A ngaihven duhte tan chauh
DONALD TRUMP Versus JOE BIDEN TE DINHMUN

Bidena Vote Siam Pungtu DOMINION khawl Ropui Man Chhuah a ni ta!! 

Dr. PC Biaksiama, Monday, 30 Nov. 2020

DR. PC BIAKSIAMA

A tawi theih nan, zawhna (Q) leh chhanna (Ans) anga sawi kan tum ang. Hemi atan hian ka thu lo ziah tawhsa khaikhawmna a nih bakah source hrang hrang ka dap khawm atanga khaikhawmna a ni bawk.

Q. 1. Joe Biden-a hi US President a ni dawn em? Cabinet Minister te pawh a ruat tawh si a?

Ans. 2020 inthlanah President zawk tur a la chiang lo. Biden-a president ni tura thlan tlin tawh anga lo cheibawltute hi Leftist Democrat-ho, Biden-a lamtang media te vawrh darh mai a la ni. President tur ang ziazanga an cheibawla, cabinet minister tur a han ruat vel hi ‘lemchang’ mai a la ni. ‘Lo ti ve mai mai teh se, keini pawhin court hmangin kan fight mek a ni’ tiin Trump-a pawhin a sawi.

Q. 2. Chanchinbu leh TV news lamah Trump-a pawhin Biden-a chu chak zawkah a pawm tawh, tia an sawi darh vak hi dawtthu nge, thudik?

Ans. Hei hi dawtthu, dawt muhlum a ni. Biden-a lamtang media te tihdarh a ni bawk. Trump-a chuan hetiang vote tihchingpenna result hi a pawm ngai dawn lo (..will never concede…) tih a sawi.

Q. 3. Inthlanah khan tu nge tling zawk -Trump-a nge Biden-a?

Ans. Inthlan ni, Nov. 3 nia vote tla chinah Trump-a kha hneh takin a tling deuh vek. Mahse Democrat hovin a ruka vote an thun luh leh hnuah Biden-a kha chak zawk angin an dah ta a ni.

Q. 4. Trump-a lamin an pawm zam nge, engtin nge ṭan an lak?

Ans. Pawm zam lo. Court-in a chinfel turin an thlen.

Q. 5. Court-ah chuan Vote tihchingpen (rigging) a ni ngei tih finfiahna an nei tha em?

Ans. Mitthi tawh sang tam tak vote thlak ve angin an lantir; ballot paper nuai telin a neitu awm lo leh chhui theih loh an awm; vote thlak thei mihring zat aiin vote tla a tam daih a, an vote tla zat hi mihringin an daih lo; signature a inmil lo; vote chhiar nana an hman Dominion khawlin Trump-a vote Bidena vote anga a chantir zat hi a maktaduai tel nia chhut a ni.

Q. 6. Court hrang hrangin Trump-a case (law-suit) te chu an hnawl tih hi a dik em? Trumpa tan court lama khin hneh theih a ni em – Supreme Court-ah beisei tur a la awm em?

Ans. Trump-a tan court-ah hnehna a beiseiawm. Inthlan buarchuarna state Arizona, Georgia, Michigan, Nevada, Pensylvania leh Wisconsin a an state court te chu Bidena lamtang deuh vek an nih avangin an lo hnawlsak dawn tih a chiang sa. Tunah pawh an hnawl nual tawh a. Mahse chu chu Trump-a team-te tan chanchin lawmawm a ni ve thung – Supreme Court lama an kal theihna tura kawng inhawng a ni. Rampum himna thil a nih loh chuan, Supreme Court-a direct-a thu thehluh theih a ni si lo va. Supreme Court-ah Bidena lamtang judge 3 chauh an awm laiin, Trump-a lamtang 6 an awm a; chung zinga 3 te phei chu Trump-a appoint an ni a.

Chuvangin SC lamah Trump-a hi a chak tur saa ngaih nih theihna kawng 4 tal an nei: (1) ukil chhuanawm tham an nei; (2) an thu thlente chu hnial thlak rual loh khawpa finfiahna (evidence) nei tha, witness rinawm tak tak leh video thlenga show tur an neih vek avangin; (3) Supreme Court-ah lamtang an neih that em avangin. Chubakah (4) America mipui zahve zet tur khuan Trump-a hi President tha ber, economy enkawltu tha ber, ram hmangaihtu huaisen ber, Kristiante thlavang hauhtu tha ber, adt. nia hriain an support tlat a; amah thlangtu America mipui maktaduai 73 te thu leh hla khu an court sang ber leh thunei ber khuan a namnul mai lo vang. Tun hun atan hian a ni ang chu, liberal lam mi thi ta aia Trump-an a mi duhzawng Justice Amy Cony Barrett-i a lo ruat ni!

Q. 7. Trump-a team-in court-a an demand ber te chu engte nge?

Ans. (i) Ballot paper endik (audit) a, vote lem leh tak thliar hrana, a tak chin chauh chhiar a, a lem zawng chu hnawl vek te, (ii) Signature inmil lo chhui chhuah te, (iii) daka vote thlak, a thlaktu nena inmil leh si lo (absentee ballot) nuai tel awm nia lang te, (iv) Dominion voting system, a nuai tela Trump-a vote an nuai rehtirna leh, Trump-a vote Bidena vote anga an chantirna Dominion khawl hnathawh endik vel te a ni tlangpui. Vote lem leh tak thliar hrang si lova chhiar that leh rikngawt khan awmzia a nei si lo va.

Q. 8. Trump-a hian vote maktaduai 73 vel a hmuh laiin Bidena hian vote maktaduai 80 lai a hmu an ti a ni lo’m ni? Biden-a hi a president nge nge lo vang maw?

Ans. Hei hi zawh awm tak a ni. Biden-a chuan inthlan dawna campaign a neihna reng rengah mi pahnih pathum bak ngaithlatu tur a nei ngai lo a nih kha. Campaign pawh bei mumal lovin ama tawmkuk (basement) ah a tawm reng a. Trump-a erawh chu campaign a neihna reng rengah (tun Inrinni a Georgia rally thleng khan) a maka maka tam mipuiin an bawh a, stadium lian pui puite kha an khat hmur thin a. Inthlan a han ni a, an chhiar danin Biden-a chu America president thlan tawh zawng zawng zinga vote hmu hnem ber record a han break thei si chu: a mak lutuk; eng chhiarkawp dan nge ni ta? Vote chhiarnaah engin nge pui? eng ang vote chhiarna khawl mak nge an rawih? tih hi vawiina kan thu ngaihnawm lai tur, uisathiamte chhui chhuah mek hi a ni.

America mipui zinga Trump-a lar vanglaia a vote hmuh kha engzata tam pawh ni se, a aia tama lehpel zel theia siamtu khawl mak leh ropui chanchin kan sawi dawn. Trump-a hian kum 4 term chhungin hna thar nuai za fe a siam thar a, economy ropui ber a din a, Mingo leh mihang zingah a lar chhoh vanglai a ni a; 2016 khan mi maktaduai 63 in Trumpa hi an thlang tling a; tunah America mipui maktaduai 10 zeta tamin an vote belh leh chung pawha Biden-a vote an la hmuh santir zawk zel theihna chhan THURUK ropui chu tunah hian kan hai lang dawn a ni.

Q. 9. Khai le, an inchuh bial 6 bika Biden-an Trump-a aia vote a hmuh tam zawk zel theihna thuruk chu eng nge ni? (Heta thuhnarte hi Trump-a legal team-te hnena witness-te rawn inpuanna atanga lak chhuah a ni)

Ans. Chhan tam tak a awm a. Eptu Democrat party hian America mipui zinga Trump-a lar zia an hmuhin, inthlan dan thianghlim (free and fair election) ang chuan an hneh dawn lo tih an hre sa vek. Chuvangin Trump-a an hneh theihna awmchhun chu Inthlanna Vote Tihchingpen vek (Stealing the Election) a ni.

Inthlan hma thla engemaw zat atang khan inthlana duty tur-ten Biden-a tana vote ruk khawm dan, rukruk dan chi hrang hranga training an lo nei lawk diam a. Mitthi tawh, kum 4 kum 5 kal tawha thi te chenin an hminga vote thlak dan an lo lakhawm sa vek a, an uite leh zawhte vulh te chenin mihring hming puttirin, vote nei theiin an siam tihte chu USA a cheng kan contact miten min hrilh mawlh mawlh. Duhsak taka Biden-a mamawh zat vote pe belh thei khawl maksak tak mai chu state thuneitute Democrat-ten nikum lam atang khan Dominion company atangin an lo lei chhuak sa diam bawk a; operator-ten a bika training an nei sa vek a. Chu khawl chuan hnung lamah a ruka hmun danga mite nena internet-a inbiak rukna tur connection hrui vihluhna kua a nei bawk.

Inthlan ni, November 3 tlai dar 8 p.m.-ah khan vote thlak hun an khar a, vote an chhiar tan a. State 50 zinga 44-ah chuan khami zan khan buai lovin an chhiar zo fel nghal mai. Mahse heng an inchuhna state 6-ah, Eptu party Dem-ho thuneihna hmunah, an hotute leh vote chhiartute pawh Dem-ho hlir, Republican lam tel ve phal lovin, endiktu (poll watcher) te pawh feet 20 vela hlaah an awmtir phal chauh va; a dik leh dik loh engmah an hmu pha lo. Tichuan, inbumna a thleng ta. Vote tling khawm an chhiar zo tep, Trump-a chuan hma a hruai filawr deuh vek ta mai. Khawvel miten an lo thlir thup. Trump-a tling tur dal turin eng thil nge an tih tak? Chung bial hrang hranga vote chhiartute chuan a ruka inbe tawnin, election dan bawhchhiain vote chhiar an titawp rual ta thup a nih kha. Room chhuahsan vek tur, an ti a. Darkar hnih thum vel hnua an han luh leh chuan, Trump-a vote hmuh sa lehpel tur khawpin Biden-a vote hlir chu mak takin a lo vum leh thur ta mai a nih kha. A history hi chhui let a ngai leh thin a.

Q. 10. Anih leh Trump-a lam chuan Biden-a chu chak zawkah an pawm ta em? Engtin nge hma an lak?

Ans. Trump-a a tlin hnua Bidena an tih tlin leh dan chu, a ruk a rala tih ni mahse, a titute mi za engemaw zat rual zet an nih avangin a ruk seng zo ta lo; mipuiin an hmalakna an lo thlir thup si a. Rei rial lovin a thawktute zinga mi ngei atangin mak tak takin an thiltih ruk dan chu Trump-a ukil rual (Legal Team) te hnenah a rukin an rawn inpuang ta tluar tluar mai a. A tawi zawngin Trump-a legal team-te chuan heng thiltih ruk leh inbumna zawng zawng, witness-te atanga an hriat chu lakhawmin, case rip tak siamin court-ah an zualko ta a ni.

Q. 11. Vote tihchingpen dan hrang hrang chu kan hre ta ni se; a ngaihnawm lai ni awm - Biden-a vote siam pung zel thei khawl mak Dominion chanchin kha han sawi teh le.

Ans. A tawi thei angin sawi ila. Dominion khawl hi vote chhiar nan (duh anga vote tihchingpen (rigging) na tur renga computer khawl siam danglam a ni. Thil thar a ni lo. South Americaa Venezuela rama an dictator Hugo Chavez-a khu a ram miten ning hle mahse, a chhan leh vang hriat theih si lohin inthlanah hian a tla thei miah lo mai a; chu thuruk ril tak, ram danga CIA te pawhin an mi duh zawng an tlintir thinna chu America president inthlannaah hian tum nei sa ranin an hmang ta a ni. Hmanraw dang an hmante kha chuan a sang bi, a sing biin a chhut a; mahse Trump-a hian vote a hmuh hnem avangin a nuai, maktaduai tela vote tidanglam thei Dominion khawl hi an hmang tangkai zual a ni.

Khatih hun laia report kan dawn thin te kha: “Fairfax Virginiaah Trumpa vote 100,000 Bidena vote ah a pakai, an tihsual hmu chhuakin an paih leh dawn.” “Wisconsin-ah 3:30 a.m. leh 4:30 a.m inkarah khan Biden-a vote 112,000 an hmu chhuak thut mai.” “Nizana vote chhiar an tihtawp hnu lawk khan Michigan-ah Bidenan vote 138,339 a hmuh belh a; Trumpa chuan vote khat mah a hmuh belh ve lo,” adt. tih vel a ri nuk mai a nih kha. Trumpa pawhin ama vote maktaduai 2.7 kha Bidena vote-ah Dominion khawl hian a transfer nia a sawi ve kha. Mithiam dangte chhut danin America ram pumah Trump-a vote hmuh maktaduai 38 lai he khawl hian a nuai bo nia sawi a ni.

Q. 12. Engtin nge Dominion khawl hnathawh dan an man chhuah theih? Hmun dangah a kângkai zel em? China leh Iran an lo inrawlh ve elo?

Ans. Michigan state-ah vote an chhiar laiin engemawti tiin Trumpa-a vote 6000 kha Biden-a vote hmuh angin he Dominion khawl hian a lo khawih chingpen tih an hmuh chhuah atangin, an state chhung bial (county) 47 ah hetiang khawl hi an lo hmang a; state 5 dangah te pawh an lo hmang vek tih an hre chhuak ta zel a. Vote an tihchingpen nasat turzia hi sawiin a siak lo. Trump-a a lal leh chuan Investigation hna a khing dawn hle a; Biden-a a lal chuan vote tichingpentuten lawmman an dawng hial ang.

US Inthlanah China leh Iran Inrawlh. Heng Dominion hnathawh dan chhuitu ukil (attorney) turu tak Sidney Powell-i hmalaknain, Dominion khawlin Biden-a titling tura an lo hman nasatzia report chu America mipui hriatah tlangzarh a ni tan tawh a (Mainstream news an tih, CNN, BBC, Aljazeera etc. Trumpa sawichhiatna ringawta ni khata darkar 24 chhung nitina report thinte chuan an thup tlat a; vote tihchingpenna sawi tham a awm lo, an ti tlat reng a ni).

Military Intelligence lama mithiam (electronic Intelligence analyst) chuan he Dominion khawlin a hman computer software hi a han endik nak chuan, he khawl part pawimawh chips te, processor leh a dangte chu China siam a lo ni reng a. Tun hma atang khan security lama inven a ngaih avangin India sipaiten China siam mobile leh khawl changkang an hmang duh lo a nih kha. He Dominion khawl hi a Server chu China Communist Party lamah chhui luh a ni daih mai tih he military intelligence hian a sawi a, chu mai ni lovin he khawl cheng (ID) hi Iran pawhin a lo kawl ve reng tih te an report zel a. (The software used by the Dominion machines was accessed by agents of malicious actors, such as China and Iran, “in order to monitor and manipulate elections,” including the 2020 election,” – according to the former electronic intelligence analyst under 305th Military Intelligence (Sidney Powell suit makes 30 Allegations in bid to invalidate…myvalleynews.com).

US President thlannaa China leh Iran-in an lo thlir (monitor) reng a, Bidena tlin nan Dominion khawl hmanga ṭan an lo la ve tih hi, a dik tak tak a nih ngai chuan ram leh hnam phatsanna lian berte zinga mi a tling a, Bidena leh a company mi suaksualho te chan tur hi a rip khawp ang, President pawh ni se, Impeachment hmanga paithlakna tham, heng aia case nêp zawk pawh lung in tanna tham a ni si a. Mi dang chunga an duh chhiat ber kha anmahni chungah ngei a lo tla ve dawn ta a ni. An ngaihtuahawm ve dawn hle mai. Pathian thu dikna chu a takin a lo lang nghal zel mai si a. Thil tisual hauh lo Trumpa pawh thubuai namen lo siamsaka an chhaihbuai nasat dan kha a chiang si a. Thim hlim aṭangin zângkhua a bungbu nghal dawn a nih hi!

THUTHAR LAWMAWM: BREAKING NEWS! Tun mai 8 a.m. khan California USA atangin ka nau bengvar takin thuthar lawmawm mi rawn thawn. Judge Timothy Batten, Sr. chuan Georgia state chhunga Dominion khawl zawng zawng chu, thuleh awm hma chuan tuma khawih chet phal lohna (freeze) Order a chhuah ta, nimin Sunday, 4:14 p.m. (keini tan tukin zing) khan. Hei hi Trumpa ukil Linn Wood-a hmalakna rah chhuak a ni. Hetia nih chuan, State danga Dominion khawlte pawh a nghawr nghing thei ang, an lo tihchingpen loh nan, an kutte chu Isua Krista hmingin i phuar hlawm tlat ang u. Hmelpa pa bumna ralthuamte chu kan hmuh lai ngeiin ṭhiatin a awm ṭan ta!! (https:/www.thegatewaypundit.com/2020/11/breaking- update-judge-timothy-batten-issues-order-freeze-dominion...)

Tlangkawmna. US President inthlanah hian an hmelma China leh Iran te pawhin Biden-a tlin theihna turin electronic thiamna sang hmangin tan an lo la ve tih report chu a darh nasa tawh hle mai. Dominion khawla thawktuten man chhuah harsa thei ang ber tura bumna hmanga Biden-a tlinna tura an hmalak dan chipchiar chu sawi sen a ni lo. Biden-a hote hian ruk an ru a, Trump-a hote hian an man a, an dawp mek a ni. State tina court hniam zawkten lo hnawl mahse, Trump-a lamtang tamna Supreme Court thuneihna hmangin Bidena vote lem an lo thulkhungte chu an phawrhsak ngei ang. Chutih chhungin president lem te lo la chang zel sela; ringtute tawngtaina avangin thudik chu a la dingchang ngei zawk dawn a ni.

Amaherawhchu, kan nitin chanchin thar dawn te Biden-a chak tur zawnga thu an vawrh darh reng si avangin, a tira phûr taka Trump-a lamtang mi thenkhat chu a vauzâm ta mai em ni aw? Pathianin a mite dilna leh tawngtaina a chhan pawh nghak zo lova rinna tlachhamin kan lo awm palh thei a. He sual leh tha indonaah hian, Setana chuan hnehna chang angin Isua chu kraws-ah khengbet thei mahse, thlan atanga a thawhleh hnua Krista thiltihtheihna chu hneh theih rual a ni tawh lo. America leh khawvel ram tina ringtuten a chhun azana an tawngtaina hi Lalpan a hun takah ropui takin a chhang dawn.

Tunah hian America leh khawvel pum hi communism ang deuhva Dictator pakhat hnuaia khawvel sorkar, khawvel sakhua, khawvel pawisa pakhat leh rorelna pakhat hnuaia siam tura engkim her danglam vek tumna The Great Reset an tih (New World Order an tih thin) atana hma an lak mek lai hian, chutiang lo do ngama, lo dodal theitu awmchhun chu Donald J Trump-a hi a ni a. A tlin chuan he sakawlh lalram lo ding tur hi sawn hlatin khawngaihna hun, chhandamna ni leh ruah hnuhnung, thlarau buhseng hun hi kum rei lote tal chu kan beisei thei dawn a. Biden-a a lal vaih chuan hun thim, Bible prophesy zirtirtuten Tribulation an tih, sakawlh, anti-christ lo chhuah hun hi a pawt hnai sawt ang a, rin aiin khawvel tawp a hnai dawn a ni. Hun hnuhnung bera awm kan nih tawh avangin thlarau lama harh chhuah kan ngai ta hle mai. Lalpa hnenah bang lovin i tawngtai zel ang u.

Post a comment

Powered by Blogger.