Hun rei tak chhung chu India leh China inngur thu kha kan post thin tawh a. Thlirtu thenkhat chuan "Youtuber hovin indo tir in tum" an ti thin a. Ram pahnih inkar boruak dik tak hi kan sawi ai hian a chhe mah zawk ang chu, ti tur a ni. September ni 8 ah silai a puak thu kan hmuh a. Boruak hi a la tang tha hle mai a, inkahna a thleng leh thut thei reng. 

China in sipai battalion thum zet LAC ah a dah tawh. Kan sawi fo tawh angin China hian a ruk takin Indo turin a inpuahchah ve renga, India lam pawh chuti tho, he tianga leh lam lehlamin hma an lak reng chuan, inkah bák hmabák a awm meuh lo. 

September ni 7 khan PLA te Mukhri, Chushul lamah India ram rawn luh an tum chu, Indian Army in an lo dang chat thei a. Mahse, PLA te hi luhlul an chhuah reng a, hmun remchang an zawn reng avangin Indian Army te tan inthladah a thiang lo. 

September ni 1 khan China chuan PLA Ground Force battalion khat zet chu LAC Rechin La bulah a rawn chhawp a. Hei mai a la ni lo, Spangur Lake lama pawh battalion 2 zet a chhawp bawk a ni. Heng PLA te hi 62 Combined Brigade, tunah Shikwan a awm te nena pawl khat vek an ni. 

Tun dinhmunah Indian Army lam hi an che tha zawkin a hriat a. August ni 29 leh 30 khan Rechin La leh Rezang La hi PLA te kut atangin an la let a. He lai hmun 2 hi hmun pawimawh tak niin, Moldo Cantonment, China PLA te awmna chu chiang takin an thlithlái thei tawh dawn a. Mahse, PLA lam hian ngawibo pui an tum dawn lo hrim hrim a, Rechin La leh Rezang La hi laklet an tum hle dawn. 

Tun hma aiin China hian Sipai a dah chikim tawh a. Ladakh lamah motor division dahin, Chushul velah hian Fourth Motorized Division te an awm a. Pangong leh Daulat Beg Oldi lamah 6th Motorized Division teh dah an ni bawk. Spangur Gap velah 4th Motorized Division a mi, Tank battalion chu inring ránin an awm tawh bawk a. Indo tura insingsa an ni berin a hriat. 
China India tension

China ang bawkin India pawh a theihna zawng zawng sawmkawmin China PLA te chét lák theihna tur hmun zawng zawng LAC ah tank leh armored vehicle a dah vek tawh a. Ram pahnih sipai te hian inkah mai lo chu tihtur dang an nei tawh vak lo. 

Ladakh hrim hrim hian phairuam zau tak a nei a. Ralthuam tank leh chi hrang hrang, duh thála hman theih turin hmun tháwl záu tak a awm a. Inbeihna turu leh rapthlak tak a thleng thei dawn a ni. 

September ni 8 a silai kah chungchang kha ram pahnih te hian thiamthu sawi ve vein, an inpuhmawh tawn ve ve a. A engahpawh chu  ni se, tun hmaa Inremna Thuthlung Silai hmeh puah awihlo ti chu zawm an tum tawh lo ve ve tih a hriat a. June 15 a Galwan Valley inbeihna ah khan nunna tam tak chán ni mahse, silai tel lova inbeihna a ni a. Ram pahnih ten an thuthlung siam chu an zawm tha hle a nih. 

Mahse tunah chuan a tu zawk zawk pawh hian silai an hmang tawh dawn, tih entirna ni awm takin Silai ri chu kan hre ta a. Heng laia sipai awm te tan pawh a phûr awm ve khawp ang. Sipai ni si, silai hman han khap tlat te kha thil buaithlak tak tur  a ni. 

September ni 8 a silai puak kha PLA leh Indian Army ten an kah ve ve niin, kum sawm hnuah silai  puah vawi khatna a ni. Sawi tawh angin ram pahnih te inremna angin LAC hrûla silai hrim hrim hman kha khap a ni a, mahse sipai engemaw zatin nunna an chán ta tho a ni. 

Inremna Thuthlung khirh leh muanpui awm tak siam thin mahse, a tu zawk zawk pawh hian an thil duh tihpuitlin ve ve an tum miau a, inremna hi a awm dawn lo hrim hrim. Ram pahnih te hian a hma aia nasa zawkin sipai leh ralthuam an chhawp tawh a. Indona hmanga chak zawk puan a ngai dawn niin a lang.

Indian Army lam chuan September ni 8 a thilthlengah khan China lam a puh fai vek a. LAC lamah status quo bawhchhiatna Indian Army lamin an neih loh thu leh, China PLA te zawk hi tharum thawhna hmanga buaina siamtu niin an sawi a ni. China lam ve thung chuan Indian Army te hi silai kap hmasa zawka a puh a, PLA te patrolling lai chu Warning Shot an  pe a niin an sawi ve thung a ni. 

Nuclear ram ropui ve ve, Khawvel economy lian ni bawk an nih vang nge, inbiakna pawhin awmzia a nei tawh lo hle. September ni 4 khan Moscow hmunah ram pahnih Defence minister te hian inbiakna neiin, boruak a that chho mai kan ring fur mai a. Mahse, ni 3 em pawh a liam hmain, boruak a sosang belh sauh a, an pahnih mai hi chuan inremna an siam a rinawm ta lo. 

Russia leh US hian inrawlh an duh ve ve a. Remna siampui pawh an duh a ni. Mahse, India leh China hian tu ram mah an sawm duh lova, kar leh hian Moscow khawpui ah bawk China Foreign Minister Wang Yi leh Indian External Affairs Minister Jaishankar te an inhmu leh dawn a. Remna kawng zawh tura beiseina a sáng hran lo.

Indo law law a tha zawk ang em? Tunlai khawvel economy kan thlir chuan Covid19 vangin ram zawng zawngin kan tuar a. A tuar bertu chu India a ni. Covid19 lo chhuahna China erawhin Economy lamah harsatna a tawk lutuk lo. 

LAC lamah tun boruak anga kan kal reng chuan China aiin India in a tuar zawk dawn a, a tuar reng tawh bawk. LAC lamah Sipai 30000 chuang leh Ralthuam tam tham tak enkawlna senso tam tur zia hi kan chhut thiam phák bák a ni. 

Covid19 vanga Indian economy hnungtawlh thu hi hai rual a ni lo. Independent India huna economy chhiat ber tum kan thleng a. Ralthuam kan lei nasa si, LAC lamah Pakistan leh China te chét ang zela chét lák a ngai si, kan ram economy a chhe mék a ni. China erawhin harsatna sawi tur em em a nei lova, LAC leh South China Sea lamah a duh tawkin a inhrosa thei reng. 

China hian tun dinhmunah indo a tum lova, ram dang economy tihchhiat hi a tum ber niin a lang. South China Sea lamah US vangin a duh a la hlawhtling chiah lova, US election result azirin South China Sea pawh a danglam tawh ang. 

India hian Pakistan leh China ramri lamah sum leh pai tam tak a hman a ngai a, tiang reng hi chuan kan economy in tlin loh hun a nei dawn a, China hi kan la ngawihsan mai a ngai ang. 

Nepal leh Bangladesh hian ramri lamah buaina an siam belh vaih chuan, kan thunun thei emawh, thei lo emawh, kan tawrhna belhchhana tur mai a ni dawn. Tunlai khawvelah Ralthuam hi indona a ni tawh lova, economy hi kan ralthuam ropui ber a ni. 

Dik tak chuan, Russia S-400 pawh hi sum hmanga lei, a chet velna tur zawng zawng pawh insensona tur vek a ni. China hneh tur chuan Kan economy a chak a ngai. Kan economy chhiat zual hma hian China hi kan kap pawp a tha mai lovang maw....?  Enge in ngaihdan leh? @TimesofMizoram

Post a comment

Powered by Blogger.