pawh kha Trade War rah chhuah tho a ni. Tiktok hrim hrim hi an haw lova, an sum lakluh a tam em mai a, China economy thang chak lutuk hi India leh United State hian an dangchah a ngai a ni. 

August ni 13 bawk hian Tiktok chungchang chanchinthar kan hmu leh ta a. Microsoft leh TikTok chungchang ni lovin, India pa hausa Mukesh Ambani company, Reliance Industries leh TikTok an indawr mek thu tarlan a ni. Tiktok neitu ByteDance lam chuan Reliance nena inbiakna an neih thu hi an tarlang tawh a. Mahse, Reliance lam chuan engmah an la sawichhuak ve lo thung. 

India rama internet revolution thlen tirtu chu Jio hi a ni. Kum 2016 kum tawp lam khan Jio 4G an launched a. Kha tah tang khan YouTube te duh tawkin kan en thei tawh a. Internet data man tlawm leh chak kan neih tawh avangin Smartphone leh application chi hrang hrang chu tangkai takin kan hmang thei ta a ni. India rama technology lama hmahruaitu Reliance Industries in TikTok hi an lei thei ngat a nih chuan, Kan Mizo nula te an lawm viau in a rinawm. 

ByteDance hian an mobile apps, hlu tak leh titi siam tak hi engtin nge an kalpui zel dawn? US China Trade War hi Microsoft leh Reliance Industries te hian an hmang tangkai thei ang em? Kan thlir zel dawn nia. @TimesofMizoram

Post a comment

Powered by Blogger.