US Secretary of State Mike Pompeo chuan zirtawpni khan India ram nena thawh hona tha zawk siam a tul thu a sawi a. Tunlai boruak, China vanga harsatna tam tak a awm mék lai hian khawvel democracy ram lian pahnih te hi chak zawka an thawh ho a pawimaw a ni, a ti. 

Kar liam ta khan Pompeo hian India, Australia, Japan leh United States telna Quad meeting-ah thu sawiin, India leh China hian United States an mamawh ve ve a. Kan hawina lam lam chu a chak zawk tur a ni mai, a ti. Radio interview a neinaah pawh Pompeo chuan, India hmar lamah China PLA ten sipai tam tak dah an tum thu a sawi lang bawk. 
US India relations
Khawvel ram te an harh tawh a. US President Donald Trump hnuaiah ram hruaitu tam tak te chu an intelkhawm mek a, Communist sawrkhar duh lohna thlipui a tleh mek a ni, a ti bawk. 

US Secretary of States Mike Pompeo leh US Defence Secretary Mark Esper te chuan New Delhi an rawn tlawh thuai dawn. Anni bakah hian Deputy Secretary of State Stephen Biegun pawh a tel dawn niin, US State Department thuchhuak chuan a tarlang. 

India's Ambassador to United States, Taranjit Singh Sandhu chuan, US-India inlaichinna a that chho zel thu sawiin, China thawhpui ai chuan US thawhpui hian kawngro a sut zawk thu sawiin, tun tuma US Secretary of States leh Defence Secretary lo zin tur hian, Defence lamah India-US inzawmna a tichak lehzual a beisei thu a sawi a. Ram pahnih te inzawmna hi a pawimawh ringawt lova, tih mákmawh a ni zawk, a ti. 

Kar liamta Quad Summit ah khan Mike Pompeo chuan  Indian External Affairs Minister S Jaishankar  hnenah, China in Sipai 60,000 aia tam ramri ah a dah tawh ti hrilhin, China hmalak dan chu Pompeo hian na takin a dem a ni. 

Tun tuma Indo-Pacific ram Foreign Minister te meeting hi Covid19 hri len hnuah hmaichhana Quad ram palaite inbiakna hmasa ber a ni. China huangtau a zual zel a. Indo-Pacific, South China Sea leh Eastern Ladakh Line of Actual Control vela China khawsak dan hian, Quad ram te a awm hle hle tir thei lo chu a ni ber hih. Corona Virus hri leng karah hlimthla hmanga inbiakna mai an duh tawk ta lova, hmai chhanah inhmuin, China laka chét lák dan tur an sawiho a ni. 

Pompeo chuan, kan thawhpui foreign minister te nen hun kan hmang a. India, Japan, Australia leh US hian pawl pakhat Quad kan nei a. Khawvel democracy ram lian 4, economy chak tak nei vek kan ni. Heng ram te hian Chinese Communist Party lakah harsatna kan nei vek a. Kan thawhpui te pawh hi an ram theuh ah China hian harsatna a siam sak bawk a. Chu chuh kan hria a, do rawn kan tum a ni, a ti. 

Heng boruak karah hian India pawhin ramri lamah a theih tawkin sipai leh ralthuam a dah belh ve reng a. Neutral taka han thlir chuan, a tu zawk hi nge thiam loh, ti pawh sawi a har ta viau mai. 

October ni 10 Inrinni khan Indian Air Force chuan hmalakana thar an nei ve leh ta. A C-17 Globemaster transport aircraft chu Leh airbase, Ladakh ah a tum a. Sipai te mamawh a pe nia hriat a ni. C-17 Globemaster, lian leh hrawl zet mai hian ralthuam tam tak a phur thei a. Darkar tam tak chhung a thláwk thei mai bakah, eng anga khaw dur leh vawt karah pawh harsatna a nei lo. PTI in a tarlan danin, ralthuam, tuialthei, eitur (food) leh thlasik thawmhnaw tam tham tak IAF chuan nimin khan ramria awm sipaite an han pe a ni. 

C-17 Globemaster bakah hian Helicopter, C-130J Super Hercules te pawh nimin khan Indian Air Force hian an hmang a ni. C-17 Globemaster hi kum 2013 khan India in a hmang tan ve a. Indona muala sipaite mamawh pek nan chauh ni lovin, Chhanchhuahna leh Sawmdawlna hna thawhna atan te tangkai taka hman a ni fo tawh a. A tangkai em avangin Vansáng Lalpa an ti hial.

Ramri buaina vangin India leh China hian inbiakna an nei fo a. October thla chhung hian Military Commander level bakah, BRICS Summit hunah Modi leh Jinping pawh an inbe dawn bawk a ni. Mahse, United States chuan keini lo ralkhat ngaihdan ang tho hi ngaihdan a nei a. US chuan Inbiakna leh Inremna thuthlung hian awmzia a nei lova, China rilru a thlák ngai lo ti pawm hun a ni tawh, tiin India chu hrilh var/fing a tum a ni. 
India hian inbiakna hmanga buaina chinfel a duh fo a. Remna a awm dawn phawt chuan inbiakna nei chu tha kan ti vek awm e. Mahse, Agreement tam tak ziah a ni tawh thin a. A bawchhetu zawk chu China hi a ni fo mai. Inremna ziah thar kher a ngai tawh lova, India hian China hnenah Kan inremna hmasa kha zawm ula a tawk han ti mai se, hun leh sum tam tak kan hmang ral loh tur  a nia. Mahse, China ho rilru sual tak, zép nei rána ramdang dawr thin ram hi chu, khawvel ram zawng zawng hian an tuithlár chu a ngai a ni.

Kan sawi tawh angin, US sawrkhara mi pawimawh 3 chuan India ram an rawn tlawh thuai dawn a. India hian kan ram leilung ngeiah Ralthuam lamah thawh hona tha zawk lo siampui thei se a duhawm ngawt mai. 

Russian Jet fahra te te kan lei reng a. Ram dang Jet el pha tak tak bawk si lo, Kan Indian Minister leh ralthuam leitute hian sum chheprelnan Russian ralthuam hi an lei thin reng em ni? US F-16 te Pakistan in an hmang a. India pawhin F-16 aia tha zawk hi US hnen atang hian lakluh dan hi zawng ve se, tun anga hun tha hi a tam tawh lo mai thei. US Election a zawh hunah Trump a tlak hlauh chuan, US-India relation hi a chhe kher loh pawhin, tun ang hian a tha kher lo mai thei bawk. I thlir zel phawt teh ang....

Post a Comment

Powered by Blogger.