India sipaiten a vawi khat nan  Ladakh Black Top chu an thunun mek a. China PLA ten an rawn bei let ngei rin niin, India chu indona hmachhawn turin a inring rán tawh mai a ni. 

India Sipai Hotu ber Chief of Defense Staff, General Bipin Rawat chuan, kan sipai te hi kawng engkimah an inring reng a, tu ram pawh hmachhawn tura inpei sa a awm an ni, a ti. 

Eastern Ladakh lam boruak hi al thut thei renga awm a nih thu kha kan sawi tawh a. September ni 3 khan Indian Army te chuan PLA te chu warning pe in, hmalama ke pén loh turin an hrilh a. PLA ten India ram an rawn nék chhunzawm vaih chuan inkahna a thleng nghal tawh dawn niin a lang. 

US-India Strategic Partnership Forum huna a thusawinaah General Rawat chuan, India hian sipai chakna ropui tak a neih chung hian, inremna a awm theih nan inbiakna hmanga buaina chinfel a duh fova. Hei hi ngaihnep tur a ni lo. Asia khawmualpuiah India hian remna a duh a, mahse, kan tawrh thei tawk a awm ve. India hian tunlai hian chohna lian tak a hmachhawn a. Ram pahnih nuclear ralthuam neiin an ti buai reng a. Mahse ruahmanna fel tak kan siam a, kan sipaite hi an nep lo, kil tina min beih tute chu kan tukzal theih vek ang, tiin a sawi. 
LAC Kashmir

Rawat hian, Pakistan chu fimkhur taka che turin warning a pe bawk a. China leh India ramri buaina vangin lo pawngpaw huai ngawt suh se, India tihnat a tum poh leh Pakistan hi a na ting dawn, tiin Rawat chuan a sawi. 

Rawat hian Kashmir vela helpawl hmanga Pakistan in buaina a siam thin thu te chu he online meeting ah hian a tarlang bawk a. US leh India inzawmna pawh tun hma aia tihnghet a tul thu te pawh a tarlang a ni. Tin, tun sawrkar in Ralthuam lama intodel tura hmalakna lian tak tak a chhawp mek te pawh, India tana thil phûr awm tak a nih thu a sawi lang bawk a ni.

Indian Air Force hotu ber pawhin ral hmatawnga awm te a tlawh kual ve bawk a. IAF  Air base hmun tum tuma awm te  thlithlai in, an inbuatsaihna te a endik a ni. 

Air Chief Marshal RKS Bhadauria hian Arunachal Pradesh leh Sikkim lama Line of Actual Control (LAC) vela Indian Air Force te dinhmun hrechiang turin September ni 3 khan, ni lengin a tlawh a. China ral hmachhawn tura a hote insingsat dan chu a that tawk thu a sawi. 

Eastern Air Command headquarters hi Shillong niin,  he tah tang hian Air Base a tlawh nual a, Line of Actual Control kilometre 3400 zet vengtute chuan an hotu pa hi engkim a that thu an lo hriattir a, China PLA te do chimit an châk zek zek tawh thu te an lo hrilh bawk a ni. 


Chief Marshal hian rinawm taka thawk thin a sipaite chungah lawmthu te sawiin, huaisen taka India ram tana ding turin a chah hlawm a ni. 

May thlaa Eastern Ladakh ah buaina a chhuah atang khan LAC lam hi IAF Chief hian a tlawh zing viau mai a. China laka tlawm leh hi a tum lo bur niin a lang. 

Tun hma deuh pawh khan Srinagar Air Base a lo tlawh tawh bawk a, Ralthuam hrawl tak tak a sipai te duh ang ang chu hmang turin order a pe zung zung mai a. Heng Sukhoi 39 MKI, Jaguar leh Mirage 2000 aircraft te pawh ramri ah hman mai theia dah tawh a ni. Heng bakah hian Apache attack chopper leh ralthuam leh sipaite phur kual zung zung theihna Chinook heavy lift helicopter chu thlawk mai theiin an awm ve reng tawh. 

August ni 29 leh ni 30 zan khan China sipaite chuan status quo bawchhiah in, ram lák belh an tum a. Mahse Indian sipaite chuan an dang thei hram a ni.

Post a comment

Powered by Blogger.