Tun tum kan thuthar hriat zet hi chu, China hmelma tu India ram tan chuan thil zahthlak tak a ni ta ve ang. Keini India mipui 1.3 billion zinga khua leh tui satlia ve mai pawh hian kan ram India hi kan tan bur mai a. Mahse, vaiho rál rél hi a fuh hleihthei tak tak lo niin a lang. 

Indona mualah chuan eng ralthuam pawh a tangkai vek dawn a. Jet Fighter atanga chemte thlengin hmanna a awm ang. Kan Indian Army ten tunah hian hmun leh hmuna inkahna tur silai an mamawh ang an nei lo niin Economic Times chuan a rawn tarlang tlat mai a. Vansang boruaka China khing hneh tura kan inngaih laia, rifle leh carbine mai mai pawh kan la indaih loh chu a nih hih! Engtin nge khawchhak lalpa China hi kan do hneh dawn ni? Ngaihtuah a tithui ta hle mai. 

Ramri lama India sipaite hian hun rei tak chhung kha silai indaihlohna an lo tuar tawh a. Tuna an hman a tam zawk phei hi chu Insas Rifle te niin, close range battle ah India sipai te dinhmun a cháu hle niin thulakna chuan a sawi. Tun kum May thla atang khan kut lawnga insualna tam tak Line of Actual Control (LAC) ah a thleng tawh a. Hmun leh hmuna inkahna awm tak tak ta se, India lam hian silai an tlachham chiang hle dawn a ni. 

Defence thuchhuakin a tarlan danin tunah hian Indian company te atangin silai 350,000 zet, close battle a hman tur an order mek a. Kum 2018 khan hmalak tan niin, vawiin thleng hian a la hlawhtling thei lova, Tunah hian mamawhna a sang ta si a, Indian Army hi kan lo beisei angin indo turin an lo la inpeih loh hle tih a hriat. 

Indian Army hian mamawh zual phuhruk nan silai, rifle emawh carbine kan tih ang chi hi, 93,895 zet an mamawh a. Indian company ten an pek thei si lovah chuan, ram dang atanga lei a tum leh dawn nge, russia silai hlui kan India hian a lakhawm leh dawn? Hriat a ni lo. 
Indian Army
Hun rei tak chhung kha tuna hman pangngai assault rifle chu Indian Army te rinrawl ber niin, kum 2020 ah pawh a thlakna tur a la awm chuang hrih lova, a ngai te bawkin rál an hmachhawn a ngai dawn a ni. India sipai tam zawkin insas rifle an hûm fur mai a. Technical lamah harsatna awm te leh, a hmangtu sipai te ngei pawhin an duhkhawp loh zia kan hre tawh a. Chutih chung chuan hmalakna hi a chak lo em em a, indo thei turin kan la inpeih loh hle a ni. 

Make in India hnuaiah Indian Company te chuan kan sipai te mamawh silai 350,000 zet chu supply tumin an buaipui ve nak nak a. Mahse silai siam lamah hian India kutchhuak aiin ram dang kutchhuak hi kan sipai ten an duh zawk fo mai a. Make in India project hi hlawhtling tak tak si lovin, sum khawhralhna mai mai a ni mai ang em, tih chu zawhna lian tak a ni. Indian company te hian rilfe tha tak ennchhin tur hi han chhawpchhuak se, kan sipai ten an belhchian hnuah a hlawma siam turin order chauh se. Pakhat pawh an puitlin hmaa tam tham tak han order hi, insas rifle te anga lian leh hnawksak tak, technical snag awm an siam leh si anga, kan ram hmelma te nen kan kar a hla dawn lutuk. 

Indian Army hotu pakhat chuan, tualto company te hian kum hnih kum thum vel hun an la duh dawn a. Mahse kan ram hian kil tinah beihna a tawk a, silai mamawhna a sang si a, kawng dang zawn a ngai a ni, a ti. Silai hi ramdang siam lei mai an tum niin a lang a, chu pawh chu hmun 5 a thena hmun khat chauh an lei thei dawn a ni. 

Kar hmasa lawka Defence Secretary hova meeting ah khan tuna kan sawi mek thupui hi sawiho niin, kum 2018 a ramdang silai lei an tum kha, Modi sawrkhar chuan Make in India  project a kalpui ta si a. Hei hian ram dang thil lei chungchangah harsatna a siam ta a ni. Defence Acquisition Council, ralthuam lei chungchanga thuneitu sang chuan he thil hi an ngaihtuah mek nia sawi a ni bawk. Ramri lamah silai puak theih dinhmumah kan a mek laia, kan ram venghim tura kan dah ten silai an tlachham mek a, tuna an silai hman a tamzawk hi chu a hmangtute ngei pawhin an insit deuva, mahse, a dang awm hek lo; an pek ang ang an hmang mai a ni.

Tichuan, kan India rama hlemhletna tam zia hi kan hre vek a. Indian Defence Ministry lamah eirukna, tunlaia an hriatchhuah thar, The Hindu in a chhuah hi kan han tarlang leh ang e. 

Comptroller and Auditor General (CAG) chuan kum 2010 a Indian Air Force in Unmanned Aerial Vehicle (UAV) engines 5 an leina chu, dik lo taka tih nia hriat a nih vangin, chhui chiang turin sawrkhar thurawn a pe. Kum 2010 a UAV engine an lei ang chiah hi Defence Research and Development Organization (DRDO) chuan kum 2012 khan  a lei ve a, kum 2010 a IAF in an leina aiin 65% zetin a tlawm zawk a, sum tam tak a luangral a ni. IAF hian uchhuak takin company an duhsak nge, IAF hotu zingah eirukna a inphum ru? tih chhui chian a ngai ta a ni. 

UAV engine siamtu Israel Aircraft Industries (IAI) limited chuan IAF hi supply in, engine pakhat 914UL phei chu company rintlak lo, uncertified company siam a ni. Hemi atana sum senso zawng zawng hi Rupees 9.07 crore a ni a, DRDO leina anga chhut chuan Rupees 3.16 crore zet chu dik lo taka hman ralh a ni. 

Indian Defence Ministry in ralthuam a leina ah hian eirukna a nasa hle thin a. UAV  engine crore 10 man pawh tling lo leinaah ringawt pawh 3 crore lai chhep ral a nih chuan, Rafale Jet 36 leina man crore 58,000 zet ah hian engzat nge diklo a awm ang? Ngaihtuah a ti thui ta hle mai. 

Kan Zoram ngei ah tun kum 2020 chhung hian lekha manto te pawh a awm nia sawi a nih khah! @TimesofMizoram
Indian Border Dispute

Post a comment

Powered by Blogger.