Indian Air Force Air Chief Marshal RKS Bhadauria chuan September ni 29 khan ramri chungchanga an dinhmun a sawichhuak a. Ladakh hmar lam ramri ah indona leh muanna a awm lo ve ve, a ti.
Indian Air Force hotu ber chuan press conference neiin, tunlaia a hote inbuatsaihna chu puangchhuak in, tun dinhmunah ral rél chu hna hautak ber a ni. Thil awlai chu a ni lo, nimahsela, theihtawp kan chhuah a, eng anga hmelma lian pawh do turin kan sipaite an inpuahchah a, an tha tawk a ni, a ti.
Air Chief Marshal Bhadauri chuan, tunhnaia Rafale, C-17 Globemaster aircraft, Chinook leh Apache Helicopter lakluh a nih tak avangin, IAF dinhmun nasa takin a sawh ngheh phah a. A pumpuia India sipaite tan chakna hnár tur a ni. Chuvangin IAF hian dinhmun pawimawh tak a luah a, tunlai thiamna tha tha hman zel kan tum a ni, a ti.
French company Dassault Aviation siam Rafale Jet Fighter 5 chu IAF chuan September ni 10 khan a lalut tawh a. Ladakh ramri hrûlah an thlawk perh zak zak tawh nghe nghe. IAF hotupa chuan squadron light combat aircraft Tejas leh Su-30 MKI thawm that mek te pawh sawi langin, IAF tan chuan nghakhlel awm tak a ni, a ti bawk.
India chuan China in Line of Actual Control (LAC) a siam chu a pawm duh loh bur a. China in LAC 1959 hman a duh chu India chuan a hnawl sak thu September ni 30 khan a chhuah a ni.
India chuan LAC chungchanga a duh dan chu China hi a lo hriattir fo tawh a. Kum 2003 thleng khan inbiakna pawh pangngai taka neih a ni. Mahse China hian India duh dan anga inbiakna neih zel chu an duh bîk ta lova, ramri chin fel tuma ram pahnih hmalakna chu a thuanawp zui ta nghe nghe.
Kan post hmasa lamah khan India sipai te silai indaih loh thu leh, mamawh zualpui phuhhruk nan silai lei an tum thu te kan tarlang tawh a. Thenkhat chuan kan awih tha duh lem lova. Zeldin thu mai mai kan tarlang lova, News rintlak tak tak atanga kan hmuh kan tarlang ve mai a nia. A dik zia chu tunah kan hmu leh ta.
India sipaite hian silai hûm tur chu an tlachham miah lovang. Mahse, silai tha an mamawh. Tuna a tam zawkin an ak hi chu Insas rifle defect ngah zet leh silai hmanlai tak tak te a ni hlawm a. A dang a awm si lova, lungawi takin an chelek ve mai a ni, tih kan hriat a tha awm e.
September ni 29 a Indian Defence Minister Rajnath Singh hova Defence Acquisition Council (DAC) meeting chuan SIG716 G2 Assault Rifles tam tham tak rál hmatawnga awm te tana leina tura thil tul zawng zawng tih fel a nih tawh thu an puang. Kum 2019 February thla khan a tum khatna atan hian SIG716 Assault Rifles hi 72,400 zet order niin, December 2019 khan Indian Army ten silai 10000 an dawng tawh a. Hemi atana sum senso tur chu India pawisa in crore 780 vel a ni
SIG716 Assault Rifles siamtu Sig Sauer Inc. chuan tun kum tawp hian Indian Army te order zawng zawng pek kim vek an tum a ni. SIG Assault Rifle hi US leh Germany ten an siam a. India in a lei te hi US Company Sig Sauer Inc. siam a ni. Kum 2010 khan hman tan niin, NATO ram ten an hmang nasa hle.
SIG716 Assault Rifles Generation 2 hmangtu ram langsar te chu, Hong Kong, Mexico, Turkey, UK, USA, Taiwan, Thailand, India leh ram dang tam takin an hmang mek a ni. India sipai zinga he rifles hmangtute chu Counter-Insurgency lama awm te an ni a. Tunhnaia ramri buiana kal mekah, Indian Army te chuan silai tha zawk an duh a. Kan sipaite mamawh chhán nan SIG716 G2 Assault Rifles hi a rang thei ang berah chah thlen an tum ta a ni.
Sig716 rifle hi Indian Army zawng zawng hman tur India sawrkhar in a pe thei dawn lova, a leina tur sum chu lo awm ta réng pawh nih se, a siamtu lam hian an supply hneh dawn chuang lova. Hei vang hian Defence Acquisition Council chuan AK-103 a ruahman bawk.
AK-103 hi Russian company Kalashnikov leh India Ordinance Factory Board, Amethi te tangkawpa an siam a ni. Indian Army chuan Insas Rifles chu thlák vek an duh tawh a, mahse vawi leh khatah han thlak sen vek chi a ni dawn lova, a tahtawla kalpui zel an tum a ni.
India leh Russia inremna ang chuan AK-103 rifles hi nuai 7 zet Amethi hmuna siam tura tih a ni a. Mahse covid19 protocol vangin tum angin an kalpui hleihthei ta bik lova, tun kum chhung hian a then a zar chu an pe chhuak hman tura ngaih a ni.
Defence Acquisition Council chuan ralthuam nepnawi hmanraw leina tur crore 2,290 chu a pawm bawk a. Tin, Army leh Air Force te indona muala an inbiakpawhna tur High Frequency Radio Sets leina tur crore 540 zet a pawm bawk a ni. India hian ralthuam a lei char char mai a. Indo hi a tum rûk deuh ni te pawhin a lang. The Global Times in a tarlan ang khan, RSS ho hian Modi sawrkhar hi China laka indona bei turin an nawrh a ang ta riau mai.
Kan thu khar nan: Amethi kan sawi kai ta sa sa, han GK tel zuai ila. Amethi hi Uttar Pradesh, Noida hmuna Lok Sabha bial niin, tun hma chuan Congress lal ram a lo ni thin. Gandhi chhungkua nen inzawmna tha tak an nei a. Rahul Gandhi pawh a lo tling tawh bawk. Mahse, Lok Sabha inthlanpui hnuhnung berah khan BJP candidate Smriti Irani chuan Rahul Gandhi chu a hneh bán ta a ni. Mahse Rahul Gandhi hi Wayanad bialah a tling ta tho a ni.
Tunlai Zoram politics boruaka sawi hlawh Pu Lalduhoma disqualify tur chungchang chuan titi a siam reng a. Pu Duha hi a ruala MLA bial hnih a tling thei ngat a ni a, pa ropui tak chu a ni ve hrim hrim, ti te kha kan zeh telh hram a ni.~TimesofMizoram
Post a Comment