United Nations Security Council (UNSC) permanent member nih tuma hma la mek India chuan theihtawp chhuah mahse, a beisei angin thil a kaltluang hleih theih lova. Permanent Member 5 zingah China chuan India than len tur chu a duh loh bur mai a. China in a veto power hmanga India lut tur a dan tak si ah chuan, India chu UNSC chungah a lawm lo hle a ni. 

September ni 26 khan India Prime Minister Narendra Modi chuan United Nations chu na taka nawrh lehin, tunlai khawvel ram ropui leh khawvel democracy ram lian ber India chu UN Security Council ah Permanent Member pe ve turin a ngiat leh ta. Modi chuan UN chu zawhna zawtin, eng chen nge India hian a nghak dawn? UN rorelna sangah hian eng chen nge India in dahbo dawn? tiin a zawt a ni. 
Mizo Chanchinthar
Modi chuan India dinhmun chu United Nations hriatah sawi langin, kan dinhmun chhiat laiin khawvel kan tibuai ngai lova, kan len hnu pawh hian khawvel tan ram hnawksak kan ni hek lo. United Nations tana remna siamtu UN peace-Keeping mission ah pawh sipai tam tak India hian a tir thin a. UN tana sipai nunna chan hnem ber ram kan ni. UN Security Council permanent member ni turin eng chen nge kan la nghak dawn? Tiin United Nations General Assembly hmaah a sawi. Modi thusawi hi record sa niin, UNGA ah hian an play a, khawvel ram hruaituten an ngaihthla a ni. Modi hma hian US President Donald Trump pawhin thu a lo sawi tawh a. Covid19 thuah Jinping sawrkhar chu na takin a bei tawh nghe nghe. 

India chuan UNSC hi siamthat a duh a. Permanent Member United States, UK, China, Russia leh France te angin permanent member nih a tum a ni. Tuna UN security council a permanent member te hian veto power an nei bawk a. UNSC member 5 zingah hian India tel ve duh lotu chu China chauh niin, China hian a veto hmangin ram 4 te duhdan hi a hnáwl sak thin. India chu China chungah a lawm lo hle a ni. 

United Nations Security Council, khawvel rorelna sang ber hian member 15 a nei a, member 5 chu permanent member te kha niin, a dang 10 chu kum 2 atan ruat an ni thin. India pawh non-permanent member atan term 7 lai ruat a lo ni tawh. January ni 1, 2021 khian a term thar a hmang tan leh dawn a ni. India rual hian Ireland, Maxico leh Norway te pawh ruat an ni ve bawk. 

Modi chuan UNSC non-permanent member atana India thlan a ni leh ta chu lawmawm a tih rualin, a tum ber UNSC kalphung thlak leh, tuna ram 5 te anga India dinhmun siamrem a tumna chu a la puitlin theih si lova, India lawm a la kim lo a ni. 

India hian ram tam tak support a hmu a. UNSC kalphung thlak duh ram, India rual hian tam tak an awm a ni. Chung zingah chuan Brazil leh South Africa te pawhin aw an chhuah fo a, tunhnai pawh khan UNSC chét muang lutuk chu an lo sawichhuak tawh bawk a ni. 

Modi chuan, khawvel in Covid19 a tawrh mek hi, India ram puihna a mamawh a. India chuan theitawp a chhuah dawn a ni, a ti. India hi damdawi siamchhuahna hmunpui a ni a, Covid19 damdawi hi lo awm ta réng pawh nih se, khawvel mamawh ang supply theih tur chuan India hi a pawimawh hle a, India tel lo chuan, mitin mamawh vaccine hi tu ram mahin an supply hneh dawn lo a ni.

Hetih lai hian, India chuan ralthuam a chher tlut tlut reng a, UNSC permanent member a ni theihna tura pawimawh chu sipai ropui tak nei hi a ni ve pakhat bawk a. Tuna UNSC permanent member te hi sipai chak tak nei vek an ni. India hian US, Russia leh China tih loh chu  a lehpel vek tawh a. France leh UK ten veto power an nei theih chuan, engah nge khawvela ralthuam leh sipai nei tha top 4 hian veto power a neih loh bik ang ni? 

Thuthar lawmawm deuh chu Defence Research And Development Organization (DRDO) chuan Pinaka Rocket siam hna kalpui turin engkim an peihfel vek ta. DRDO hian Pinaka Rocket chungchanga thil pawimawh zawng zawng chu chipchiar takin Directorate General of Quality Assurance (DGQA) kutah a pelut tawh a. Pinaka Rocket tam tham tak an siamchhuah thei tawh thu DRDO hian DGQA a hriattir a ni. DGQA hian DRDO siam Pinaka Rocket chu an belhchiang ang a, tha tawka an ngaih chuan a siam hna tan thuai a  ni ang. 
Mizo Chanchinthar
Indian Defence Ministry chuan DRDO hmalakna chu thuchhuah siamin  lawmthu an sawi a. India ram tana thil chhinchhiah tlak tak tur, Pinaka Rocket chungchang Authority Holding Sealed Particulars (AHSP) chu DRDO chuan DGQA kutah a hlan fel ta, tiin an thuchhuah ah an tarlang a ni. 

Pinaka Rocket hi indona muala hman chi, kilometre 37.5 zeta thui kap thei a ni. Pinaka Rocket te hi a kah chhuahna dawt tam tak awm chi ah hman theih niin, second 44 chhungin rocket 12 zet a kapchhuak hman a ni. India sipaite tan thil tangkai tak tur a ni a, DGQA in a en fiah ang a, a quality a tha tawk chuan DRDO lamin an siam chur chur dawn a ni.

India sawrkhar chuan ralthuam siamna kawngah khawvel hmahruaitu nih a tum rûk hle a. Russia ralthuam siam ring ringawta ral do a tum tawh bik lo a ni. Make in India hnuaiah project tam tak an siam thu kan sawi fo tawh a. DRDO chuan 110 KN Fighter Jet engine siamna tur pawh an peih fel tawh a ni. 

DRDO engine complex thar ah hian 110 kilo Newton power engine siam a ni dawn a. Advanced Medium Combat Aircraft (AMCA) tam tham tak kum 7 hnuah an siamchhuah beisei a ni. Tunah DRDO in Jet engine siam an tum te hi 5th Generation vek a ni dawn a. Future Class AMCA an ti hial a ni. 

Tun dinhmunah India hian 5th Generation aircraft a la chelek pha lova, DRDO project hi India hmel thlak danglam theih tur khawpa pawimawh a ni. Ambala Airbase a Rafale Jet lakluh inkhawm hmanaah khan Rafale siamtu Company hotupa a rawn tel ve a. Kha mi ni khan Defence Ministry chuan meeting neipui nghalin rah tha tak a chhuah dawn niin a lang ta. 

France company Dassault Aviation leh Hindustan Aeronautics Limited (HAL) chuan inremna an siam tawh a. Jet engine changkang tak tak siamna kawngah an thawkdun dawn a ni. Dassault hian HAL chu an thiamna an hmantir dawn a. India ramah 5th Generation Jet Fighter an siamchhuak ve thuai tura beisei a ni. 

Hindustan Aeronautics Limited Chairman R Madhavan chuan Rafale Jet engine nena inang siam kan tum a. 110 KN Engine project atan pawh a tangkai dawn hle a ni, a ti. 

Tun tuma France Company leh Indian Company hmalakna hian, India in Russia fighter a lei fo thin chu a titawp thei thuai rin a ni bawk a. A phûr awm ve hrim hrim. ~TimesofMizoram

Post a comment

Powered by Blogger.