Nimin September ni 10 khan Chinese Foreign Minister Wang Yi leh Indian External Affairs Minister S Jaishankar chu Russia khawpui Moscow ah inbiakna an nei a. Nimin piah mai khan Ram pahnih sipaite te karah Silai chelekna hial a thleng a, he inbiakna hian awmzia a nei thei dawn em, tih chu khawvel chanchinbu mite thlir mek a ni.
Tunhma deuh khan Russian Minister chuan India leh China buaina chinfel turin Russia chuan hmalak a inhuam thu a puang a. Russia khawpuiah tum hnih ngawt inbiakna a awm tawh chung hian, ramri buaina hi dai lam a pan theih loh chuan, indo law law mai a tha tawh mai thei a ni.
September ni 10 inbiakna hi Russia pawhin theihtawp a chhuah turah ngai ila. India leh China hian boruak tha zawk an siam thuai beisei phawt ila, mahse, an thil duh hi tihpuitlin ve ve thei a ni dawn lo hrim hrim a. Tunah an dinhmunah hian an lungawi lo ve ve sih a, Inbiakna hmanga sawi fel pawh thil harsa tak a ni réng a. Chutih chung chuan, indo mai aiin inbiakna an la kalpui ta zel chu a nih hi.
India sawrkar thupuangtu chuan Russia ramah ram pahnih Foreign Minister te inbiak hma lawk hian, India sipai te chét dan tur chu a puang hmiah mai a. China PLA ten Red-Lines an rah vaih chuan, Indian Army ten an kah nghal tur thu a puang a ni. India hian engti kawng zawng pawhin China lakah hnungtawlh a tum tawh loh bur mai a. Sipaite chu an silai hûm te a tul hunah hmang turin zalenna an pe vek tawh a ni.
The Global Times in PLA te tawngkam rawva tak tak an tichhuak fo thin ang khan, India lam pawhin tawngkam na tak tak an chhákchhuak tan ve ta a. Ramdang puihna kan hmuh that hmel bawk a, huai hun lai tak niin a lang.
Tuna Indian Army in an thunun mek hmun thenkhat hi Galwan Valley buai hnua India sipai ten an lak niin, hei hi China PLA te hian laklet an tum bur mai a. Mahse, tun hma ang lo takin Indian Army te kalphung a danglam ta si, Hmun tina Commander te chu a tula an hriat phawt chuan silai hmang turin zalenna an nei avangin, China PLA hi tunhma angin an huangtau lutuk ngam bik lova, Indian Army lam pawh an lo dawizep bik lem lo, silai hman phalna an nei lo vanga dawi hlawh mai an lo ni.
Indian Security Establishment Assessment in a tarlan danin, China hian sipai 50000 vel zet chu Eastern Ladakh ah hian a dah tawh a. Indo thlawhna fighter pawh 150 vel zet chu Xinjiang leh Tibet ah a dah tawh bawk. Mahse, indona hmachhawn tur tak tak chuan a la inpuahchah bik lo niin, India lam chuan an ngai deuh.
India sipai lam pawh meeting an nei zing khawp mai a. PLA te chét ang zela an sipaite chét lak tir an tum a. Hmun thenkhatah hi chuan India dinhmun a tha zawk a. Mahse, China hian sipai, ralthuam leh technology ah min tam hneh em avangin India tan hmalakna tur a la tam hle a ni.
Entirnan, tláng thenkhat Rezang La, Reqin La leh Magar Hill te hi Indian Army ten an la tawh a, he ta tang hian Indian Army te chuan PLA te nunchan an thlir thei a ni. Mahse, China lam chuan sipai tam tak hmun khatah dah lovin, camera te an fit vek a, Indian Army te an enzui thei reng a ni. Tiang hian inthláuna a awm a, a pumpui thuah hian India lam chuan sum sen belhna tur a la ngah hle a ni.
Hetih lai hian, Rafale Jet chu Indian Air Force 17 Squadron Golden Arrows ah lakluh a ni ta a. French Armed Forces minister Florence Parly chuan khuallian niin he hun hi a hmanpui a ni.
Lakluhna inkhawm hi Air Force Station, Ambala hmunah nei niin, Defence Minister Rajnath Singh, Chief of Defence Staff General Bipin Rawat, Chief of Air Staff, Air Chief Marshal RKS Bhadauria leh official pawimawh tam tak an tel a ni. Rafale Jet siamtu comapny Dassault Aviation lam atangin Chairman leh Chief Executive Eric Trappier pawh a tel ve.
Lakluhna program hman zawh hian French leh India palai te chu an inkawm zui nghal a. Ram pahnih te chak zawka an thawkho theih dan tur an sawiho a ni. Kan hriat tawh angin July ni 27 khan Rafale Jet te hian Ambala station an thleng tawh a. IAF lamin an hman nghal mai kan lo ring deuva, mahse hei, thla khat hnuah hman thei tura lakluh a ni ta chauh a, Indona mualah a hman theih tawh turah ngai ang.
Central sawrkar hian Mizoram min copy nge, Mizoram hian Vaiho khawsak dan kan copy zawk ni, hawnna inkhawm, sawiho tih vel hi kan uar hle mai a. Ramri lamah buaina nasa tak a awm mek laia Ambala lama Rafale Jet panga vel lek lakluhna inkhawm han nei vel hi, Thil tul tak zawng a ni lo chiang mai. July ni 27 daih tawha lo thleng tawh, ramri lamah an thlawk kual zak zak tawh turah kan ngaih laia, Lakluhna inkhawm tih vel hi, a tul hlawl lo a ni.
Ralthuam manto tak tak kan lei te hi, ramri lamah, kan hmelma te hmuh theih turin han lekkaw vel ila, buaina pawh a nép mahna le.... Khawpui hmun himah kan dah vek mai a, kan sipaite pawhin a enkawl hi an thiam lutuk lo ni te pawhin a lang.
Kan zoram ngei pawh hi International Border Myanmar leh Bangladesh nen kan nei a. Indian Air Force lam hian military exercise an neih awm pawh kan hre ngai meuh lo. A bikin, China leh Pakistan lamah hian military exercise hi uar se, kan hmelma te pawh an zám ve deuh ang.
A tawpah chuan, Economy bawk hi thil pawimawh a nih thu sawi leh a ngai thin. Kan ralthuam te, duh tawka kan hman theihna tur chu a tuialhtheih (Oil) man te kan intodel a ngai, Congress aia huaisen BJP in India an enkawl mek a. Ramri lamah chuan tháwm an ngah viau mai. Mahse, kan economy lam hi Congress sawrkar angin an enkawl thiam ve si lova, a tu zawk nge tha, ti pawh sawi a har ta khawp mai. @TimesofMizoram
Post a Comment