India thin tha kumhlun nia kan ngaih fo leh, harsatna a tawh apianga a belh thin chu Russia hi a ni. Ralthuam a mamawh ang ang Russia siam India hian a lei thin a. Kum tam liam ta atang khan Russian ralthuam siam lei tam ber ram kan ni.

Thenkhat sawi dan chuan Russia hian a ralthuam hluihláwn tur te India a lei tir fo niin an sawi thin a. A dikna chen pawh a awm ang. Kan hriat ve dan chuan India hian Russia kutchhuak tharlam tak  a lei awm kan la hre miah lova, a thlákna tur a neih chauhvin Russia hian India a lei tir thin a ni ber. Entirnan, Russia S-400 air defense system pawh hi a lei hmasa pawl kan ni lova, China chuan a lei fel der tawh a, India hian lei tumin hma a la ve mék chauh a, hetih lai hian Russia chuan S-400 thlakna tur a ruahman fel leh der tawh a ni. 

Kan han sawi duah nachhan chu, India-Russia inlaichinna hi kan rin ang hian a tha lutuk lo niin a ngaih thei. A ralthuam siam lei hnem ber India hi a thar tha tha a lei tir ngai lova. Tin, India hmelma kumhlun Pakistan leh China hi Russian hian a thlauhthla duh bawk si lo, India-Russia inzawmna hi kan Bharat hian a ennawn fo a tha awm e. 

US lam han sawi kai ta zuai ila. Kawmawh bawl reng, India ram chhunga helho hmanga buaina siam thin Pakistan chu Trump Admin chuan petchhuak in, India nen thûk zawka thawk dun turin hma an la a. Kha ta tang khan US leh Pakistan inzawmna thuah hian Pakistan tana thu lawmawm lam hriat tur a awm ta lo hrim hrim a ni. 

Russia hian India a ngaipawimawh tak tak a nih chuan, tunlai boruak anga phei hi chuan China leh Pakistan hi a ngawihsan mai kan beisei a. Mahse Russia hi kan beisei angin a che ta lo. September ni 21 Thawhtanni khan Russia chuan Kavkaz 2020 military exercise a Kick Off ta a, India hmelma ramte an tel a ni. 
Russia Kavkaz 2020
Kavkaz military exercise hian chawlh kar khat chhung zet a awh dawn a. India hmelma original Pakistan leh China an tel a. Tin, tualchhung politics buaina hmachhawn mek Belarus pawh a tel ve bawk. Heng ram kan tarlan te bakah hian ram tenau engemaw zat an tel ang. 

Tun tuma Kavkaz military exercise hian cruise missile leh unmanned Aerial vehicle te indona muala hman dan tur an zirho dawn niin Russian Defense Ministry chuan a puang. Russia chhim lam sipai hmunpuiah Russian Chief of the General Staff, Army General Valery Gerasimov hovin sipai rual an phu mur mur mai a. Black Sea leh Caspian Sea lamah Navy rual an vár suau mai bawk a. An zingah hian US bomb darh vek duhtu Iranian Navy pawh an tel a ni. 

Russian Defense Ministry in a tarlan danin Armenia, Belarus, China, Pakistan, Myanmar, Azerbaijan, Indonesia, Iran, Kazakhstan, Tajikistan leh Sri Lanka atangin sipai 1000 vel an tel a. Russia sipai tel ve zawng zawng te tiamin 80000 lai zet an ni. Russia chuan a missile system leh Navy unite te tam tak a hmang a. Russian Guards leh Emergency unit te pawh a tulnaa hman thei tura koh an ni. 
Tun tuma Kavkaz military exercise hi a rûka indo tura inpuahchahna ang maiin ralthuam an chelek nasa hle. Tank ringawt pawh 250 zet an hmang a. India chuan Kavkaz 2020 a tel turin Russia atangin sawmna a hmu ve nia hriat a ni a. Mahse, ramri lama buaina siam reng China leh Pakistan te zinga tel ve chu a duh ta lo. 

Tunlai boruak South China Sea, Syria leh India ramri lam chu kan hre chiang thawkhat tawh a. Tuna Kavkaz Military Exercise a tel zawng zawng hi United States duh lohtu deuh vek an ni a. Russia, China, Pakistan leh Iran hian US hi bei an tum rûk ta deuh nge ni, tun tuma an che zia hian ngaih a ti tha thei ta tlat lo mai. 

A chhan tam tak a awm. Syria lamah US chuan Sipai leh ralthuam a dah belh tawh a. Middle East bikah hian Russia-US kar thu chhiat lai ber niin, inkahna thleng thei rengin super power ram pahnih te hi Syria ramah an in ep reng tawh a ni. Tunah chuan India pawh a neutral thei ta bi lo, China leh Pakistan chu a hmelma top 5 ah an chuang reng tawh dawn a. Tun dinhmuna Pakistan leh China lakah India tana ding chu Russia ni lovin United States hi a ni. 

Hetianga India ram hmelma lian te Russia in a tlawn reng chuan, India hian a bazaar na a thlak vat a ngai ngei ang. Russian ralthuam aia tha chu US hian a nei vek tho a, engah nge kan hmelma te inkawppui reng Russia hi kan la dawr fo dawn ni?
Russia ah Kavkaz 2020
Russian economy hi tunlai hian a tlahniam ve hle mai a. Defence lama sum hman tur pawh an tihniam tawh a. Hetianga Russia in  Defence Budget a cut hi kum 7 hnunah a vawi khatna a ni. Russian military budget hi a tam thin hle a, a dang zawng zawng belhkhawmin Military bika sum dah hi a pha ngai lo a ni. Mahse, Covid19 an tuar a. Kum 2021 ah hi chuan national economy expense in military expense a khûm dawn a ni. 

Kum 2021 Russian military budget chu US Dollar 41.08 billion vel a ni dawn a. Tun kum kal meka an military budget chu USD 65.1 billion a ni. A tlahniam sawt hle. Hetih lai hian, US military budget 2020 chu $721.5 billion zet niin, China chuan $178.6 billion a dah ve bawk. 

Khawvel ram ropui 3 te military budget atang hian tu ram nge India tan belh tlak, tih a chiang mai a. US nen hian inzawmna tha tak kan nei tho si a, hei aia nasa zawk hian Military lamah inzawmna kan neih theih chuan, India dinhmun tur chu a chiang khawp mai. Kum 10 hnuah chuan Russia leh China hi kan lehpél thei tawh ngeiin a rinawm. ~TimesofMizoram

Post a comment

Powered by Blogger.