Khawvel Indo lawng zinga dam rei ber  INS Viraat chu tunah hian Gujarat vaukamah a ding rûn mai a. A khmakhua tur a la chiang thei hrih lo. 

INS Viraat hi kum 70 zeta upa ni tawhin, mihring kum anga chhiar pawhin tar chaklo zinga chhiar tel a ni ve tawh hrim hrim. British Navy ah kum 1959 atanga April 1984 thleng a awm a, HMS Hermes tiin an koh. Argentina laka Falklands War an bei tum kum 1982 khan INS Viraat hi rinrawl berah a tang a. A che tha hle nia sawi a ni. 

Tichuan kum 1987 khan Indian Navy hman tura lakluh ni leh in, a hming atan INS Viraat an vuah ve thung a. Kum 2017 thleng kha tha takin a service. 

Aircraft phurtu lawng lian India in a hluihlawn hmasak ber chu INS Vikrant niin, kum 2014 khan a lo chawl tawh a. Mumbai hmunah thiah darh a ni. 
INS Viraat
Tichuan Kum 2017 khan INS Viraat hi chawl ve leh in, Service turin duhthusam ni tawh lo mahse, hmanna dang tam tak la awm turah ngaih a nih avangin Ministry of Defence, Government of India chuan a lilám ta a. Sumdawng pawl Shree Ram Group chuan ram hmangaihna vang liau liauin a chhang huai berah an tang a. Kumin July thla khan Crore 38.54 in INS Viraat chu an hum thei ta a ni. INS Viraat hi tonnes 27800 a rit a ni a,  Kg 1000 hi tawn khat a ni. A KG anga chhut chuan INS Viraat hi KG nuai 278 vel a ni, thir chhia anga hral pawhin KG tam tak chu a ni hrim hrim turah ngai ang. 

He indo lawng lian, Aircraft Carrier hi hun rei tak chhung India venghimtu a nih angin ngainatu pawh an tam mai. Company tam tamin chang tumin an chhang a ni. Mahse, hlawk zawka hmanna tur erawh a tam hran lova, India ram hmangaihna vang liau liaua lei tum an ni hlawm. 

INS Viraat leitu company Shree Ram Group pawh hian a hmanna tur an hre ém ém bik lo a ni ang, India rama lawng lian thiah na hmunpui Alang, Gujarat chu kar liam ta khan an rawn thlenpui tawh a. Thiah darh hmabak mai a ni ta. 

Hetih lai hian Mumbai company pakhat chuan INS Viraat chhan ngei tumin hma an la ve char char a. Anni hian Museum a chan tir an tum a ni. 

Envitech Marine Consultant Private Limited managing director VK Sharma chuan lei a duh thu hi Shree Ram Group Chairman Mukesh Patel chu hriattir nghalin, Mukesh Patel chuan Ministry of Defence atangin No Objection Certificate (NOC) an lak a ngaih thu hrilh in, a man tur pawh an inbe rem tawh. 

A tirah Mukesh Patel hian INS Viraat man atan hian crore 125 a phût a. Sawrkhar  lilam a leina crore 38 atanga chhut chuan a hlawk hle dawn niin a lang. Mahse anni hian risk la in, an lei ve tawp kha a nia, a hmanna tur a awm lo pawhin thiah darh mai an tum kha a nia. 

Tuna lei tumtu Company pawh hian India ram hmangaihna vang chaua lei an tum thu leh, Museum anga cheibawl an tum phawt anga, a hlawhtlin lo chuan thiahsawm mai lo chu tih tur an nei bik dawn lo a ni. 

Tichuan ram hmangaina thinlung pu ve ve ta chu, Rupees crore 100 in an inrem thei ta. Mumbai company hian Ministry of Defence atangin NOC an lak fel huanah INS Viraat hi an lei thei dawn ta a ni. 

"India ram ka hmangaina tihlan ka duh vangin INS Viraat hi ka lei kha a nia. Tunah Mumbai company pakhat chuan Museum a siam an duh a. Anni pawh hian ram hmangaihna vang thoa INS Viraat hi chhan tum an ni ve a. An hnena hralh hi ka phal ta a ni. Mahse, Minisi of Defence phalna a awm loh chuan ka hral chhawng thei lova. Phalna an lak a ngai. Kar hnih khat vel chu ka la ngaicháng ang a. An ti fel thei loh chuan INS Viraat chu hmuh tur a awm tawh dawn lo a ni," tiin Mukesh Patel chuan Press Trust of Iindia (PTI) a hrilh. ~TimesofMizoram

Post a Comment

Powered by Blogger.