China laka kan Indian sipaite chét dan kan duh khawp lo ang bawkin, China mipui tam takin PLA te hi India laka hma la tawk loah an ngai ve tho mai a. China sawrkhar chanchinbu The Global Times ah thuziak thenkhat phei hi chuan, Communist Party hi ramri venhimna kawnga che tawk lovin an sawi ve zauh thin a. Khawvel mit hmua mawi an tum vanga China sawrkhar chu zaidawh theih tak anga lan tir an tumna pawh a ni ve thei tho bawk. 

Tun tuma chuan China mipui thlirna atangin Ramri boruak kan thlithlai dawn a ni. 

China-India military commander-level inbiakna chu tum 6 zet nei a ni tawh a. Meeting hnuhnung ber chu September ni 21 khan nei niin, ram pahnih sipaite chuan boruak ti dai tura hma lak an remti ve ve a ni. Indian Army te chuan China PLA te chu India ram an rawn nék leh vaih chuan kah nghal an tum thu an sawi niin China Global Times chuan a tarlang a. Hei hi, Global Times chuan Dawizep thiltih an ti hmiah mai. India hi a inhrosa mai mai niin China hian a ngai a ni mahna. 

India China Border

The Global Times chuan, inbiaknaa ram pahnih ten sipai dah belh tawh loh tur ti thutlukna an siam chu, India tana thu lawmawm a ni, tiin a ziak. A chhanchu, tun dinhmunah India chu ramria sipai dah hnem zawk angin China chanchinbu chuan a tarlang. Global Times chuan, India hian tun dinhmunah Pangong Tso Lake leh hmun sang lai thenkhat a luah mek a. Beijing aiin sipai a dah tam zawk bawk avangin, buaina siam belh lo chu a pawm thei a. Tin, PLA ten ram an zauh leh a nih chuan an kah nghal tur thu an an sawi bawk a ni, the Global Times chuan a ti. 

China hian Indian Army ten silai an chelek ngam tak tak dawn em? Tih chu zawhna siamin, ti hian a chhang a. India sipai tam tak hi Hindu Nationalist pawl pakhat Rashtriya Swayamsevak Sangh (RSS) fuihpawr an ni a. Indian society hi thunun an tum a ni. A nihna taka chuan China nena indo hi an duh niin a lang, tiin an ngaihdan an sawi.

India hian thil awm dan chîk takin a thlir reng a. A dinhmun a that hunah chauh inbiakna hmanga buaina chinfel a duh a. Tlema chan chhe zawka a awm apiangin indo mai a duh thin a, sipai chakna a hmang nghal fo thin. Tun kum May thla thil thlengah khan India mize dik tak chu a chiang mai, May thla chhung kha chu India dinhmun a tha zawk a, Inbiakna nei pawh a duh. Mahse, June ni 15 a lo thleng  a, India chuan thil tam tak a chán ta. Kha ta tang khan indo turin a inpuahchah ta nghal chuk chuk a. Inbiakna nei pawh tul an ti lem lo. Mahse, August thla a lo thleng a, Ladakh a hmun thenkhat Indian Army ten an han la chiah chu, inbiakna hmanga ramri buaina chinfel a duh leh ta a ni, tiin The Global Times chuan India ram mizia an hmuh dan a tarlang. 

India hian dinhmun tha zawk an chan chauhin China chu inbiakna neipuiah a sawm a. Tactic a play kual vel mai mai a ni. A dinhmun tha chu hman tangkai dan a ngaihtuah a, Chu thangah chuan China awh a tum a ni, a ti bawk. India chuan ramri buaina hrûla hmun sang lai zawng zawng chu luah tumin a sipai te chét a lak tir mek a. A tam thei ang ber LOC thunun chu India thiltum lian tak, kan hmuh hmaih miah loh chu a ni. 

Mahse, India hian harsatna lian tak a hmachhawn mek a. A duh angin Ramri lamah tan a la thei meuh lo. india ramchhungah hrileng nasa tak a awm mek a, Ladakh ah sipai tam tak dah mahse, an mamawh thil a pe hneh dawn lo. India ram chuan economy lamah harsatna a nei bawk a, inkalpawhna chhiat vang pawhin  Sipaite a chawm hneh a rin awm lo. Abik takin thlasik hunah phei chuan, ramri lamah India hi a che thei tak tak lovang. 

Tunlai khawvel indo chu inkalpawhna that vanga chak thei leh chak lo theih kan ni. China chuan a duh zat zat sipai leh ralthuam ramri hrûlah a dah thei a. Kawngpui tha tak a awm vek. Hetah hian India leh China kar a dang zaih tawh ang. India hian vawk khat silai a kah a nih chuan, vawi 2 kahna hun tha a hmu dawn lo. 

China hian indo a duh ngai lova, India chu a thian tha tak angin a dawr thin zawk a ni. China chuan India hi ram pahnih kar mai bakah, ram dangte nena thaw hona thuah pawh theihtawpa hma lakpuiah a sawm thin a. China chuan engtik huna emawh chuan India nen ram thangduang tak an la ni ngei a beisei tlat a ni. Chutah tang chuan Asia khawmualpui pawhin hma nasa takin a sawn phah bawk ang.

Vanduaithlak takin, India chuan China thlir danin thil a thlir ve lova. China tel lova khawvel hmasawnna thlen tir a tum thung. China do turin United States nena thawh ho a duh a. Chian thanglian zel hi a hlau a, Nakinah Asia a la thunun mai a hlauh vangin ramdang ho chu China ep zawnga che turin a inmawngzawmpui ta a ni. 

Hengte avang hian India chuan ramri lamah harsatna siam a duh reng a. India China ramri hi India chuan China hmakhaw thlir nan a hmang a. Ramri thuah China a chak chuan China hian Asia a la awp thei dawn a ni. India a chak erawh chuan China len zel tur chu dan chah thei a ni ang. India chuan China PLA te an hnungtawlh  a, India duh anga Line of Actual Control China in a pawm chuan, chakah a in ngai ang. Mahse, chu tiang chu China thlir dan a ni ve hauh lo mai.

Ramri buaina hi India hian chinfel a duh tak tak lova, a duh hun huna buaina siamna atana hman hi a duh dan ber a ni. Kum 2017 a Doklam buaina kha kan la hre vek ang. BRICS summit  leh Chinese Communist Party 19th National Congress a awm hma chiah a thleng a ni. Kha tih lai khan, US nawrhna vangin China chuan harsatna a tawh mek lai a ni bawk. 

Tun kumah pawh, chutiang boruak a awm lai takin India hian ramri ah buaina a siam leh ta a ni. Covid19 vangin US chuan China chu nasa takin a bei mek a. He hun hi remchangah lain India chuan ramri lamah buaina a siam leh ta a ni ber. 

Hetianga India a awm fo chuan, Chian hian a kalphung a enfiah a ngai ang a, India a en dan a thlák a ngai tawh ang. India lakah khauh zawka chet a ngai ta a ni, tiin the Global Times chuan September ni 27 tuk khan thu a chhuah a ni. ~TimesofMizoram

Post a comment

Powered by Blogger.