Pathianin mihring a siam a, a hmingah ‘Adama’ tiin a vuaha a. Pathian chuan “Mihring amah chauhva awm hi a ṭha lo ve, amah ṭanpuitu tur a kawppui àwm mi ka siamsak teh ang,” a ti a. Tichuan Adama nâk ruh aṭangin a kawppui tur hmeichhia a siam leh a. Adama chuan a nupui chu mi nung zawng zawng nu a nih avangin Evi a vuah a. Mi mal tinin hming kan nei ṭheuhva, hnam tin hian mahni hming bîk kan nei ṭheuh bawk a. Mi eng hnam nge a nih hriat awlna ber chu an hming aṭangin a ni. European hnam hrang hrang te -English, Spanish, French, Italian, Portuguese, German, Russian te khu an hmel aṭang ringawt chuan hriat hran an har a, anmahni kan hriat hran theihna awlsam ber chu an hming aṭangin a ni. Chutiang bawkin Mongolian thlah Chinese, Japanese, Korean hote pawh an hmel aiin an hming aṭangin hriat hran an awlsam.
Mizote hming phuah dan
Mizote pawhin hming bîk kan nei a, kan hming inphuah ang hi khawvel khawi hnam mahin min ṭâwmpui lova, chuvangin Mizo kan nih hriat hranna pawimawh ber chu kan hming hi a ni.
Tunlaia kan Mizo hming put dan hi a tlangpuiin Sailo lal thlahtu Zahmuaka aṭang hian awmzia a neiin a lang. Zahmuaka thlahtute hming Ralnaa, Sihsinga, Niguitea te hi chu tunlai chuan kan pu tawh lo ang a ni. Zahmuaka fate hming Zadenga, Paliana, Thangluaha, |hangura, Rivunga, Rokhuma te hi chu tun thlengin hming atan kan la pu hlawm a.
Sailo ho an lal hnu hian an hmingah Lal tih hi an uar a, hei hian Lal an nihna leh an chungnunna entirnan Lal tih hi an hmingah an sa niin a lang. Lalburha, Lallula, Lalsavunga, Lalmanga tih te chu Sailo lal lar tak tak an ni hlawm. Professor C Lalluia chuan hnamchawm ho chuan tunhma chuan hming an sak hian ‘Lal’ tih tela hming sak tel hi Lal tihlungawi loh an hlauh avangin an inthlahrung ṭhin a ti. Chuvangin an hming phuaha pawh Lal tih telh loh hram an tum ni tur a ni.
Mizote hian hming an phuah hian an chhung khat thil tih ṭhat leh ropui hming chawia phuah a ni chawk ṭhin. Miin buh phur za a thar chuan an tufa-te hmingah Zaliana titein an phuah ṭhin a, phur sang an thar chuan Sangthanga tih in emaw an phuah ṭhin. Kum hnih a záwna buh phur za an thar chuan Zazawni ti tein hming an phuah ṭhin a. Mi a lo hausak viau a cheng sing a neih chaun a fate hmingah Singthanga ti tein an phuah ṭhin. Sa a kah theih viau chuan Kâpsanga, Kâpliana tiin hmingte an phuah ṭhin a. Japan rál do zinga tel ve an awm chuan an fate hmingah Rálliantawna, Doliana titein an phuah bawk a ni. Tlang hmingthang deuh hming cháwiin hming an phuah bawk ṭhin. Miin sai a kah chuan Saikâpa tiin an fate hming an cháwi bawk ṭhin. Unau mipa a zawna an pian chuan Pàzáwna tih te hmeichhia a zawna an pian chuan Nùzáwni titein an phuah bawk ṭhin a.
Kan hming ziah dan kan thlâk zel
Mizo zingah mi eng emaw zat sipaiah an ṭang a, hnam hming an lo dah ngai si lova chuvangin Lushai tih kha an hnam hmingah an telh ta ṭhin a, Liana Lushai, Kâpa Lushai ti tein an phuah ṭhin. Phai rama réla an chùan chuan Rel tih telin Rélliana tih hmingte an phuah ṭhin. A tlangpui thuin chhung khat zinga mi thiltih chhuan tlâk a awm chuan chumi hming chawi chuan hming an phuah cháwk ṭhin. Hun a lo kal zel a, Lal khawnbawl fate chu Lal an belh avangin Lal tih hi an fate hmingah an chawi bawk ṭhin a, chuvangin Lal tih hi Lal chhungkua kher lote pawhin an pu ve ṭhin.
Kristian kan nih hnu hian Pathian chu Lalber a nih avangin Lal tih tela hming phuah hi a lo lar ta em em a, tunah hian kan hming tam ber chu Lal tih a tel a ni. Kumin Home Mission School Class X zirlai 234 zinga 150 te chuan Lal tih hming an pu. Mizote hi tlang rama cheng kan ni a, kan hmingah pawh hian Zo tih hi kan hmang nasa khawp mai a. Mizote hi kan hnam rilru a lo harh hnu hian Zo tih tel hi hming lar ber pawl a ni tawh hial ang. Zorami, Zoliana, Zohminga tihte hi hming lar tak a ni chho ta a ni.
Kum 1950 kum aṭang khan mi engemaw zat Kawl ramah an pém chho leh a, chuvangin an chhungte khan an fate hmingah Kawl tih hi an telh nual mai. Entirnan Kawlramthangi, Kawlvuani, Kawlluni.
Eng tik lai aṭang khan emaw hnam hming bul alphabet hmasa ber kha dah kan ching leh a. Ralte hnam a nih chuan R Liana, Pachuau a nih chuan P C Liana, Chhakchhuak a nih chuan C Liana, Vanchhawng a nih chuan V Liana tiin hnam hming bul alphabet kha hmingah kan belh ṭhin a. Hun a lo kal zel a, hnam dangte tih dan zulzuiin hnam hming kan dah ve ṭan a, Rini Kawlni, Rina Pachuau, Rema Renthlei, Liana Zadeng, Vunga Sailo tiin hnam hming hi kan dah ve leh a. Hnam dangte chuan hnam hming hi dah ngei ngei tura an ngaih avangin form fill up na atan hnam hming (surname) hi compulsory a ni tawh a. Rel emaw thlawhna ticket booking dawn chuan hnam hming hi an ti compulsory a, chuvangin hnam hming pêk hi tunlaiah chuan thil ṭul tak a ni tawh. Chubakah mihring kan lo tam zel a, hming inang kan tam tawh avangin hming kan phuah hian hnam hming telh hi a ṭangkai khawp mai.
Sap hming kan ngaisang
Mizoramah Roman Catholic an lo luh hnu hian mi eng emaw zat Catholic-ah an inpe a, Catholic te chuan Mithianghlim hming an neih a ngaih avangin Mithianglim hming an nei ṭhin. Sap hovin min rawn awp a, an culture-in min rawn hneh chhova, an tih dan kan entawn a, an hmingte pawh Catholic ni lem lo hian kan hming atan kan inphuah nasa ta khawp mai. Tunlai hian Pastor hote pawhin Baptisma an chantir hian Sap hming nei an tam thu an sawi ṭhin. Vawi khat chu kan vengah Baptisma chang 12 zingah mi 7 in Sâp hming an nei. 2018 Mizo Idol top 6 zingah khan 5 te chuan Sâp hming an nei. Ticos Darhmingliana, H Lalnunsiami, Jonathan Lelengzauva, Immanuel Lalawmpuii, Jerry Lalrinawma, Andrew K Lalchhandama. Kha inelna kha Mizo Idol nilovin Anglo-Mizo Idol tia thlâk hial chi a ni.
India ram khawpui hrang hranga Mizote Hming
Pune Mizo Directory 2009 ah chuan mi 303 hming a chuang a, chung zinga 80 (26%) te chuan Sâp hming an nei a, Mumbai Mizo Directory 2011-2012 ah chuan mi 278 ah 88 (31% ) ten Sâp hming an nei a ni. Hyderabad Mizo Directory 2006-ah chuan mi 274 zinga mi 94 (33%) ten Sâp hming an nei a, Chennai Mizo Directory 2004-05 ah chuan mi 260 zingah mi 62 (23%) in Sâp hming an nei. Bangalore Mizo Directory 2008-ah chuan mi 892 zingah mi 319 (35%) in Sâp hming an nei a, chawhrualin 31% velin Sâp hming an nei a nih chu.
Home Mission Class X zirlaite Hming
Kumin Matric result chhuak kha en ila. Home Mission School aṭangin zirlai 234 in an pass a, chung zinga 75 (32%) te chuan Sâp hming an nei a, Hmeichhe 115 zingah 34 (29 %) in Sâp hming an nei a, mipa 119 zingah 40 (34%) in Sâp hming an nei a. Heng zirlai ho zingah hian Sap hming han tihlar bik em em an nei lo va.
Hmeichhe zinga hming inang tam ber chu Judy leh Ruth a ni a, mi pathum ṭheuhin heng hming hi an pu a ni. Mi pahnih ṭheuhin Angela, Jenny, Juliet, Marina, Sandra, Sarah hming an pu a ni. A dang 19-te chuan hming hran ṭheuh an pu.
Mipa zingah hian Sâp hming duh bîk em em a awmin a lang lo. Joel, John, Jonathan, Ricky, Ronald, Samuel, Moses hming pu hi 2 ṭheuh an ni a. A dang zirlai 26-te chuan hming hran ṭheuh an pu a. Home Mission hi Catholic School a nih loh avangin Catholic Zirlai Christian hming neih ngei ngei ngai an awm chuan pahnih khat bâk an nih a rinawm loh. Sâp hming lar tak neih châk vang ni lovin Sâp hming neih hrim hrim rilru pua Sâp hming hi nei an nih a rinawm.
Thinglang School
School dang result han thlìr pawhin thingtlang school kilkhawr deuh a mi pawh Sâp hming neih lohna school a váng khawp mai. Chhîpphir Govt High School zirlai 16 zinga 7 in Sâp hming an nei a. Lungsum High School-ah pawh zirlai pahnih an pass-a Sap hming an nei ve ve. West Serzawl High School-ah pawh mi 3 in an pass a, pahnihin Sâp hming an nei.
Sap hming nge Sanskritic hming?
M N Srinivas, Sociologist lar tak chuan Sanskritization tih hi a rawn ti lar a. India ram, a bikin Bengalah chuan Hindu hnam hniam zawkten hnam sang zawk nih duhin Brahmin tih dan an entawn a, an hmingte an thlâk a. Hetianga an tih hian society-ah an nihna kha sáng sawt turah an ngai a ni.
Mahni nihna tihsan tuma hnam changkang zawkte tihdan copy hi Sociologist te chuan Sanskritization an ti a ni. Kristian hming ni lem lo, Sâp nunchan zir a, an hming kan inpêk ve mai pawh hi Sanskritization chu a ni. Chuvangin sociologist ho ṭawngka hawhin heng Sâp hming tia kan sawite hi sanskritic hming tiin kan sawi tawh mai ang.
Sanskritic hming mahni thua inphuah hi lem channa chi khat a ni a, kan va copy society te khan min ngaihsan aiin mi lemah min ngaiin a rinawm zawk. India hnampa Pu Mahatma Gandhi pawh England-ah lehkha a zir laiin English Gentleman nih tumin Sâpho tih dan a copy a, nimahse Sâp a ni thei tak tak lo tih a inhriat chhuah hnuin India mi nihnaah kir lehin Indian hnam nihna leh tih dan kha a champion-pui ta a ni. Sanskritic hming hian kan dinhmun tihsan aiin mahni nihna hlohna kawng kan zawh mek zel a ni tih hriat a ṭha khawp mai.
Japanese, Korean te chu technology lama an changkan vangin khawvelin an ngaisang, Sâp hming an neih kan hre lo. America pawh Vietnam lakah a tlawm, Vietnamese ten Sâp hming an neih kan hre lo. Mahni hming zahpui loh hi khawvelin min ngaihsanna tur zawk a ni e. Kan Mizo hming pu ngamin Mizo nihnaah i kir leh ang u. Mahni hming pum put ngam loh hi hnam ral ze dik tak a ni. Mi 100-a 30 zelin Sâp hming kan put duh tawh chuan kan hnam dinhmun chu ngaihtuahawm tak a ni. YMA te pawhin Conference leh hunah Mizo hming humhalh tih hi Kum Puan Agendaatan a neih a va ṭul tawh ve. |hangtharte hian Sanskritic hming kan inpe zel dawn nge full stop hmangin kan titàwp tawh dawn? Sankritic hming hian hnam boralna kawngah min hruai lût mek a ni tih tih hriat a ṭul a takze a ni.
-MS Tluanga Pa
Post a Comment