US in Covid19 damdawi million 800 zet order tawh

August ni 13 a Worldometer data ang chuan, covid19 hri kai zawng zawng mi  20835811 niin, thi zat hi nuai 7 sing 4 leh sang 7 lai an tling tawh a.  Hri kai tam berna ram te chu USA, Brazil, India, Russia leh South Africa te an ni. Ram hrang hranga Hri kai zat hi chipchiar taka sawi lan kher a tul lem lova, tuna kan sawi tak atang khan khawvel in damdawi (vaccine) a mamawh zia ching takin kan hre thei. 

Covid19 hri an darh tir khan, rambung hrang hranga company lian te chuan a damdawi siam tumin hma an la nghal char char a. Hri kai test na ringawt pawh tunah chuan kan ngah ta hle. India ram ngei a pawh, Rapid Antigen Test (RAT) kan tih te hi Covid19 hri kai thar man chhuah nana hman tangkai ber a ni ta mek bawk. Heng hmasawnna tam tak hi Covid19 a darh tir khan, kan ngaihtuah pha lem lo, kan rûm tlawk tlawk a ni ber kha. 

Khawvel finna a sang, sualna a pung deuh deuh an ti ang deuhin, harsatna kan tawh poh leh thluak kan hmang a, tichuan harsatnate chu kan sukiang thin a ni hih, ti rawh u...... 

Tunah hian Covid19 vaccine siam hlawhtling tura ngaih company 5 an awm mek a. Approval pek fel an la ni chiah lova, heti chung hian US chuan covid19 damdawi mûm maktaduai 800 zet pre-order a lo siampui tawh. United States population hi maktaduai 330 (330 million) niin, mi pakhat tan covid19 damdawi dose hnih zel lei an tum tihna a nih chu. 

Covid19 damdawi hralhchhuak thei mai tura ngaihte chu: US a inbun biotech company Moderna nen US sawrkar chuan inremna a lo siampui diam tawh a. Moderna siam covid19 damdawi maktaduai 100 zet chu US hian a lei sak dawn a. Heta sum sen tur hi US Dollar 1.52 billion zet a ni dawn a. Dose khat hi dollar 10 bawr vel anga chhut thei a ni. Tun hma pawh khan US sawrkarin Moderna company hi covid19 damdawi siamna kawnga hman atan US dollar million 995 zel a lo pe tawh bawk a. He sum hi an hlawhtlinpui niin a lang. 

Heng bakah hian damdawi mamawhna a san viau chuan a tul anga hman turin damdawi maktaduai 400 lak belh thei turin inremna an nei bawk a. Moderna company hian human trial final stage an thleng tawh a. Kum 2021 chawhma lama semchhuah thei an in ring. 

Oxford University leh AstraZeneca tangkawpa an buaipui mek covid19 damdawi chu US sawrkar hian 1.2 billion manhu inremna a lo siampui tawh bawk. Novavax siam covid19 damdawi pawh US hian pre-order a lo siam hman tawh bawk a, US dollar 1.6 billion manhu damdawi leina tur inremna an siam fel tawh. 

Tin, covid19 damdawi chungchanga inremna thuthlung lian ber chu Sanofi leh GlaxoSmithKline siam ah niin, US sawrkar hian 2.1 billion manhu, damdawi million 100 a lo order tawh bawk a ni. 

Heng company te hian damdawi chu hlawhtling takin kum 2021 kum tir lamah lo peihfel ta pawh ni se, US chhunga an pek tur ringawt pawh hi a tamtham hle mai a. Ram dang tan chuan Bei nge sei run dung tih ang vel a nih hmel. 

Donald Trump sawrkar hian a mite Covid19 laka an zalen hi a duh takzet niin a ngaih thei a. Company rintlak tak tak te hian covid19 damdawi an siam hlawhtlin ngei turah ngai ila, US hi kum 2021 chawhnu lamah chuan Covid19 Free an ni tawh mai thei a ni. Chumi hunah chuan Pu Donald Trump hian President Office a la luah ang em, tih erawh kan hre lo. 
Covid19 Vaccines news
Covid19 Vaccines

Russia Siam Damdawi chu: August ni 11 khan Russia chuan Gamaleya National Center of Epidemiology and Microbiology siam covid19 damdawi chu hman thei a nih thu a puang ta rup mai a, khawvel mipui ngahhlel covid19 damdawi hmasa ber tur a ni. 

Mahse, Russia thil tih dan chu rinhlel a kai ta hle a. An covid19 damdawi hian phase 3 human trial a paltlang lo niin ramdang mithiamte chuan an sawi a. Tin, phase 1 leh 2 pawh kha hmanhmawh taka kalpui niin, thla hnih chhung lekin an zo fel vek maia, rinngam a har dawn hle niin ramdang chanchinbu te chuan an tarlang a ni.

Russia President Putin in a puan anga rintlak pawh lo ni tehreng se, Covid19 hri kai tamna a palina a ni mek a. Ram danga hman tur chuan hun a la duh deuh dawn a ni. 

Russian company lian Sistema chuan damdawi siam hna a thawk dawn a. Tuna an company dinhmun ang chuan, kum khatah damdawi dose an siamchhuah thei zat chu maktaduai 1.5 chauh a ni rih a, Russia mipui maktaduai 145 mamawh pawh an phuhruk hmel loh hle. Lo hlawhtling viau pawh ni se Ram dang tan chuan ei rim a nam hmel chiah lo a ni ber e. 

Hetih lai hian, Russia sawrkar thupuangtu chuan kum khatah damdawi hi maktaduai 500 an siam hman tur thu leh, Ram pawn atangin damdawi hi tluklehdingawn khat zet order a awm tawh thu a tarlang. 

India ramah chuan  nachina kan sawi tak US company AstraZeneca siam chu Serum Institute of India kaltlangin phase 2 leh 3 enchhin turin phalna an hmu tawh a. Hei hi a paltlang chuan India mipui tan hman thei a ni dawn chauh a ni. 

Russia siam covid19 damdawi pawh hi, tuna India dan hman lai ang chuan phase 2 leh 3 enchhinna hi kalpui tur a ni. He trial hi apaltlang loh chuan India ramah hman thei a ni dawn lo. 

The Global Times: China Chanchinbu The Global Times in a tarlan danin, tunah hian Covid19 damdawi khawvel in a pawm thei tur company 6 an awm a. Chung zinga company 3 Sinovax, Sinopharm (Wuhan) a mi leh Sinopharm (Beijing) chu Chinese company niin, a dang te chu University of Oxford (UK) siam AstraZeneca leh US company pahnih Moderna leh BioNTech te an ni. 

Rambung 168 zetin Covid19 vaccine hi an buaipui a. Chung zinga 28 chuan enchhinna an hmachhawn mek niin tha global times chuan a tarlang. 

India Damdawi: Indian company Bharat Biotech siam covid19 damdawi enchhin mek Covaxin chu phase 1 trial kalpui mek a ni a. Phase 1 zawhna tur pawh hian thla khat dang a la ngai dawn a ni. 

Covaxin phase 1 ah hian damdawi hnathawh dan an enchhin a. Phase 2 ah chuan damdawi dose pek zat tur an enchhin leh dawn a ni.  Tuna a lan dan chuan, a tu ram mah hian kum 2020 chhung chuan an peih hman a rinawm lo. 

Tin, covid19 chungchang hrim hrimah hian politics tha lo leh eirukna a inzeh tel vek tawh a. Hmun thenkhatah chuan enkawlna senso eiruk duh vangin hri kai lo pawh, kai angin an chhuah ve bawk niin thuthang a tam mai a. Thil hi a buai zo ta a ni ber. 

Covid19 damdawi siamchhuak thei hmasa ber nih tumin rambung te an in el mek a, a hmasa ber hi chu ei a him lo mai thei bawk a ni.  

Covid19 Damdawi hi beisei tur a lo awm hnai dawn lo niin a lang a. Lo fimkhur hle phawt mai ila. A dam bawkin hlawh an la thin, an tih kha. @TimesofMizoram

Post a comment

Powered by Blogger.