“Ṭap chungin…chaw nghei ula, in thinlung zawng zawngin ka lam lo hawi rawh u,” LALPAN a ti (Joela 2:12).

“…nimahsela, Kohhranho chuan ama tân Pathian hnenah bâng lovin an tawngtai reng a.” (Tirh. 12:5). 

“Chutichuan chaw an nghei a, an tawngtai zawh chuan…an tir chhuak ta a.” (13:2). 

Dr P.C. Biaksiama
22nd Nov 2020
Sunday Thuchah

A tir tê atanga Mizo Kristianten thlarau lama piansualna kan neih pakhat chu chawnghei chungchang hi a ni. A takin kan ti thei lo. Sawifiah lamah kan ramtang mai. Chawnghei ai chuan ‘puar peng pawng’ tih tawngkam kan thlah duh zawk, rawngbawltute meuh pawhin. Hei hi eng nge a chhan tih ka ngaihtuah a; inthlah chhâwn a ni awm e. I tu leh faten i chawnghei lai hmuh tur an hriat loh chuan, i thlahte atangin chawngheia tawngtai mi an chhuak lo mai thei. Engati nge chawngheia tawngtai uar ber Bible-a mite zirtu ni siin chawnghei kan tih theih tlat loh le, kan Kristian that vei nen. Thenkhat chuan tawngtaina hmanga hliahkhuh an tum. Mahse chawnghei leh tawngtai hi a kal kawp reng; then hran theih a ni lo. 

Sual Setana do nana kan hmanraw tangkai ber tur ni si, kan rûla raw neih tlat mai hi, harh chhuah a hun ta. Ram thim vei em emin kan feh chhuak a, kan ringtharte chu (tu lo zirtir nge maw ni), Sunday tuka chawnghei hi an lo pianpui tlat a, keinin kan pian sualpui si. Tichuan, Sunday tuk a lo thleng a; chawnghei chunga chawhmeh tuihnai min siamsak chu kan ei tun tun mai thin a. Kan kristianna hian chawnghei a thleng lo emaw tih palh a awl. 

Bible-a Pathian miten manganna an tawh tak tak chuan Lalpa hmaah chaw an nghei chawt mai thin. Zawlneiten Pathian an ‘karna’ hmanraw tangkai a ni. Sam ziaktu chuan khûp zawi hnawk khawpa chaw a nghei thu a sawi a (Sam 109:24). Isua unau Jakoba kha khup bâwk luau khawpin chawngheiin a thingthi nasa, an ti. Khawvel thilah leh Pathiana milian pahnih – Nehemia leh Daniela te kha hun rei tak tak chaw lo nghei thin an ni.

Tukin hian thuril leh theology thuk sawi tur ka nei lo; mahse chawnghei hi Pathian thuril leh thlarau ralthuam tangkai a nihzia ka tawnhriat ve mâwlmang têa sawi ve ka duh a. Shillonga postinga kan awm laiin ka rawngbawlpui Upa Nghawra (RIP) chuan vawi khat chu a chhungte buaipui hat khawpin chaw a nghei tluk tluk mai a. Rei lo te hnuah chuan a enkawl that theih loh a fapa nun chu a rawn ngîl zawt mai a ni. Kan awm ve chhung ngei khan missionary-ah a kal ta hial a ni. Vawi khat chu TV a Dr Ramdintharan chaw a nghei thin atanga thlarau lam malsawmna a dawn dan leh kohhranten kan hman tangkai a tulzia a sawi kha ka lo ei viau mai a; “I lo hetih vang a nih hi hla tha tak tak i phuah le,’ ka lo ti a ni. Khawchhaka ka rawngbawlpui Evan Ṭhahneihfaia (chutih laia hla 400 zet phuahtu) leh Rev Killuaia (Pu Chawngkhupan ‘Chhim Killuaia’ a lo tih) te hian ni hnih ni thum te chawngheia an tawngtai hnuah Lalpan hla tha tak tak a pek thin thu min hrilh thin. “Aw khawngaihtu Pathianin…” tih hla a phuah (Lalpan a pek dawn tum phei chuan ramhnuaiah zankhuain, chawngheiin a tawngtai a ni. Kei tehlul pawh Bible ka lehlin tirh lai khan chawnghei hun ka insiam ve a. A lo rei deuh a, intihchak nan chaw tha ka mamawh bawk si. Mak tak maiin ka aiawha chaw nghei tur Lalpan ‘nghei lo thei lova a siam’ te min pe nual mai nia!

Heti zawng hian i’n sawi teh ang. Hman laiin Pathianin khaw sual tak tihboral vek a tum a; chumi hrilh lawk tura a mi tirh lahin a tlan bosan daih a; na fê tuartira a sawizawi hrep hnua thu a va puantir lah chu, ‘tun atanga ni 40-ah Ninevi khua tihboral a ni dawn,’ tih chiah a ni mai. Lo vuak thluk tawp mai awm a ni. Mahse thilmak a thleng. Jonan boral vek tura a duh, Pathian meuh pawhin an sual avanga tihboral a tum mek thulhtir vektu, chhanchhuahna ropui thlentu a awm ta tlat mai. Chu chu eng nge kan tih chuan Ninevi mite nun lo inthlaka Pathian lam an lo hawia an sim ta chu a ni. “Ninevi mipuite chuan Pathian chu an ring ta a, chawnghei tur thu an puang a, mi te ber atanga mi lian ber thlengin saiip puan an sin a. An lal ber pawhin a lalthutthleng te, a lal puan te hlipin, simna saiip puan nen vut zingah a thu ve ta a nih chu!!! (Jona 3). 

Keini Kristian tha tak tak leh rawngbawltu ropui tak takte hian kan ti ve thei ang em? Covid hripuiin min nuai a, mi sang tam takin kan vei tawh a, thi kan awm ta nual chung hian tlawmna puan sinin Lalpa lam hi kan la hawi lo em ni aw? Ramri-ah buaina a lo chhuak leh a; a hnam pum anga chawngheia tawngtaia mipuite hmaa min hruai thei tur hmel kan hmu tawh em? Nge, harsat manganna dang kan la nghak chhuak leh dawn? “Aigupta rama hripui ang kha in zingah ka lentir a…chuti pawhin ka lam in hawi duh si lo,” LALPAN a ti a ni (Amosa 4:10).

Kha ring lo khuaa an lalpa thupekte kha a va ropui rem rem em! Tihian order a chhuah: “Mihring te, ran ten… engmah tem pawh tem suh se…tui pawh an in tur a ni lo. Mihring leh sa reng rengin saiip puan sin vek sela, nasa takin Pathian au rawh se; a ni, mi tinin an thil sual tihte leh an kuta tharum an thawh thinte chu sim vek rawh se. Kan boral loh nan Pathian chuan a rilru lamletin, a thinurna nasa taka tang chuan a inlamlet lo vang tih tu nge sawi thei?” (Jona 3:7-10) a ti ta a ni.

Kha Ninevi lal leh a khaw mipuite rinna thiltih – an thil sual tih sima chawngheia Pathian hnena an tawngtaina khan Pathian thiltum meuh pawh a va thulhtir chiang em! Hei hi tun thlenga Pathian thuchah laimu a la ni reng. Keini Pathian thu hre em ema inngaite hian Pathian thu hi a hun takah thiltihtheih nan kan hmang thei em le? Tu dang zirtirna mah ngai lova inhriate hian Pathian thu hi a rina rin, a tiha tih hun a ni tawh tih hi mimal tin inzawt ila.

Persia minister lian Hamana’n Judate suat mang vekna tur thupek a tihchhuah laia Pathian chhan chhuahna a lo awm theihna chu a hnam pum huapa chawnghei-ah a intan a nih kha. Thusawm Pek hlawh chhuak tur khan Mosian ni 40 leh zan 40 chawnghei-ah a han hlawh chhuak a ni lo vem ni? Pathian Fapa meuhin rawngbawl a tan hma khan ni engzah nge chaw a nghei kha? Chuti chung chuan Pathian rawngbawltute hian chawnghei hi kan la zawm thei chuang lo va, tumah a tak (practical) in kan la zirtir thei chuang lo a nih hi. Hei hian thil kan la na lo, kan ti tak tak lo, rilru lamlet khawpa simna kan nei lo tih a tichiang. Mahni sahimna chin, a tlangtla tawk vel bak pelh kan tum lo, chi da tawh kan ni tehreng emaw ni? tih mai a awl awm e.
Sunday Thuchah
ENG VANGA  TAWNGTAI NGE KAN NIH? Tunah hian Mizo mipui tawngtai mi tam berin kan tawngtaipui mek Pu Trumpuia hian hmelma pa Setana sipai rualte beihrawnna leh kawng tinrenga dodalna, chirhthehna leh sual tinreng tia puh hmingchhiatna a tawk mek. Lalpa miten heti tak hian tawngtaisak lo ila, an beihna em em hi mihring tan tlin chi a ni lo. Kan hriat vek hnu mah ni se, khatia Election ni, 3 Nov zanlai pelh thlenga vote awm zawng zawng an chhiar zawh khan, an inchuhna bik state 6-ah te chuan Trump-a khan fal takin hma a hruai vek tih khawvelin a hmu vek a nih kha. Mahse state buai ve lote ang lo takin, vote chhiarna zawng zawng kha dan ang lo takin an titawp vek a, vote chhiarnaah tumah awm phal lovin chhuah vek tur an ti a. Mahse, an chhuah ruah lai changin a rukin, a tuk vartian, zing dar 4 velah, an vote duh belh zat theuhte phurin ballot paper siamchawp, Bidena vote hlang hluk mai chu vote chhiarna hmunah an thiar lut a; tichuan vote chhiar zo tawh emaw intia officialte an han luh leh chuan ballot paper chu a nuai tel a lo pung leh ta thur mai kha a ni a. Trump-a vote hmuh sa chu an khumtir ta vek a. Bidena hnehna an chantir leh ta a. Mahse Trump-a te lam chuan engkim chhui fiah vek a nih loh chuan chutiang vote tihchingpenna nasa lutuk chu an pawm thei ta lo va; court-ah an zualko ta a; mahse chung state 6-a an court te chu Bidena lamtang vek an nih avangin a theih ang angin an lo hnawl a; mahse Trump-an lamtangte a ngah zawkna hmun rorelna sang ber pan tur an neih avangin an lungngai lo hle. 

Ni 20 Nov. 2020 khan vote tihchingpen a nih dan mit ngeia hmutu mi za engemaw zat inpuanna te, an thil tih dik lo lai video engemaw zat te, Trump-a vote Biden-a vote-anga a nuai tela an lo chantirna Dominion khawl hnathawh dan hmutute inpuanna te, mitthi tawh sing chuang zet vote thlak anga an tihtirte hming te leh finfiahna dang tam tham tak nen, Supreme Court-ah an thehlut ta a. Chumi ni la la (ni 20 or 21) chuan a ni awm e, Supreme Court chuan order chhuahin member 6 te chu state pakhat zel inchan semin hma an la tan ta. Thil dik lo an chhui fiaha an chinfel theih nan kan tawngtai sak dawn nia. Kar hnih chhungin court thuchhuak hi an tifel hman mai thei e.

Trump-a lamin an demand ber chu khang vote dik leh dik lo, a lem leh a tak thliar hran ‘audit’ kha a ni. Vote dik zawng zawng chhiar vek a, a dik lo chu a dik lohna leh a lem a nihna anga finfiah chu a ni. Chu tak mai chu Biden-a lam chuan an hlauh ber leh theihtawpa dal an tum ngar ngar chu a ni. Vote tihchingpen sawi tham a awm lo ti reng siin, engvangin nge chuti taka vote endik an remtih loh? A chhan a awm a ni. Chuvangin, thuneitute hmanga vote tla zawng zawng endika THUDIK TAK hmuh chhuah a nih theih nan, thahnemngai takin (a theiin chawngheiin) i tawngtai zel ang u. Lei lam thuneituten an tih theih loh chuan Van lam SUPREME COURT kan la nei zel alawm le! 

FB-in ka thuchhuah min block sak. Mi tam takin in lo hriat tawh angin ka thuchhuahte hi face-book in min lo block thin tih USA leh hmun danga thian thaten nizan thleng khan min hrilh a. A ziah dan turah an hriat thiam theih loh turin Mizo tawnga ti zel tur te pawhin min hrilh ta a (Hetia lo tibuaitute hi Mizo an nih chuan a buaithlak det mai thei); mahse Lalpa lamtang kan ni a, Lalpan min hnehsak zel ang. Chutih chhungin Biden-a lamtangten Biden-a chet thatna thu hlir leh Trump-a chet chhiatna lam hlir TV leh chanchinbu hrang hrangah a lo darh ve nuaih nuaih bawk si a. He information indona (Info-War) ah hian he thim lalpa, boruak lal hi Krista Kraws thiltihtheihna hmanga kan “PHUAR” (BIND) a ngai, thlarau indona hi a hring ahranin kan do a nih hi. 

Tukin zing pawh Upa senior leh zahawm takin, “Pu Trump-a chu a chak dawn ta lo maw?” a rawn ti zuai raih mai a (mi dang tam tak pawhin an rawn tih thin angin). Kei chuan, “Tu nge chutin ti?” ka lo ti he hu a. “A, hei, chumi chuan tihian an puang alawm, hei an la puang mawlh mawlh…” a ti a. “E heu, kan thu hriat a va inang awm lo ve; heng state 6 a thuneitute vote tihchingpen thubuai rip tak chingfel turin Supreme Court a thawk chhuak dawn chauh a ni bawk si a; Georgia state-a vote an recount te khan a lem leh tak thliar hrang chuang lovin, vote lem leh tak an chhunfin ruih ruiha, a ngai bawka an lehburh kha ‘certification’ lo pe mahse, Bidena tlinna an tih kha 0.24 lek, ½ % pawh ni lova inhnaih a nih avanga chhiar that leh theih dan a la awm zel. Final theih a la ni lo. A reng thuah Georgia secretary of state Brad Raffensperger-a, Republican ni si, Democrat  lamin dollar maktaduai 106-a an tham (bribe) kha a ni lehnghal a; eituk thubuai a awrh rit khawp ang. Supreme Court-in a enchian phawt a ngai bawk asin,” tiin ka lo chhang a. Ani pawh chuan, ‘Thil hi a va lo mak ngai dawn ve maw le,” a ti vang vang mai. Ani ang bawka thudik tluan tling lo thupuan ngaithlatute rilru a chi-ai dan tur hi suangtuah ngam pawh a ni lo. December 14 hian electoral college te chuan President tur official-in an thlang dawn chauh a ni. 

      RINGTUTE INNGHAHNA CHU PATHIAN America leh khawvel ram hrang hranga evangelical kohhrante chuan a tir atangin Trump-a tan hian an tawngtai reng a. Franklin Grahama te, Baptist, Catholic, Pentecostal leh kohhran hruaitu pastor leh rawngbawltu sang tam takin chawngheiin, mangang takin an tawngtai mek a; Lalpa chhanna ropui tak an nghak mek a ni. 

Inlarna thupuan-in kan Sunday thuchah hi kan khar ang. Thenkhat chu ‘inlarna’ han tih hian in lo ner nghal mai ang e, lo ner suh u. Lalpan a Thlarau a la leih tur thu te, tlangval te, putar te, bawihpa leh bawihnuten inlarna hmuin thu an la puang ang (Joela 2:28-29) tia Bible thutiam ringtu kan ni lawm ni? He thu ka ziah lai, tukinah mai pawh khan mi pakhat chuan mumang ni si lo, inlarna angin *Trump-a hi lallukhum khumin a lo hmu a; a hming sawi chhuah erawh chu a duh bau lo va; naupan deuh lai atanga Thlarauvin dik tak taka thil a lo hriattir thin tawh thu a sawi. Amaherawhchu, khawvel puma a inlarna hmuh puangtu, a video pawh darh zau tawh tak, India mi ngei, Shruthika Priscilla inlarna hi ama insawi dan tlangpui i lo tarlang teh ang:

October 5, 2020 khan Priscilla-i chu Pathianin thilmak tak a lo hmuhtir a. Lehkhabu kawm sen uk pakhat, Khawvel Hruaitute Lehkhabu tih hi a lo lang a, a chungah chuan Donald J Trump-a tih a lo chuang a. Chuta Pathian aw a hriat chuan: ‘Ani hi thlan chhuah (the elected one) chu a ni a, a lo kir leh dawn,” a lo ti a. October 8 khan vision vawi hnihna a hmu a; Trump-a chu ama bedroom-ah khum sirah hian thingthiin Pathian hnenah a lo tawngtai a; chu chuan beiseina sang tak min siamsak leh ta a ni. Hetiang taka Pathian hnena a tawngtai lai Prophet Selvaraja’n inlarna (vision-a) veka a hmuh ang chiah kha a ni. A vision hmuh vawi thumna (Oct. 8) ah chuan, chanchinbu leh TV channel – Media lamin Biden-a President atana an lo puan dum dum laia thil mak thleng heti hian a lo hmu.

Sipai rual lian tak, sakawr dum chunga chuang hi an lo awm dum ṭhup mai a. Chu veleh, mitkhap kâr lovah Van Sipai rual an lo lang nghal tuarh mai a; sakawr dum chunga chuang sipaite chu an rawn hneh ta a; chumi zawhah chuan van lamah an chho leh ta a. Chumi hnu chuan Trump-a chu a thingthi a, Pathian hnenah dilin a tawngtai a. Tichuan, angel rualte chu Trump-a veng turin an lo kal ta a ni.

Dawithiam ramhuai hovin Trump-a an dawi. He thil a hmuh zawh hian a hmutu Priscilla-i chu hnuai lama chhukna kailawnah hian a lo kal chhuk a. A tirah chuan kailawn chu a eng a, a chhuk zel chuan a lo thim tial tial a, a thim ta vek (pitch dark) mai a. Chu hmun thimah chuan Trump-a lim hi bangah an lo tar a, dawithiam hovin dawihla an lo chham khum mur mur a (Trump-a hi chak lo turin, tlâwm turin ralkhat atangin dawi (witchcraft) hmangin an lo bei nasa mai a ni). Chu thlarau indonaah chuan vision hmutu Priscilla-i chuan, theihtawpa tan la-in, “Isua thisenin, Isua thisenin…” tiin a bei let ve ta a, ramhuai dawithiamho chu an tlu ta dual mai a ni.

Priscilla-in vision a hmuh danin Supreme Court order a chhuah tur thu te, Trump-a hian a hnathawh tur a la thawk zo lo, a la thawk chhunzawm dawn tih te; Setana hian a lo beih nasat zia te; mahse thilmak takin Pathian thiltih ropui lo lang tur te pawh a sawi. Chuvangin Krista Taksa, a Kohhrante hi thahnemngai takin lo tawngtai zel rawh u,’ tiin a chah nghal a ni. 

Donald Trump-a tlin leh tur thu inlarna leh hrilhlawkna hmanga Pathianin a hriattirte hi an thahnem tawh khawp mai; rawngbawltu pastor hmingthang tak takte leh zawlneite an ni. Tun ang em ema America leh khawvel ram tina ringtuten Trump-a tana kan tawngtai nasatzia hi thil awm ngai a la ni lo. A chhe ber zawnga media hrang hrangin an chhuah pawha, nghing lova ka innghah ngheh tlatna chu – heti taka Lalpan min tawngtaitir nasat em avang hian, thilmak nasa tham, khawvel nghawr nghing tham tih a tum a ni ang, a lo thlawn dawn lo, tih hi Bible pum puia thil thlengte hian min tinghet telh telh a. Mimala min chirhthehtute chenin mal ka sawm a ni. Danglam ngai lo Pathian chuan a chhiahhlawh Donald Trump-a, tuarna, dodalna leh sawichhiatna tinreng a tuartir hi khawvel mipui hmaah a la chawikang leh ngei ngei dawn,’ tih hi a ni. Lalpa chu fakin awm rawh se.

Post a comment

Powered by Blogger.