Modi leh Xi inhmu dawn/Commander level inbiakna chhunzawm tur, India in jet a lei belh dawn

Ramri Buaina Thuthar: Modi leh Xi inhmu dawn/Commander level inbiakna chhunzawm tur, India in jet a lei belh dawn

Tunlai chu US Politics lam boruak kan ngaithla zawm zut mai a. Ramri buaina lam pawh kan thlir hman mang tawh lo. Khawi lamah pawh hian thuthar a awm reng a. A Chipchiar thei ang bera rawn tarlan kan duh thin si a, ni khatah chanchinthar hi pahnih bák kan chhuah hman thin lova. Theitawp chhuah a, kan buatsaih ang ang lo thlir thin tute zawng zawng chungah kan lawm tak meuh meuh a ni. 

Kan thiam ang tawk leh, phák ang tawkin kan rawn chhuah zel ang a, in lo thlir chhunzawm zel dawn nia. 

Tunlai chu Defence Research and Development Organization (DRDO) hian ralthuam a test ta chur chur mai a. Nimin pawh khan Smart Supersonic Torpedo a enchhin a. Ralthuam chi dang enchhin tur pawh a la awm nual mai. 

India chezia en hian, ralthuam lama burip a tum tih a chiang hle. Hun reilote chhung khawvel hmahruaitu a la ni thuai a rinawm ta hle. Modi sawrkharin Make in India project a kalpui mek hian, ralthuam siamna kawngah Indian Company te a cho phûr viau niin a hriat a. India hian ralthuam a la hralh chhuak chur chur dawn niin a lang. 

India-China ramri buaina chuan reh lam a la pan tak tak thei lova. Inbiakna tum 6 a awm tawh a. Inbiakna in a rah chhuah sawi tur a awm lem lo. Chuti chung chuan a tum 7 na atan October ni 12 khian Military Commander levela inbiakna nei leh turin, ram pahnih sipaite chuan an remti ve ve tawh. 

Indian Army leh People's Liberation Army (PLA) te hi an inpuh tawn ve ve reng a. A tu zawk hi nge inbiakna anga hma la táwk lo chu ni, hriat a har viau mai. An ram delh chin ve ve chu chhuahsan an tum lo bur a. He tiang boruak inepna karah hian remna siamtute chu an eng a thawl e tih kha chu a chi dawn lo. 

Thlasik lo awm tura ramri hrûla Indian Army inbuatsaih na kan sawi fo a. PLA lam pawh an inpuahchah nasa khawp mai. Hospital thar an siam belh tawh a, khaw vawt hnuaia sipai 4 atanga 6 thleng awm theina tur báwm (container) te pawh tam tak an dah tawh a ni. 

PLA lam hian Indian Army te chu Pangong Tso, Rezang La le Rechin La te atanga inthiarchhuak hmasa turin an duh a. Mahse Indian Army hian China PLA te duh dan hi a ngaipawimawh dawn lo. Chuvangin, inbiakna hi vawi tam tak a la awm rin a ni. Kan tarlan fo tawh angin, Indian Army chuan PLA te chu April 2020 a an awmna hmuna kir leh turin an duh. 

Inbiakna hnuhnung ber atang khan PLA Air Force te chu an che chhuak tam tawh lova. Aksai Chin, Lhasa leh Chengdu velah chuan PLA te, ralthuam burip tak nen an la tam hle nia hriat a ni. PLA te awm dan ang zel hian Indian Army leh Indian Air Force te pawh an che ve a. Zaidawh hmasa chu tlawmna angin an ngai a ang hle. 

India a inhnuhdawh hmasa nghak a, chan tha chan tum an nih chuan, hun rei tak an nghah a ngai ang. PLA Commander in Chief Xi Jinping thupek anga status quo hi danglam a ni a. A ni bawk hi a ni, status quo thlaktu tur chu, tiin Indian Official pakhat chuan a sawi. A awmzia chu, Chinese President Xi Jinping an a sipaite tawlh hnung tura a tih hma chu ramri status quo hi a danglam dawn lo a ni.

Ram pahnih Defence Minister leh, Foreign Minister te chu Russia khawpuiah an lo inhmu tawh a. Military levela inbiakna pawh a tam tawh khawp mai. Galwan buai hnua a tum khatna turin Modi leh Xi chu BRICS Summit ah an inhmu dawn ta. Eng thil nge an sawi dawn ni? 

November ni 17 hian Russia chuan BRICS Summit a vawi 12-na a thleng dawn a. BRICS ram - Brazil, Russia, India, China leh South Africa te an tel ang. Tun tum BRICS Summit hi video conferencing hmanga neih tur niin, India Prime Minister Narendra Modi leh China President Xi Jinping te an tel ve dawn a. India-China ramri buai hnua Modi leh Xi inkawm leh hmasak ber tur a ni. 

Modi sawrkhar hnu kum 2014 atang khan Modi leh Jinping hi vawi 18 zet an inhmu tawh a. Modi sawrkhar a term hnih hnu hian kum 2019 khan Sanghai Cooperation Organization summit, Bishkek, Kyrgyzstan ah an inhmu bawk a. Modi hian kum 2017 khan Xiamen, China a tlawh a. Jinping hian kum 2016 khan Goa, India a lo tlawh ve tawh bawk. 

Tun tuma Modi-Jinping virtual meet ah hian ramri buaina an sawi dawn em, tih a la chiang lova. October ni 12 a Military Commander inbiakna azirin Modi-Jinping hi an inbiak rin a ni. 

Ramri buaina kara ram pahnih inepna chuan thla 5 lai a kai ta a. India sipai lam pawh an inhrosa nasa ve ngang mai. Hmanni lawk khan, Indian Air Force Chief RKS Bhadauria chuan India Air Force dinhmun a that thu a sawichhuak a. Chanchinbu mite zawhna, China in Pakistan airbase Skardu lo hmang ta se? Tih zawhna chu, IAF chief Marshal chuan, China hian Pakistan puihna a mamawh a nih chuan, engmah kan sawi tur a awm lo. Pakistan thlawhna tumhmun Skardu hi China in a hmang a nih chuan, India tan a pawi thei dawn a. Hmelma ram chunga kan tih thin angin, kan do ve mai ang, tiin Pakistan chungchang a sawi. 

IAF hian ral hmatawngah Sukhoi 30 MKI, Jaguar, Mirage 2000 te an dah a. Rafale Jet te pawhin an vilh reng bawk. Sipai a dah tam bawk a, IAF hotupa hi a zám lo khawp mai.

India leh China kar thu hi sawi lawk thei a ni lo. Indo tur ang maiin an insingsa fel dér tawh a. India pawhin a thei ang angin tualchhungah ralthuam a chher tlut tlut a. A dang a mamawh pawh a lei char char bawk. Russia siam MiG-29 jet, sawmhnih pakhat zet order a tum leh mek a. December thla hian a lei fel hman beisei a ni. MiG-29 hi a chhuakthar ber a ni dawn a. A hmasa te ai khan a sang tawh hle a, Fourth plus (4+) generation ngat a ni. 

Indian Air Force hian tun financial year chhung hian Su-30 MKI sawmpahnih, Russia phalna anga Hindustan Aeronautics Limited (HAL) in an siam chu lei a tum bawk a. Tin, ramchhunga siam tho Light Combat Aircraft (LCA) Tejas Mark 1A pawh lei thuai an tum bawk. 

Indian Air Force chakna thahrui hi Squadron sawmli pahnih (42) tur a ni a. Squadron hi Unit khat tihna ang a ni. IAF hian Squadron khatah engzat chiah nge Aircraft leh sipai an dah kan hre lova. Source thenkhat chuan Squadron khatah hian aircraft 16 vel a awm niin an sawi. Tun dinhmunah India in Air Force a mamawh zat hi Squadron 42 niin, tuna a nei mek chu Squadron 30 chauh a ni. 

IAF Chief Marshal RKS Bhadauria chuan, chak takin hma kan la mek. Tun kum 10 chhung hian Squadron 36-37 vel nei hman kan tum a. He target hi kan tlin theih chuan ka lawm viau ang, a ti. 

Heta lang chiang ta em em chu, India hian a himna tur Air Force a la nei lova. India ram pumpui venghim thei turin Squadron 42 kan mamawh. India himna tura kan mamawh zat Air Force Unit hi engtik nge kan nei thei ang aw...!

~TimesofMizoram