VILLAGE COUNCIL INTHLAN THUCHAH
By Lalduhoma MLA
Leader, ZPM Legislature Party
VILLAGE COUNCIL INTHLAN THUCHAH

1. Mizoramah hian, tunhma lam zawng kha chuan, Village Council-te leh Local Council-te chanpual tur sum hi Budget-ah a hranpaa  dah a ni ngai lo va. Khua leh veng tinte hian Sorkar chu kan intlawn siak a, VC kan thlan hian ‘Kutdawh tur’ kan thlang a ni ngawt mai a. Chuvangin, Ruling nih loh chuan Sorkar laka tlaktlum a har a, Opposition VC tam takin khawtlang hmangaihna chhuanlama hmangin Ruling-ah an inleh phah fo thin.

Tunah erawh chuan khatiang kalphung kha tha an tih loh avangin, Central Sorkar chuan kalphung thar min rawn siamsak ta a. VC tinten kum tina an sum dawn tur chu Finance Commission-in a hranpa ngatin min rawn ruahmansak ta a ni.

Kumin 2020-2021 chhunga Mizorama VC ten an insem tur atana 15th Finance Commission-in min rawn pek chu Rs 9300 lakh a ni. Heihi installment hniha pek tur a ni.

Finance Commission-in sum min rawn pek hi District 11 ten insem tur a ni a, chu chu VC tinten insem leh tur a ni. District tin leh VC tinte chan tur chu 1st Mizoram Finance Commission-in a ruahman fel leh vek a. Chu chu Finance Commissioner-in, Office Memorendum No G.11024/8/2020-FMC, ni 13th July 2020 hmangin a puang chhuak tawh a ni. Mahni VC te theuh dawn tur zat hre chiang duh tan ZPM Office-ah hmuh theiha dah a ni e.

He kalphung thar hnuaiah hian VC tinte sum dawn zat tur duansa vek a nih tak avangin, Ruling nih emaw, Opposition nih emaw avangin a tlem emaw a tam emaw thei chuang tawh lo. Chuvangin, tunhma lama Ruling Party-te auhla – “Kan khawtlang kan hmangaih chuan Ruling VC ngei neih a ngai a ni,” an tih thin khan awmzia a nei ta lo tih chiang takin i hria ang u.

2. Kan ramah hian VC te hi thiat (dissolve) an ni fo thin a, chungte chu Opposition VC te an ni deuh zel a. Ruling Party-te hian Opposition VC te chu an enthla reng a, thil tihsual an neih hlek chuan an hek a, an dissolve leh mai thin. Hei vang hian Opposition VC te chu an fimkhur a, an eiru ngam lo va, dik takin ro an rel phah thin. Ruling VC te erawh chuan chhantu nei tha an inti a, hlauh tur an nei lo va, hrawn an hrehawm a, a tlangpuiin an corrupt bik thin. Tunah pawh hian Ruling VC engemaw zat, ni za inhlawhna diklo taka kalpui an awm a, Assembly Session meuhva kan auchhuahpui hnuah pawh Sorkarin a hum tlat te sawi tur an tam mai. Opposition VC ten hekna an tawh pawhin, vau nan an hmang a, an sahimna duhin Ruling-ah an inleh phah fo bawk. Ruling VC te hi a tlangpuiin an corrupt thin avangin mipuiten an chanai an chang lo fo va, Ruling Party te hian MLA inthlanah te pawh an VC te avang hian an chhiat phah fo thin.

Hetiang thil hi kan zavaia kan tawn hriat hnu a nih avangin, mipui te hian kan khawtlang tan Ruling VC nge kan thatpui anga, Opposition VC tih hi uluk taka ngaihtuah turin kan ngen che u a ni.

Post a Comment

Powered by Blogger.