Tunlai chu Indian Defence thuthar hriat tur a awm reng a. Ralthuam lei chungchang hmuh tur a tam khawp mai. Hmelma 2 nei ram India tan chuan hetianga inbuatsaih mai loh chu, tih tur dang a awm lova, ralthuam hi a lutuk awm lovin han ngah em em phawt mai ila, tun ang boruakah chuan a tha ber ang.
October ni 1 khan Defence Ministry leh Nagpur company chuan hand grenade chungchangah inremna an ziak fel leh ta.
Indian Army te hian World War 2 laia hand grenade ang kha an la hmang reng a. A tunlai tawh lovin thlák ngai tak a ni tawh hrim hrim.
Tuna Hand Grenade India in lei a tum mék hi multi mode an ti kher a, ral bei nan leh mahni inven nan, offensive leh defensive ah a hman thei dawn a ni.
Defence Research and Development Organization (DRDO) hnuaia péng pakhat Terminal Ballistic Research Laboratories (TBRL) in an design ngat, he hand grenade hi a tunlaiin, a tha hle turah ngaih a ni. A siamchhuah hna, production hi Economic Explosive Limited (EEL) Nagpur chuan a thawk ang a. Hand Grenade nuai 10 zet, Crore 409 chu an siam chur chur dawn ta a ni.
Ministry of Defence hnuaia Defence Acquisition Council leh EEL inremna hi, Modi sawrkhar hmalakna Make in India tihhlawhtlinna pakhat a ni bawk a. Hand Grenade hi DRDO siam a nih angin tha tawk tura ngaih a ni. Indian Company hian a production hi tha taka an kalpui thei a rinawm. ~TimesofMizoram
Post a Comment