India sawrkar chuan China chunga phuba lak nan Chinese Apps 59 zet chu India rama hman theih loh turin July thla khan a titawp sak ta kha a ni a. India sawrkar thupek angin Google chuan an playstore atangin July ni 2 khan a paihbo ta vek bawk a. Thalai tam tak chuan Titok apps hi an ui hle a, thenkhat an intihlum phah hial bawk a ni.
Kan hriat angin, Ministry of Electronics and Information Technology, Government of India in chinese apps a banned zingah, ni tina kan hman tangkai em em hote a tel nual mai a. Chung zingah kan sawi hmai loh tur te chu, Tiktok, UC browser, Share it, club factory, DU Recorder, V Mate, Xender te a ni a. A dang pawh hi mi tam takin thlah lova kan hman thin a ni deuh vek mai.
Chinese Application te hi a him leh him lo thuah chuan han sawi tur vak kan hre lem lova, amaerawhchu, sum tak tak an hmuh ti kan hre vek awm e. Tunlai India rama video sharing platform lar ber chu YouTube hi a ni a. A dawta chuan Facebook niin, tiktok hian a dawt ve thung a ni. India ramah ringawt titok active users mi maktaduai 119 an awm hman, a turu a sin.
October - December 2019 chhunga India rama tiktok sum hmuh chu 25 crore lai a tling. Tichuan, Chinese apps 59 ten India atanga an sum lakchhuah zat hi han chhut chhin la, a nep lo asin.
 |
| TUNLAI KHAWVVELA TIKTOK POLITICS |
India sawrkarin a banned chhan hi India ram himna tur nia sawi a ni a. National security leh privacy mai bakah, economic war pawh a tih thei ang chu. Heng apps 59 te sum lakluh en hian, India in a han titawp sak thut mai hi, China in a lawm lo khawp ang.
Tichuan, Pu Modi a thiantha Pu Donald Trump chuan India ang bawkin, Chinese thil siamin US thalai tam tak a rûn mek zia a hmu chiang kherh mai a. ByteDance siam Tiktok leh Tencent siam Wechat te chu banned a tum ve leh ta.
US bikah hian Tiktok hmangtu hi mi 14.3 million an tling tawh a. WeChat pawh hi 3 million zetin an hmang ve. An population ngaihtuah chuan India ram aiin an hmang nasa tih a hriat.
August ni 6 khan US President Donald Trump chuan executive order hmangin Titok leh WeChat chu US chhungah engmah pawisa lam thil (transaction) ti thei loh turin, ni 45 chhung zet a khap sak ta hmiah mai. ByteDance leh WeChat tan chuan chânna nasa tak a ni dawn a. An market thatna ber chu India leh US hi a ni ve bawk a. An tuar hle dawn.
Trump chuan Chinese apps te hi Ram himna atan thil hlauhawm a ni. Information chi hrang hrang users atangin an lakhawm thina, Chinese Communist Party-in a duh duh a hmang ta thin a ni. America himna turin kan tihtawp vat a ngai, a ti. Tiktok lam pawh an ngawi bik lova, US court a zualko an tum ve mek.
July thla tir khan Trump hian, Chinese apps, a bik takin Tiktok leh Wechat atangin US sawrkarin hlawkna a hmu tur a ni. Kan miten an enkawl chuan kan rama hman kan phal ang. A mihring, eng company nge, tih a ka buai lo. Kan buaina chu Kan ram mi ngeiin kan thunun tur a ni. Tin, sawrkarin a hmuh tur ang hlawkna a tel ve bawk ang, tiin a lo sawi tawh a. Trump hian company lian hotute a hemi chungchang hi a lo sawipui tawh bawk.
Microsoft CEO Satya Nadella leh President Trump inbiakna angin Microsoft chuan hma a la nghal a. US mai ni lovin, tiktok hi a pumhluma lei an tum a. September ni 15 hmain engkim tihfel an beisei thu Microsoft Company chuan a tarlang a, US President hmalakna pawh an thlâwp thu an puang nghe nghe.
Tun tuma Trump executive order hi US Company te tan ni 45 chhung hun tha a siam sakna niin mithiamte chuan an sawi a. Hemi hun chhung hian US company a tu pawhin an lei thei a nih phawt chuan US thalaiten Tiktok leh WeChat hi an hmang chhunzawm thei ang a. India rama Tiktok ngainatu te tan pawh kâwl a eng leh dawn a ni.
Heti taka Tiktok ngaimawh a ni chhan hi, security thil angin lang mahse, Economic War a ni ber a. Kum 2019 chhunga tiktok sum lakluh chu US Dollar billion 3 lai zuk ni a maw le, thîk tham a tling ve hrim hrim.
Donald Trump hian America First a ti fo a. Tuna Titok chunga a chet dan pawh hi, America tan liau liau a ni. Youtube leh Facebook hi US company ve ve a ni tih kan hre vek. Heng Entertainment company video sharing platform el pha thei tura thangduang tak chu Tiktok hi a ni. Tin, digital advertising lamah pawh Tiktok hian tunhnai khan hma an han la thar ve a. India ramah pawh Google Ads khing pha thei tur hnai ber a ni. Heng zawng zawng Tiktok business plan chu tunah chuan thuanawp dawn ta a ni.
US company in Tiktok an lei emawh, lei lo emawh pawh ni se, TikTok banned a nih hrim hrim chuan Google leh Facebook tan hlawkna nasa tak a ni dawn sa hrim hrim a. Tuna lei tura hma la mektu Microsoft hi US company tho niin, US company 3 hian video sharing platform, Entertainment khawvelah hma an hruai dawn niin a lang.
Tin, Microsoft hian pangngai takin ByteDance hi dawr mahse, TikTok hi lei an phal dawn lo hrim hrim. A chhanchu, mi dang tel lo pawhin an hlawhtling hle. An hralh phal dawn lo hrim hrim. Tunah chuan TikTok hmangtu tamna ram pahni, India leh US inthurualin hnawl an tum ta mai si a. Loh theih lovin ByteDance hian TikTok hi Microsoft hnena a hralh mai thei a ni.
Hetiang hi thil awm dan a ni a. Mizo Tiktoker tan TikTok a vul leh dawn niin a lang. @TimesofMizoram
Post a Comment