Tunlai khawvel chanchin hi sawi nawn ngai lovin kan hre vek. Developing countries zawng zawng mai hian ralthuam an lei sup sup a. US, Russia, China leh Israel te ve thung chuan sum tam tak lakluh nan an hmang ve bawk a. A siamchhuaktu ni lova, a leitu a tan chuan, sum kan khawhral nasa hle dawn a ni. Dik tak chuan missile pakhat kah chhinna a sum luangliam ringawt pawh hian kan kawng chhia te thui tak a siam thei dawn a. Rafael Jet pakhat man ringawt khan Mizorama chenna in nei loh zawng zawng a pe thei hial ang chu.
Mahse, thenawm ram ten min bei fo avang te leh, India ram ti chhe duh ram an awm ve reng avangin kan ram venhim nan a pawimawh a ni ang e, Israel siam Phalcon, airborne warning and control system (AWACS) leina tur thuthlung India sawrkar chuan a siam fel leh ta.
India chuan he Israel siam thlawhna Phalcon turu zet lei tur hian hun rei tak a lo buaipui tawh a. A man a san em avangin India pawh a lu a haih hle.
Cabinet Committee on Security (CCS) chuan tunlai boruak thlir chungin Israel Phalcon hi India mamawh chhanna ah ngaiin lei turin thutlukna a siam fel ta a, mahse tam tak a lei thei dawn lova, Israel Phalcon 2 man tur ringawt pawh hi US dollar billion hnih (2 billion) zet a tling a. Hluihláwn mai mai atan chuan a lei loh tura ngai ila. Israel Phalcon te hi an service a tawp hmain vawi hnih khat tal chu hmelma beih nan Indian Air Force ten han hmang ngei se, a man a to e mai.
Tun tuma India in AWACS Phalcon a order hi China in min bei thut chuan kan hmang hman dawn lova. Kum 3/4 vel hun a duh dawn a. Mahse, India hian he tiang aircraft hi 3 lai chu a lo nei ve tawh a. Kum 2009-2011 chhunga a lei niin, US dollar 1.1 billion zet sengin a lo lei tawh a. Tun tuma a lei tur hi a hmaa mi aiin a changkan bakah upgrade version a nih angin, Phalcon 2 man hi USD 1 billion a kai dawrh ta a ni. A to hran lo, pawisa value a tlahniam ve zel bakah, tunlai thei ang bera duan a ni dawn a. A hmasa ho kha chuan a tluk dawn lo hrim hrim tih a chiang.
Indian Air Force in February ni 26 , Kum 2019 a Pakistan Balakot airstrike an neih tum khan duh angin Pakistan Air Force te hmaah Indian Air Force te an che hleihtheih lova. Kha mi tuma IAF ten an hman MiG -21 pawh a tla nghe nghe a nih kha. Mahse, a hun lai kha chuan politics a tam hle a. IAF te chu che tha viau angin kan ngai a nih kha. Mahse, IAF dinhmun dik tak a lo lang ta a. MiG-21 hian US siam Pakistan F-16 kha a pha lo nasa mai a. Balakot airstrike hrim hrim kha chu hlawhtling viau mahse, IAF thlawhna kha a tla ta sih a. Tichuan Pakistan F-16 aia chungnung zawk tur IAF chuan a zawng ru ta char char a ni.
Tin, sawi tawh angin, tunlai boruak inlumlet chho mek hi thlir loh theih loh a ni a. India hian indona a hmachhawn theih reng a, kawng engkima lo inbuatsaih chu thil tih makmaw a ni.
Israel siam Airborne Warning and Control System (AWACS) Phalcon that bikna em leh, Indian Air Force ten an duh chhan chu, a lam pana lo kal jet fighter, cruise missile leh drone chi hrang hrang a lo hre thei a. He a thil hriat theihna hi a sang hle a, lei lama radar ten an hmuh hmain Phalcon radar hian a hmu zung zung thei a, a lo inveng hman dawn a ni. Jet Fighter tam zawk chuan lei lam radar an ring a, i formation thawn kual chhung pawh hian second tam tak a la dawn na. Indona hmunah chuan second 1 pawh a hlu tawh a, Phalcon hian awlsam takin a ma radar a hmang mai dawn a, a che rang zawk hle dawn a ni.
Tin, vansang boruakah mai ni lovin, Phalcon hian Lei lama sipai te a hmu thei bawk a, hmelma ralthuam awmna a hre thei a, indona mualah hna a thawk kawp teu thei dawn a ni. A awmzia ber chu hmelma awmna beih pahin a inveng thei a, boruak leh hnuai lama awm te a attack thei ve ve a ni.
Times of India in a tarlan ang chuan, tun dinhmunah Pakistan hi kan pha loh deuh niin a lang. Balakot airstrike ah pawh khan a chiang mai a. Tin, Pakistan hian Chinese Karakoram Eagle ZDK-03 AWACS leh Sweden siam Saab-2000 AEWC chu sawm khat lai a nei a. India hian a pha lo nasa hle a ni. China erawh chuan tuna kan sawi ang ralthuam hi 30 vel a kawl mek a, Kong Jing-2000 Mainring, KJ-2000 Moth leh KJ-500 aircraft te a kawl bawk.
Sawi tawh angin, India hian AWACS Phalcon, Israel siam hi 3, 400 km range leh tualchhunga siam Netra AEWC aircraft pahnih a kawl ve mek a. Brazil siam Embracer-145 jet pawh a kawl a, mahse, Pakistan kan pha lo deuh a ni.
Israel Phalcon chungchangah hian kum 2004 khan Russia, India leh Israel chuan Inremna an lo ziak tawh. Israel in radar system lam India a pe ang a, Russia in II-76 A-50 heavy Airlifter a pe ve thung ang, tiin, ram pathum te chuan inremna an siam a ni.
China pawhin Israel Phalcon hi kum 1994 daih khan lei a lo tum ve tawh a. Inremna engkim an siam hnu chuan US in Israel chu kaltlang pui loh turin a hrilh a, vawiin thlengin Israel chu a ngawi hlen ta a ni.
Kan India ram hi tun dinhmunah chuan Indo turin a inpei chiah lova. Mahse, hmelma ram te hmachhawn turin a nép ta viau e, kan tihna phei chu a ni lo. Lei lam sipai a ngah a, sipai ropui tak a nei. Mahse, boruak lam hi a la pan deuh hlek a. Aircraft leh air defense system lamah Pakistan el pha turin tan a la mek a. Rei lo te hnuah Pakistan chu a lehpel thuai ang. A nihna taka sawi chuan, ralthuam lamah China hnung kan hnawt mek a ni.
Mahse, hlauhthawn tur a awm love, US, Russia, leh Israel company te nen Indian company te an thawkho mek a. Tualchhunga an siam Sukhoi, Tejas kan ti te pawh hi pui tak tak vek an ni. Top arms supplier ram pathum ten Indian company ho an puih mek a. Kum 5 hnuah chuan India hi khî tah, Pakistan khû tah, a ni tawh ang.
Kan sawi fo tawh angin, India hian leh lam leh lamah indo a hmachhawn thei a, ralthuam hi tam tak a kawl a ngai a ni.
Pakistan in kil khat atangin a bei ang a, China in Chhak lam atangin a lo bei ve bawk ang a. A hautak dawn hle. Kan India sawrkar hian Myanmar, Nepal leh Bhutan ram te hman tangkai dan a ngaihtuah a hun ta hle.
Post a Comment