Tin, damdawi chu a la a a phel a, a phel lehlam chu a kachhungah a dah a, chumi zawh chuan No chu a la a, Appy tlem a thli a dawmdawi ei nan chuan a hmang ta a, chuatiang bawkin a phel lehlam chu a ei leh ta bawk a."

Damdawi ei dan hriat loh em em te chu a mak awm ngei mai kan ti mai thei, mahse Doctor ten damdawi min han chawh a, a ei dan chiang taka an ziah ang thlapa ei anga kan in ngaih pawh hian tam tak chuan an lo la ei dik lo fo mai, ei hunbi hrim hrim hi chu min hrilh anga kan ei mai avangin kan vawng dik chu a ni thei, amaherawhchu a ei dan tur dik takin kan ei lo fo a ni.

A bikin hmeichhe ho hi buaithlak tak an ni fo, damdawi ka lem thei lo a tui ka duh tih ang te hi hmeichhe ho tam zawk tih dan tlangpui a ni. 
Damdawi ei dan
Hmanni a ka damlo pakhat ang deuh hi an tam mai, chu nu chuan a damdawi ei tur a thialsawm vek phawt loh chuan a lem theih loh avangin eng damdawi pawh a sehsawm vek zel thin tih min hrilh a, kan han in hau nual bawk reng a.

Damdawi an siam reng reng hian damdawi siamtu company te hian research nasa tak neiin a thawk muang deuh tur te, a thawk nghal tur te, thawk nghal muangchanga thawk zawm tur te leh pumpui a damdawi chu chhe mai lova rila thawk tur chauh ten a tuamna kawr hi eng tin tin emaw an lo siam nasa khawp mai hi a lo ni a.

I damdawi ei kha bun/phel tet phal miah loh tur chi te sehsawm phal miah loh tur chi te, chaw ei hnua ei miah loh tur chi te an ni nawk hlawm mai.

Doctor te mawhphurhna hi a lo sang hle mai hetiang zawng zawng hi inhrilh fiah vek sen a lo ni thin lova, chuvang chuan damdawi dawrah thil kan lei hian Pharmacist ngei hian damdawi chu pein lo hrilhfiah vek thei se duhthusam a van ni tak em tih hi ka ngaihtuah fo mai. Tuna kan kal dan ang hi chuan damdawi dawr nghak tam tak hi chuan damdawi hming an hre ve awrh a, a ei dan Doctor ziak an hrethiam ve nial nual ani chauh hlawm mai si a, eng damdawi dawr pawh hi Pharmacist lo chuan nghak lo sela a him ber mai.

Damdawi ei nan a tui aia thei tui lo hmang fo thin lah bo lo, a tira entirna kan sawi ang khi mi tam tak tih dan a ni fo mai, damdawi ei nan chuan tuisik pangngai hi hman a him ber a ni tih hriat a tha, theitui emaw thil dang damdawi ei nan i hman chuan i damdawi kha a thawh dan turin a thawk lo ve thei a ni tih hria ang che.

A bik in heng Serthlum, Apple leh Grape tui hi dawmdawi ei nan i hmang lo a nih pawhin damdawi nen inhnaih lutuk a ei/in loh a him ber.

Hman deuhva kan buaipui nasat tak Zawlaidi leh Khuh damdawi ei pawlh vanga mu hlum ho pawh kha grape tui vang khan taksaah damdawi kha hlauhawm khawp a concentration sangin a awm thei ta thin a an thih phah ta thin a ni. Grape tuiah hian naringin an tih awm tel vang ani ber a, serthlumah chuan he speridin a awm ve a, a pahnih hian thil inang deuh thuak a ni, heng hian taksa a damdawi lut leh inpaihchhuak tur a tibuai vek thei a lo ni awm e.

Awle, tuna i damdawi ei mek kha han en chhin teh, a bikin Zunthlum emaw BP damdawi ang chi bikah hian damdawi hming tawp a SR, XR, XL, IPR ,CR, TR, CD etc. tih ang hi a tam bik a, khatiang ang damdawi bik phei kha chu i sehsawm emaw i phel te a nih vaih chuan a hnathawh dan tura Company lamin an rawn duan ang kha i tichhe vek tih hria ang che.

Entirna pakhat damdawi common tak hmang hian han sawi mai ila. Pantop 40, Pantop D leh Pantop DSR (heng damdawi ka rawn sawi lan avang hian he damdawi siamtu company hi ka rawn fak tihna a ni lo). Pantop 40 chu Pantoprazole 40 mg chauh a ni a, damdawi dang nena inpawlh lo, mahse a damdawi hi pumpui thurin a tihchhiat theih avang leh rilfang vela keh tura duan a nih avangin Capsule in emaw Tablet a nih pawhin Enteric Coated tih a ni thin.

Chumi awmzia chu Pumpuiah damdawi hi a thawk dawn lo a ni,  chutiang tithei tur chuan damdawi kha thil eng emaw a tuam tlat a ni a, thenkhat te phei chu thuah thum emaw thuah li vel dawna tuam a ni thin, i sehsawm emaw i bung a nih chuan a thawh dan turin a thawk dawn lo tihna a ni phawt mai, mahse capsule chhung antam mu ang deuha an siam ang chi hi erawh chu a capsule pum dawlh theilo tan chuan hawn a, a mu te reuh te te kha sehkeh tawh lova lem mai chuan a pawi chuang lo.

Pantop D a nih hian Pantoprazole 40mg leh Domperidone 10 mg inpawlh a lo ni veleh a, kan sawi hmasak ang deuh tho kha a nih dan chu a ni mai a, mahse Domperidone hi thawk nghal vat tura duan a ni. 

Pantop DSR ve leh thung hi chu Pantoprazole 40 mg leh Domperidone 10mg immediate release leh 30mg Sustained release a lo ni leh thung a, Pantoprazole thawh dan hi chu kan sawi ang hmasa kha a ni mai a, Domperidone hi hna thawk nghal mai tur 10 mg an dah a, 30mg dang hi erawh chuan muangchangin hna a thawk ve leh dawn tihna a nih chu. He 10 mg leh 30 mg hi damdawi chi khat ni mahse a tuam dan a inang ta lo a nih chu. 

Heti hi a nih takah chuan i phel a, i thial sawm a nih chuan a tuamna chu i tichhe vek dawn a ni tih hria ang che.

Hetiang damdawi Enteric Coated tih leh CR, SR XL tih ang inziak ang reng reng hi tihkeh emaw rawt dip reng reng loh tur a ni tih hria ang che.

Damdawi dang pangngai entirnan Stamlo ang te hi erawh chu duh tawkin thial sawm mah la a pawi em em lo tura ngaih a ni.

Damdawi thenkhat chu pum ruakah ei tur a ni a, entir nan Zunthlum damdawi ang te hi chaw ei hma darkar chanve vela ei a ni deuh ber a. Ṭhenkhat chu chaw ei khama ei loh chuan Pum tan a hlauhawm ve thei te a awm ve leh a, entir nan Nachhawkna tam zawk hi Pum puar lai ngeia ei a him ber bawk.

Antacids heng Mucaine, Ulgel kan tih ang te hi chaw ei khamah an lo ei leh mai thin a, a thawh dan turin a thawk dawn lo bawk, pum ruah laia ei chi a ni ngai e.

Kan sawi vek seng lova, Doctor leh Pharmacist te pawhin kan hre vek seng lo hial ang, chuvangin i damdawi ei kha fimkhur thin la, a ei dan tur dik takin ei i tum hram dawn nia.

A zir ve lo leh tualchher daktor emaw thenawmnu damdawi chawh nazawng ei lo hram bawk la, i tan a him ber tih hria la, i damna ni thei kha i tan thihna a ni thei tih hria la, damdawi hi i zuamin i ei mai mai lovang u.

~ Dr PC Lalthlamuana

Post a comment

Powered by Blogger.