September ni 22 khan ramri buaina thu ah bawk India leh China chuan inbiakna an nei leh ta a. Tun thla bul khan Moscow khawpuiah Tum 2 ngawt Political level ah inbiakna nei tawh mahse ram pahnih in epna chuan ziahawm lam a pan thei lova. Nimin inbiakna pawh hian thil  danglam tak a thlen hmel lem lo a ni. 

Tun tuma military level inbiakna chuan commander levela inbiakna nei leh an remti ve ve a ni. India leh China chuan Ladakh ramri ah Sipai thawnluh belh tawh loh turin thutlukna an siam thei ta. Amaerawhchu sipai awmsa lakchhuah an tum lo ve ve. China lam chuan Pangong Tso leh Line of Actual Control a hmun thenkhat, India sipai ten tun hnaia an luah te chu chhuahsan turin an duh a. India lamin an remti hmel lo niin a lang. 

Military level a inbiakna nei zawh hian Joint Press Release siamin, China leh India chuan inbiakna nei chhunzawm zel an duh thu tarlan a ni. Nimin inbiakna hi darkar 14 chhung zet a awh a, sipai awmsa lakchhuah chungchangah ram Pahnih karah inrin tawkna a awm lo avangin thutlukna an siam thei ta lo. Ladakh ramri ah hian sipai ralthuam famkim nen nuai khat vel zet an awm a. Tun thlasik chhung pawh hian ram pahnih sipai te hi he lai hmunah hian an awm reng dawn niin a lang. 

China chuan Chushul hmuna Indian Army awm chu an duh loh hle a. Inbiakna ah hian sawichhuak in, Indian Army te chu inthiarchhuak turin an duh a ni. India lam pawhin Finger area, Pangong Lake hmar lama PLA ten Status Quo bawhchhiah a India ram an luah te chu kalsan turin an ti ve bawk a. Mahse, a tu zawk zawk pawh hian kalsawn an tum lova, hei vang hian inbiakna chuan awmzia a nei a rinawm lo. 

Tun tuma inbiakna hi India sipai ten Chushul an lak hnu a commander level inbiakna hmasa ber a ni. Commander pahnih inbiakna chuan ram pahnih sawrkar, Moscow hmuna inbiakna tihhlawhtlin dan tur an sawiho bawk a. Inbiakna tha tak awm thin mahse, ramri berah sipai te an in ep reng si a, an thutlukna ang hian thil a kal thei ta thin lova. A awmzia ber chu inrin tawkna awm loh vang a ni ber. 

Hun liam tawh atanga India tawnhriat thil chiang em em mai chu, China rin tawh lo tur, tih hi a ni. Vawi tam China  ringin sipai lachhuak hmasa zawkah a lo tang tawh a. Tun tum zet chu tihsual a tum tawh lo. 
Indian Army chuan, China sipai te chu April 2020 ah an awmna hmunah an let leh hmasa phawt tur a ni, an ti bur tawh sia. China PLA te lah chuan Indian Army te inthiarchhuah phawt an nghak ve bawk a, hei vang hian inbiakna a tlawl hmel.

Khawvel in China a do rawn emawh kan tih laiin, China inthurualpui duh ram an awm ve zel a. Vatican leh China chuan inremna chhinchhiah tlak tak an ziak ve leh ta a, US a lawm loh hle. 

Roman Catholic hotu ber Pope awmna Vatican chuan US duh loh zawng takin China tang belh a tum a. Pope Francis chuan Vatican-China inremna ziah tharna tur phalna a pe fel ta der mai. Kar hmasa mai khan Chinese Foreign Ministry thupuangtu Wang Wenbin chuan Beijing leh Vatican inlaichînna in hma a sawn zel thu a lo puang tawh a. Kar leh khian inremna thuthlung awmsa chu pawhsei a ni dawn. 

US President Donald Trump an China sawrkhar chu sakhaw zalenna palzut leh zakhaw tenau te chunga tihduhdahna thleng thin chungchangah na tak takin a khak fo a. A bik takin Muslim minority Uighur chunga Communist Party chet dan chu a dem hle thin a ni. Heti mek laia Christian puithiam lalin China tha ti chak tura inremna thar ziah pui a lo tum hi, US chuan a duh lo hle a ni. 

US secretary of State Mike Pompeo chuan kar liam ta khan US chanchinbu pakhatah Vatican-China inremna chungchang hi thuziak a lo chhuah tawh a. Pompeo chuan, khawvel ram zawng zawng deuhthawhin sakhaw zalenna chungchangah China an sawisel mek laia Christian sakhaw puithiam in China nena inremna thar ziah a tum hi, ama dinhmun a ti derthawng zawk a ni, a ti. 

September ni 22 2018 khan Vatican leh China hian inremna an lo ziak tawh a. An inremna thuthlung hi tarlan a ni vek lova, mahse thil pakhat erawh a chiang; China ramah hian Catholic sakhaw zuitu mi million 12 an awm a. An puithiam Bishop ruatna thuah Vatican leh China chuan aw an chhuah ve ve thei a, ram pahnih inremna angin Bishop chu ruat a ni tur a ni. 

Pope Francis hian China Communist sawrkhar ruat Chinese Bishop 8 zet chu a pawm tawh a. China sawrkhar hian Bishop ruatna kawngah hian Pope a rawn lo. Mahse, Pope hian a pawm tho a ni. 
Vatican-China Inremna awm hnu hian Pope hriatpuinain Chinese Bishop 2 ruat an ni tawh a. Khawvel puma Catholic 1.3 billion hotu chuan Chinese Communist sawrkhar thurawn angin a pawm ta thin a ni. Kum 2020 kum tir khan kum 70 hnua a vawi khatna atan Chinese leh Vatican foreign minister te chu an lo inkawm tawh nghe nghe. 

Catholic kohhrana Father, China leh Vatican inremna chungchang chîk taka thlir rengtu Father Bernardo Cervellera chuan sakhaw chanchinbu pakhat Cruxnow.Com hnenah, Vatican-China inremna hian ngaihven hlawin, phûr awm viau mahse, rah tha a chhuah lem lo. Tuna inremna tharah hian China sawrkhar lakah khauh zawka a chét a ngai, tiin a sawi. 

Communist Party in China rama sawrkharna an lak kum 2 hnu 1951 atang khan Vatican-China inkar hi a tlu chhia a. Pope hian thar thawh leh a tum a ni. Pope Francis thachhangdawltu Cardinal Pietro Parolin chuan Catholic Church in Chinese Communist Party nena thawhho a duh chhan ber chu, China rama kohhran mite hmakhua siam a duh vang a ni, a ti a. Tun dinhmunah Vatican-China inremna chuan rah duhawm a la chhuah loh thu pawh a pha lo a ni.

Hetih lai hian, Turkey chuan United Nations General Assembly ah Kashmir chungchang a sawichhuak a. India chuan a duh loh hle a, na takin Turkey a chhanglet  nghal. India's Permanent Representative to the United Nations TS Tirumurti chuan, Turkey khawpui Ankara hian ram dang thuneihna zah thiam dan zir se la, a ram dinhmun hrechiang bawk rawh seh, tiin Twitter kaltlangin a chhang let. 

UN General Assembly ah hian Turkish President Erdogan chuan Kashmir buaina chu a ram mite duh dan anga kalpui turin a thlen a ni. Turkey mipui 99.8 percent zet hi Muslim niin, muslim 97 percent awmna Pakistan nen inthurual tak an ni. 

Kashmir chungchanga India hmalakna dodal zawngin International level ah Turkey hian tum tam tak a lo auchhuahpui tawh a. India hian Muslim ram te thusawi hi a bengkhawn lem lo nachungin, chhanlet lo erawh a tum lo. ~TimesofMizoram

Post a comment

Powered by Blogger.